bin piye ik khumaar thaa kyaa thaa — Fahmida Mosarrat Ahmad

"viraan saa ab huun jo main aisaa to nahin thaa hotaa thaa samundar kabhi sahraa to nahin thaa chehre pe raqam thaa jo vo paDh hi nahin paayaa sab jaantaa thaa itnaa bhi saada to nahin thaa aangan mein mire dil ke chali aai thi kal shaam thi yaad tumhaari koi jhonkaa to nahin thaa chup-chaap tasavvur mein chale aate kisi roz sochon pe meri jaan koi pahra to nahin thaa ham dard kaa afsaana sunaate use kyun-kar zaahir mein jo apnaa thaa par apnaa to nahin thaa sab chal diye maujon ke havaale use kar ke maanaa ki bhanvar mein thaa vo Duubaa to nahin thaa vo jis ko thaa siine kaa har ik zakhm dikhaayaa baaton pe miri us ko bharosa to nahin thaa kar ke mujhe barbaad gayaa hai vo sitamgar gulshan yunhi dil kaa mire ujDaa to nahin thaa kyon rotaa hai ab hijr mein tere vo 'masarrat' jaate hue us ne tujhe rokaa to nahin thaa"

"mil ke ik baar use yaad nahin hone ke dil ke ujDe nagar aabaad nahin hone ke ab nae zulm to ijaad nahin hone ke saahibaa ham koi fariyaad nahin hone ke sachche 'ushshaaq to naapaid hue duniyaa mein ab koi shirin-o-farhaad nahin hone ke dil mein Thaani hai bhulaa dein tumhein dhire dhire aur is 'ishq mein barbaad nahin hone ke ek vaa'de ne yuun paa-basta kiyaa hai ham ko ab kisi taur bhi aazaad nahin hone ke ham ne har haal mein jiine ki qasam khaai hai ham kabhi ziist mein naashaad nahin hone ke ek kam-zarf se kyaa zarf ki ummid karein hain jo baune kabhi shamshaad nahin hone ke"

"kuchh roz chaahaton kaa ajab silsila rahaa vo dhaDkanon mein pyaar ki surat basaa rahaa ik shakhs jis ko dil se bhulaayaa thaa baar baar ye dil ki phir bhi us ko sadaa sochtaa rahaa jis ke junun mein ham ne bitaa di tamaam umr ye kyaa ki umr bhar hi vo ham se khafaa rahaa ye sach hai mujh se haath chhuDaa kar vo jaa chukaa jaataa use main duur talak dekhtaa rahaa tum us ki be-rukhi pe pareshaan ho kis liye dil toDnaa to us kaa sadaa mashghala rahaa chaahat mein apnaa zauq-e-safar bhi ajiib thaa us se hi shauq-e-husn-e-'masarrat' sajaa rahaa"

"guzri thi ek baar jo dil ki gali se main do-chaar aaj bhi huun usi be-kali se main be-zaar is qadar huun gham-e-aashiqi se main mujh se zaraa khafaa hai khushi aur khushi se main nikli huun jab se DhunDne be-laus chaahatein dhokaa hi khaa rahi huun baDi saadgi se main maadum us ki aankh se pahchaan ho gai jaise ki mill rahi thi kisi ajnabi se main jins-e-vafaa jahaan mein naayaab kyon hui ro ro ke puchhti rahi har aadmi se main apni khushi se vaise basar to na kar saki naaraaz bhi nahin huun magar zindagi se main main ne bhi saaf lafzon mein gham se ye kah diyaa pichhaa chhuDaa ke aai huun afsurdagi se main mai-khaana chal ke rind kaa khud puchhtaa hai haal maanus is tarah se huun ab mai-kashi se main jaam-o-subu nahin tiri aankhon se ab pilaa ai saaqi mar na jaaun kahin tishnagi se main"

"zaat jab bhi uDaan tak pahunchi vusat-e-laa-makaan tak pahunchi jab haqiqat gumaan tak pahunchi ik nae imtihaan tak pahunchi baat phailaai thi jo dushman ne dekho vo mehrbaan tak pahunchi kashtiyaan sab jalaa ke aai thi jab vo tere makaan tak pahunchi ik tiraa naam kyaa liyaa ham ne baat tir-o-kamaan tak pahunchi raaz-daan se kahi thi chupke se baat saare jahaan tak pahunchi ab tire intizaar mein ai dost muskuraahaT thakaan tak pahunchi oDh kar zabt ki ridaa paiham hausle ki chaTaan tak pahunchi aakhir-e-shab duaa 'masarrat' ki jaa ke phir aasmaan tak pahunchi"

"ho sake to mujhe ik shaam inaayat karnaa barpaa is dil pe miri jaan qayaamat karnaa phir tiri yaad mein raqsaan hai miri vahshat-e-dil kitnaa mushkil hai tiri yaad ko rukhsat karnaa aisaa TuuTaa hai taghaaful pe kisi ke ye dil ham se ro ro ke kahe ab na mohabbat karnaa pyaar ke naam pe be-mol hi bik jaate hain ham ko aataa nahin jazbon ki tijaarat karnaa hai navaazaa tujhe raaziq ne to phir ai insaan jitni mumkin ho tu duniyaa mein sakhaavat karnaa jaan le kahti huun lalkaar ke main tujh se adu main ne sikhaa hai sadaa sach ki himaayat karnaa ham ne thaamaa hai jo insaaf kaa daaman yaaro ham se hargiz nahin ummid-e-riaayat karnaa"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"