de aayaa apni jaan bhi darbaar-e-ishq mein — Ashraf Shad

"jo zindagi bachi hai use khaar kyaa karein ham bhi tumhaare hote magar yaar kyaa karein hain band sab dukaanein ki baazaar-e-ishq mein miltaa nahin hai ham saa kharidaar kyaa karein laDte rahe havaa se jalaate rahe charaagh ab aur raushni ke talabgaar kyaa karein ahbaab chal diye tire darbaar ki taraf aur ham ki aa gae hain sar-e-daar kyaa karein sidhi si baat ye hai hamein tum se pyaar hai sheron mein is khayaal ki takraar kyaa karein ham jaan de chuke hain kai baar ishq mein ab ye bataao 'shaad' ki is baar kyaa karein"

"un se milaa to phir main kisi kaa nahin rahaa aur jab bichhaD gayaa to khud apnaa nahin rahaa divaar TuTne kaa ajab silsila chalaa saayon ke sar pe ab koi saaya nahin rahaa har ik makaan se naam ki takhti utar gai dil ki fasil pe koi pahra nahin rahaa rahbar badal gae kabhi rahzan badal gae aur ham-safar bhi koi puraanaa nahin rahaa ab us ke husn mein vo karishme nahin rahe taali to baj rahi hai tamaasha nahin rahaa shaayad paDos mein kahin bijli giri hai aaj dekho hamaare ghar mein andheraa nahin rahaa dimak lagi hui hai salibon pe shaad ab rasm-e-junun nibaahane vaalaa nahin rahaa"

"thiin zaminein gum-shuda aur aasmaan miltaa na thaa sar pe suraj thaa mire par saaebaan miltaa na thaa be-natija hi rahi hai har safar ki justuju DhunDne nikle the jis ko vo jahaan miltaa na thaa manzilein aasaan thiin aur raaste makhdush the kashtiyaan maujud thiin par baadbaan miltaa na thaa ghonsle khaali paDe hain aur vahin par aas paas kuchh parinde the ki jin ko aashiyaan miltaa na thaa gardish-e-dauraan mujhe phir ab vahin le aai hai shahr jo meraa thaa lekin ham-zabaan miltaa na thaa"

"nikli vo zindagi se to paamaal ho gayaa jaise ruvaan ruvaan miraa kangaal ho gayaa bigDaa huaa hai hijr mein kuchh vaqt kaa nizaam lamha guzar na paayaa ki ik saal ho gayaa mushkil hai ye hisaab kai hijraton ke baa'd achchhaa hai meraa haal ki bad-haal ho gayaa bas yuun hi ik ghazal si use dekh kar hui phir is ke baa'd pyaar kaa janjaal ho gayaa main jab gulaab chuum rahaa thaa to dekh kar chehra kisi kaa sharm se kyuun laal ho gayaa"

"chaand taaron se bharaa ye aasmaan de jaaungaa khud rahungaa dhuup mein aur saaebaan de jaaungaa mere achchhe ham-safar tujh ko bhi main jaate hue raah se bhaTkaa huaa ik kaarvaan de jaaungaa hain zulekhaaein bahut koi bhi yusuf ho to main misr ke baazaar mein us ko dukaan de jaaungaa jis ne toDaa dil miraa aur khvaab kirchi kar diye us ko shishe kaa banaa main ik makaan de jaaungaa mere saahil par rukeingi jis nazar ki kashtiyaan us ki palkon ko nayaa ik baadbaan de jaaungaa dushmanon ke saamne to be-khatar jaaungaa 'shaad' tiir un ke toD kar phir ik kamaan de jaaungaa"

"taavil-e-ahd-e-fan hi to vahshat kaa hal nahin pesh-e-nazar junun hai yaaro ghazal nahin ab is ke baad ahd ki taarik raat hai ye ikhtitaam-e-shaam hai subh-e-azal nahin ai dost ishq mansab-e-fahm-o-shuur hai ye irtiqaa hai zehn kaa koi khalal nahin ik umr ratjagon ki aziyyat mein kaaT di ab mere khvaab niind kaa radd-e-amal nahin kyaa kyaa ataa-e-neamat-e-rabb-e-karim hai lekin 'samir' dard kaa nemul-badal nahin"

