charaagh-e-mohabbat jalaane lage hain — Hamza Daim

"kab miri baat tu maanaa hai dil us kaa aashiq to zamaana hai dil yuun use dekh rahaa hai kab se kyaa tujhe jaan se jaanaa hai dil raat pahlu mein tire guzregi khvaab to sirf bahaana hai dil karnaa kuchh gham ki yahi duniyaa hai isi kaa naam zamaana hai dil ab muqaddar mein bhi qismat mein bhi sirf aansu hi bahaanaa hai dil vo tire paas hi to hai 'daaem' ab bataa de tu bataanaa hai dil"

"jurm ulfat ki mujhe khuub sazaa detaa hai khat ko paDhtaa bhi nahin aur jalaa detaa hai TuuT jaate hain sabhi aaina-khaane mere jab takhayyul tiri tasvir banaa detaa hai mere haakim ko bahut baar-e-garaan guzregaa koi zaalim hai jo zanjir hilaa detaa hai us ke aane ki mujhe jhuTi tasalli mat do ye dilaasa to miraa dard baDhaa detaa hai mere ahbaab ko kuchh sochnaa hogaa 'daaem' meraa dushman mujhe jiine ki duaa detaa hai"

"apni miTTi se yuun juDe hue hain chal rahe hain magar ruke hue hain daaeron mein safar kiyaa ham ne ham jahaan the vahin khaDe hue hain khud ko anmol kahne vaale ham ek pal ke evaz bike hue hain jhuTi ummid mat dilaao hamein in vafaaon ke ham Dase hue hain tum jahaan chhoD kar gae the hamein ham usi moD par khaDe hue hain"

"yuun to mushkil thaa tire saath guzaaraa karnaa par mire bas mein na thaa tujh se kinaaraa karnaa jaan hatheli pe dhare dauDe chale aaeinge bas hamein subh-e-vatan ek ishaara karnaa ek hi shakhs se kai baar mohabbat ki hai is ko kahte hain miri jaan khasaara karnaa yaad ab tak mujhe aataa hai shab-e-tanhaai vo tiraa mujh ko su-e-dasht pukaaraa karnaa ik nazar mujh pe bhi ho arz-o-samaa ke maalik teri qudrat mein hai patthar ko sitaara karnaa chaand kis baat ki hai tujh mein akaD bol zaraa shaah-e-taiba zaraa ungli kaa ishaara karnaa is ta'alluq ko mire paanv ki beDi na samajh mujh ko aataa hai mire dost kinaaraa karnaa main ki sahraa bhi huun dariyaa bhi huun jangal bhi huun mujh ko jis naam se marzi hai pukaaraa karnaa main mukammal thaa to dhutkaar diyaa thaa tu ne ab adhuraa huun adhure pe guzaaraa karnaa apne haathon pe liye baiThe ho aankhein 'daaem' kis ne bolaa thaa sar-e-tur nazaara karnaa"

"nafa nuqsaan dekhaa jaa rahaa hai mohabbat mein bhi sochaa jaa rahaa hai anaaein rehn rakkhi jaa rahi hain khudi ko aaj bechaa jaa rahaa hai miri maasum si kuchh khvaahishon ko sar-e-baazaar raundaa jaa rahaa hai koi suraj savaa neze pe laa kar miri himmat ko parkhaa jaa rahaa hai yahi kyaa kam hai teri aashiqi mein hamaaraa naam likkhaa jaa rahaa hai mohabbat ki sazaa paai hai 'daaem' miri saanson ko rokaa jaa rahaa hai"

"mohabbat ibtidaa mein hai jafaaein naa-munaasib hain tumhaare ruThne ki ye adaaein naa-munaasib hain ye shaayad umr aisi thi mohabbat ho gai mujh ko magar is umr mein itni sazaaein naa-munaasib hain tumhaare shahr se jaanaa muqaddar thaa so jhelaa hai magar is mein raqibon ki duaaein naa-munaasib hain abhi se hijr ki talkhi mein mar jaaungaa jaan-e-jaan abhi mausam vafaa kaa hai jafaaein naa-munaasib hain inhi taarikiyon mein zinda rahne kaa hunar sikho diye ko mat jalaao tum havaaein naa-munaasib hain ye sher-o-shaaeri 'daaem' ye ishq-o-aashiqi 'daaem' miri maano tumhaari ye adaaein naa-munaasib hain"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"jaagte hi nazar akhbaar mein kho jaati hai zindagi dard ke ambaar mein kho jaati hai naa-khudaa aql ke patvaar uThaataa hai ki jab kashti-e-dil miri manjdhaar mein kho jaati hai be-sabab sochne vaale kabhi sochaa tu ne aagahi kasrat-e-afkaar mein kho jaati hai uDte rahte hain khayaalaat ke jugnu phir bhi baat kyuun parda-e-izhaar mein kho jaati hai us ke kaamon kaa hai rangin khushaamad pe madaar aur mehnat miri isaar mein kho jaati hai hurmat-e-parda zaruri hai 'ataa-ji' varna chiiz jaisi bhi ho baazaar mein kho jaati hai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"