ham jinhein haal-e-dil-e-zaar sunaane nikle — Hasan Nawab Hasan

"khushaa-qismat tumhein is dil mein mehmaan kar diyaa ham ne tum aae to bayaabaan ko gulistaan kar diyaa ham ne miri viraani-e-dil par ye ik ehsaan tumhaaraa hai tum utre dil mein jab dil ko bayaabaan kar diyaa ham ne chaman ki tirgi jab ho gai bardaasht se baahar nasheman phunk kar apnaa charaaghaan kar diyaa ham ne miri divaangi phir bhi na raas aai zamaane ko dikhaane zakhm-e-dil chaak-e-garebaan kar diyaa ham ne taghaaful mein zarur us ke rahin majburiyaan shaamil isi khush-fahmi se jiine kaa saamaan kar diyaa ham ne mohabbat kaa bhram qaaem rahaa furqat mein khush rah kar 'hasan' khud par bhi un par bhi ye ehsaan kar diyaa ham ne"

"tu hi tu hai main jidhar dekhun jahaan tak dekhun main faqat ek hi tasvir kahaan tak dekhun dil mein khud apne basaa kar bhi yahi kahte ho main faqat ek hi tasvir kahaan tak dekhun taab-e-nazzaara kahaan itnaa ki sab kuchh dekhun dida-e-binaa jahaan tak hai vahaan tak dekhun kuchh to badle sahar-o-shaam ki gardish yaa-rab kuchh nai rut nae mausam ke samaan tak dekhun gardish-e-zist bhi hai gardish-e-ayyaam ke saath tu hi batlaa de ye gardish main kahaan tak dekhun zindagi kaa ye taqaaza ki ho is se bartar 'aql kahti hai faqat sud-o-ziyaan tak dekhun kaise dekhun jo 'hasan' hadd-e-nazar se hai pare us se haasil hai bhalaa kyaa jo 'ayaan tak dekhun"

"na to jiine ko na mar jaane ko ji chaahtaa hai kyaa kahun kyaa miraa kar jaane ko ji chaahtaa hai kuchh bhi to aisaa nahin jis se sukun dil ko mile in dinon yuun hai ki mar jaane ko ji chaahtaa hai'' na to saahil pe khaDe rahne se kuchh haasil hai aur na paani mein utar jaane ko ji chaahtaa hai bazm mein un ki ho jaanaa to jhijhaknaa kaisaa mat ruko jaao agar jaane ko ji chaahtaa hai zulf hai apni pareshaan to vo aaina-ru saamne rakh ke sanvar jaane ko ji chaahtaa hai had muqarrar ho jahaan 'ishq ki vo 'ishq nahin aaj to had se guzar jaane ko ji chaahtaa hai na 'hasan' apnaa na begaana ho divaana jahaan usi sahraa se guzar jaane ko ji chaahtaa hai"

"anaa ki aag mein har lamha jal rahaa huun main ghizaa miri hai yahi is mein pal rahaa huun main kabhi is aag ke saanche mein Dhal rahaa huun main kabhi ye barf ki jis mein pighal rahaa huun main har ek subh ufuq se nikal rahaa huun main shafaq mein apni har ik shaam Dhal rahaa huun main har ek moD pe rasta kuchal rahaa huun main ki apne qadmon se khud ko kuchal rahaa huun main main apne zindaan mein qaidi banaa gayaa khud ko aur apne aap se bach kar nikal rahaa huun main koi to bachcha 'hasan' hai chhupaa huaa mujh mein ki jis ki maang pe har dam machal rahaa huun main"

"na vo zamin mein thaa aur na aasmaan mein thaa kabhi yaqin mein mire thaa kabhi gumaan mein thaa main ek jaal liye umr bhar bhaTaktaa rahaa parinda duur bahut duur aasmaan mein thaa main roz ghar se nikaltaa thaa DhunDne ke liye makin ban ke vo khud mere hi makaan mein thaa main kaash band dariche se jhaank hi letaa vo mere kamre ke andar hi saaebaan mein thaa adhuraa paDh ke use log rah gae varna hamaaraa zikr bhi kuchh us ki daastaan mein thaa khataa khud apni nigaahon ki thi 'hasan' varna vo mere jism mein thaa vo to meri jaan mein thaa"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"