"bahut shaadaab ho lekin bayaabaani nahin jaati ki baam-e-auj chhune se bhi arzaani nahin jaati kai chehron ne aavaazon ne dil aabaad rakkhaa hai magar aankhon mein raqsaan hai jo viraani nahin jaati mujhe apni numu ke vaaste tum se bichhaDnaa hai tumhaare saath rahne se tan-aasaani nahin jaati main is dil ki sabhi sachchaaiyaan taslim kartaa huun magar ik baat aisi bhi hai jo maani nahin jaati hujum-e-shor-o-ghul mein kaun thaa kis ne pukaaraa thaa yahaan to apni bhi aavaaz pahchaani nahin jaati 'samir' is ishq mein insaan kyaa itnaa badaltaa hai main khud par ghaur kartaa huun to hairaani nahin jaati"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"ba-zom-e-aql ye kaisaa gunaah main ne kiyaa ik aainaa thaa usi ko siyaah main ne kiyaa ye shahr-e-kam-nazaraan ye dayaar-e-be-hunaraan kise ye apne hunar kaa gavaah main ne kiyaa harim-e-dil ko jalaane lagaa thaa ek khayaal so gul use bhi ba-yak sard aah main ne kiyaa vahi yaqin rahaa hai javaaz-e-ham-safari jo gaah us ne kiyaa aur gaah main ne kiyaa bas ek dil hi to hai vaaqif-e-rumuz-e-hayaat so shahr-e-jaan kaa use sarbaraah main ne kiyaa har ek ranj usi baab mein kiyaa hai raqam zaraa saa gham thaa jise be-panaah main ne kiyaa ye raah-e-ishq bahut sahl ho gai jab se hisaar-e-zaat ko paivand-e-raah main ne kiyaa ye umr ki hai basar kuchh ajab tavaazun se tiraa huaa na hi khud se nibaah main ne kiyaa khirad ne dil se kahaa tu junun-sifat hi sahi na puchh us ki ki jis ko tabaah main ne kiyaa"

"kis ajab saaat-e-naayaab mein aayaa huaa huun tujh se milne main tire khvaab mein aayaa huaa huun phir vahi main huun, vahi hijr kaa dariyaa-e-amiq koi dam aks-e-sar-e-aab mein aayaa huaa huun kaise aaine ke maanind chamaktaa huaa main ishq ke shahr-e-abad-taab mein aayaa huaa huun meri har taan hai az-roz-e-azal taa-ba-abad ek sur ke liye mizraab mein aayaa huaa huun koi parchhaain kabhi jism se karti hai kalaam? be-sabab saaya-e-mahtaab mein aayaa huaa huun har guzarte hue lamhe mein Tapaktaa huaa mein dard huun, vaqt ke aasaab mein aayaa huaa huun kaisi gahraai se niklaa huun adam ki 'irfaan' kaise paayaab se taalaab mein aayaa huaa huun"

"hijaab vaalon se vo be-hijaab ho na sakaa vo saamne thaa magar be-naqaab ho na sakaa vajud-e-khaak kaa insaan khitaab ho na sakaa ye zarra ghair-e-karam aaftaab ho na sakaa karam vo tuur pe ik be-niyaaz-e-jalva par vo be-niyaazi thi jis kaa javaab ho na sakaa uThaa ke parda chhupaa kasrat-e-tajalli mein vo be-naqaab huaa be-naqaab ho na sakaa tamaam umr rahe dekhte hayaat ke khvaab hamaari aankhon mein ye khvaab khvaab ho na sakaa rahi fareb-e-tasavvur ye raftani duniyaa saraab jaise kabhi ju-e-aab ho na sakaa zamir zaahir-o-baatin se ho gayaa aagaah kharaab baada-e-irfaan kharaab ho na sakaa mire karim ne bakhshaa isi bahaane se mire gunaahon kaa jab kuchh hisaab ho na sakaa abhi kami hai tire zauq-e-ishq mein 'aiman' lahu huaa tiraa aansu sharaab ho na sakaa"