buq’a-e-nur har ik raahguzar ho jaae — Badiuzzaman Sahar

"miri khataa se baDi teri darguzar hogi to phir du'aa miri kaahe ko be-asar hogi ye mere dil ke safar ki hai kaun si manzil pata nahin hai musaafir ko to khabar hogi nahaa ke shab mein hi gesu jhaTak ke khol diye to kis tarah se miri jaan ab sahar hogi khudaa daraaz kare 'umr teri zulfon ki shab-e-visaal balaa se jo mukhtasar hogi jo mujh se lenaa hai le le mataa’-e-fikr-o-nazar vagarna duniyaa ba-kashkol dar-ba-dar hogi uThegaa shor-e-qayaamat bapegaa hashr 'sahar' jo un ki gurg-shanaasaai mo'tabar hogi"

"hai niyaaz-e-‘ishq se be-khabar jo na nikle parda-e-naaz se dil-e-'ghaznavi' mein taDap thi kyaa koi puchhe zulf-e-'ayaaz' se mire haal-e-dil ki rivaayatein ye chhupi chhupi si hikaayatein ye kahaan kahaan na paDhi gaiin tire ru-e-mushaf-e-naaz se mire dil ko aa mire miit le mire jism-o-jaan ko jiit le kahin haar jaae na zindagi gham-e-hijr-haa-e-daraaz se ye shikasta taar ye kushta tan ye ghinaa mein Duubaa huaa badan suno dhime dhime hai naghma-zan ye khamoshi-e-lab-e-saaz se ye hai kor-chashmon ki anjuman hai balaa se meri ye zau-fagan yahaan kis nazar mein hai baankpan jo milaae dida-e-baaz se mire dil ke taar ko chheD kar jo uThe ye naala-e-pur-asar to jalaa na de tire baam-o-dar ye sharaar-e-sho'la-e-saaz se ye kamaal-e-shaana nahin 'sahar' hai jamaal-e-aaina-e-nazar ye pareshaan kaise sanvar gai zaraa puchho zulf-e-daraaz se"

"sharaab-e-arghavaani khum mein rakkhi thi na miine mein ye kis kaa khuun hai saaqi bataa is aabgine mein lunDhaate phirte ho tum roz paimaane pe paimaana hamein shabnam baDhaa dete ho saavan ke mahine mein hamaari baada-khvaari par ab un ko bhi shikaayat hai kaTi hai 'umr jin ki aadmi kaa khuun piine mein udhar kuchh duriyon kaa silsila baDhtaa rahaa ham se idhar kuchh faasle kam ho gae hain marne jiine mein dikhaaein kis ko jaa ke ham shikasta taar-e-pairaahan lage hain sab yahaan apni qabaa ke chaak siine mein sabaa khushbu ki taalib hai to mil mushkin-kamandon se kahin ‘ambar ki bu hoti hai mardon ki pasine mein sukun ke din guzar jaaeinge ik din ahl-e-saahil ke ham ahl-e-mauj vo tufaan laaeinge safine mein 'sahar' mansab hamaaraa bhi riyaa-kaari agar hotaa to ham bhi shaikh ke shaamil nazar aate madine mein"

"zarb-e-taaza-kaari hai haadisa puraanaa hai sang-e-nau ke narghe mein phir vahi divaana hai jab se ye ghaTaa us ke gesuon ki chhaai hai bijliyon ki yurish mein tab se aashiyaana hai zindagi ki aazaadi intishaar-e-qaalib hai ruuh ke parindon kaa jism qaid-khaana hai khel hai guzar jaanaa darmiyaan-e-hasti se ik taraf mohabbat hai ik taraf zamaana hai nafs ke dariche se dil ki dhaDkanein guzrin aati jaati saanson kaa raqs taaziyaana hai dil ki be-qaraari kaa iztiraab kyaa likhkhun kaarsaaz-e-ulfat kaa shauq taajiraana hai aadmi ke rishte bhi kitne TuuTe phuTe hain zindagi ki qadron kaa ruup hi yagaana hai kyaa 'sahar' zamaane kaa inhitaat-e-tahzibi irtiqaa-e-hasti kaa qimti khazaana hai"

"siine mein armaan ki gangaa aankhon mein jamunaa kaa hai jal lekin dil ke taaj-mahal mein koi nahin mumtaaz mahal kis ko batlaaein ki kyaa hai jazb-e-darun ehsaas-e-vafaa kis ke gham mein naghma-e-dil hai kis ki hai tasvir ghazal aahein aansu girya-o-hasrat soz-e-darun hangaama-e-vahshat in sho'lon mein jo na tapaa ho kyaa jaane vo dard-e-baghal maikhaane mein jaam badal de chaahe mai-e-gulfaam badal de kam-az-kam ai pir-e-mughaan tu rasm-e-ravaadaari na badal kyaa samjhe vo nashsha-e-mai ko kyaa jaane zunnaar qadah ko tu hi dard-aashaam ko saaqi batlaa de tahdid-e-'amal rukh ki dhuup aaina-e-taabaan maar-gazida kaakul-e-pechaan dilkash ruup aur chaah-e-zanakhdaan sab hain 'sahar' saamaan-e-ajal"

"masaam-e-sang se us dam pasine khuun ke chalte hain kafan-bardosh jab ham ku-e-qaatil mein nikalte hain kahaan ahl-e-junun chhaanv mein zulfon ki Tahalte hain mashaqqat ki kaDi jab dhuup hoti hai to chalte hain tumhaari anjuman mein sirf farzaane bahalte hain junun ke hausle to jaa ke maqtal mein nikalte hain nasim-e-nau-bahaari aa tujhe gulshan mein pohnchaa dein ye sahraa hai yahaan to sirf divaane Tahalte hain hama-dam naa-khudaao baadbaanon pe nazar rakhnaa na jaane kab ye aab-e-tah-nashin tevar badalte hain vo hai kam-zarf jo do ghunT pi kar Dagmagaa jaae ham ‘aali-zarf jitnaa piite hain utnaa sanbhalte hain hamaaraa daaman-e-tar shaikh ke jubbe se kyaa kam hai ki is ''tar-daamani mein maghfirat ke diip jalte hain use andesha-haa-e-aabla-paai 'sahar' kyon ho vo jis ke naqsh-e-paa se anginat raste nikalte hain"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"