chaman-e-laala ye ulfat tiri dikhlaati hai — Meer Mohammadi Bedar

"tu ne jo kuchh ki kiyaa mere dil-e-zaar ke saath aag ne bhi na kiyaa vo to khas-o-khaar ke saath aankh uThaa kar bhi na dekhaa kabhi tu ne zaalim sar paTak mar gae laakhon tiri divaar ke saath ye kai taar hain vo rishta-e-jaan hai yaksar ghalat us zulf ki tashbih hai zunnaar ke saath raat din rahti hai juun dida-e-tasvir khuli aankh jab se lagi us aaina-rukhsaar ke saath dekhiyo gir na paDe diijo use ai qaasid dil-e-betaab lipaTtaa hai main tumaar ke saath kyaa ajab ye hai ki vo mujh se milaa rahtaa hai gul ko paivastagi laazim hai ki ho khaar ke saath hai sazaa-vaar agar aise ko diije dil-o-din ham bhi dekhaa use kal duur se 'bedaar' ke saath"

"jo tu ho paas to dekhun bahaar aankhon se vagarna karte hain gul kaar-e-khaar aankhon se kahaan hai tu ki mein khinchun huun raah mein teri bisaan-e-naqsh-e-qadam intizaar aankhon se zi-bas ki aatish-e-gham shola-zan hai siine mein girin hain ashk ki jaagah sharaar aankhon se main yaad kar dur-e-dandaan-e-yaar rotaa huun Tapakte hain guhar-e-aab-daar aankhon se Tuk aa ke dekh tu ai sarv-qad miraa ahvaal ravaan hai gham mein tire juebaar aankhon se chaDhaaun dasta-e-nargis mazaar-e-majnun par jo dekhun aaj main ru-e-nigaar aankhon se chaman mein kal koi tujh saa pari nazar na paDaa agarche dekhe hain jaa kar hazaar aankhon se huaa hai dida-e-'bedaar' gul-fishaan jab se giraa hai tab se ye abr-e-bahaar aankhon se"

"husn har naunihaal rakhtaa hai koi tujh saa jamaal rakhtaa hai mujh se ho tere jaur kaa shikva ye bhalaa ehtimaal rakhtaa hai tujh se kuchh apnaa arz-e-haal kare dil kab itni majaal rakhtaa hai maah kyaa hai ki jis se duun tashbih husn tu be-zavaal rakhtaa hai jite-ji us se aashiq-e-mahjur kab umid-e-visaal rakhtaa hai tu kahaan aur us kaa vasl kahaan ye khayaal-e-muhaal rakhtaa hai ji mein 'bedaar' tere milne kaa aah kyaa kyaa khayaal rakhtaa hai"

"nahin aaraam ek jaa dil ko aah kyaa jaane kyaa huaa dil ko ai butaan mohtaram rakho is ko kahte hain khaana-e-khudaa dil ko le to jaate ho mehrbaan lekin kiijo mat aap se judaa dil ko munh na pheraa kabhi jafaa se tiri aafrin dil ko marhabaa dil ko ye tavaqqo' na thi hamein hargiz ki dikhaaoge ye jafaa dil ko hain yahi Dhang aap ke to khair kyuun na phir dijiyegaa aa dil ko aakhir us tifl-e-shokh ne dekhaa TukDe juun shisha kar diyaa dil ko aaj lagti hai kuchh baghal khaali kaun siine se le gayaa dil ko ham to kahte hain tujh ko ai 'bedaar' kiijo mat us se aashnaa dil ko"

"paave kis tarah koi kis ko hai maqdur hamein le gayaa ishq tiraa khinch bahut duur hamein subh ki raat to ro ro ke ab aa ai be-mehr roz-e-raushan ko dikhaa mat shab-e-dijur hamein rabt ko chaahiye yak naua ki jinsiyyat yaan chashm-e-bimaar use hai dil-e-ranjur hamein baat gar kiije to hai banda-navaazi varna dekhnaa hi hai faqat aap kaa manzur hamein ulfat us shokh ki chhuTe hai koi jite-ji rakkho is pand se ai naaseho maazur hamein pi hai mai raat ko yaa jaage ho tum kuchh to hai aankhein aati hain nazar aaj to makhmur hamein yaan se 'bedaar' gayaa vo mah-e-taabaan shaayad nazar aataa hai ye ghar aaj to be-nur hamein"

"gayaa hai jab se dikhaa jalva vo pari-rukhsaar na khvaab dida-e-giryaan mein hai na dil ko qaraar hazaar rang se phule chaman mein go gulzaar par us baghair khush aati nahin mujhe ye bahaar ba-rang-e-laala-e-sar mai-kashi nahin tujh bin ki khun-e-dil se main har roz toDtaa huun khumaar gulon ke munh pe na ye rang-e-aab-o-taab rahe vo rashk-e-baagh kare gar udhar ko aa ke guzaar ajab nahin ki bahaa deve khaana-e-mardum rahe gar ashk-fishaan yunhi dida-e-khun-baar rihaai kyunki ho yaa-rab main is mein hairaan huun ki ek dil hai miraa tis pe dard-o-gham hai hazaar kahaa main us but-e-abru-kamaan ki khidmat mein khadang-e-jabr ne tere kiyaa hai mujh ko nigaar na rahm tere dil-e-sakht mein hai ghair-az-zulm na mere naala-e-jaan-soz mein asar ai yaar na taab hijr ki rakhtaa huun ne umid-e-visaal khudaa hi jaane ki kyaa hogaa us kaa aakhir-kaar har ek din mujhe yuun sujhtaa hai ji tan se nikal hi jaaegaa ham-raah-e-aah-e-aatish-baar na tu mazaar pe aavegaa taa-dam-e-mahshar rahegi dida-e-giryaan ko hasrat-e-didaar abas tu mujh ko Daraataa hai apne marne se hazaar tujh se mire mar gae hain aashiq-e-zaar ye sun ke kahne lagaa vo sitamgar-e-be-rahm miri balaa se jo mar jaaegaa tu ai 'bedaar'"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"