hamin the joDne vaale hamin haTaae gae — Govind Gulshan

"hamein ab dil koi surat kisi ke naam karnaa hai agar nilaam hotaa hai to phir nilaam karnaa hai chaman mein zikr jis kaa khushbuein karti hain phulon se usi kaa zikr ham ko ab sahar-taa-shaam karnaa hai Thahr to jaa zaraa suraj mire hi saath chalnaa tu abhi kuchh der mujh ko chhaaon mein aaraam karnaa hai hamein shohrat mili itni ki jiinaa ho gayaa mushkil ye tai ham ne kiyaa hai khud ko ab gumnaam karnaa hai unhein ham se mohabbat thi mohabbat hai unhein ham se isi jhuTi kahaani ko nagar mein 'aam karnaa hai"

"kaun apnaa hai ye chehron se nahin jaante hain ham to naa-binaa hain aavaaz se pahchaante hain ghuum lete hain jahaan bhar mein kahin jaae baghair ham vo aavaara hain jo khaak nahin chhaante hain baat niklegi jo munh se to bikhar jaaegi aap is shahr ke logon ko nahin jaante hain saamnaa karte hain tufaan kaa ji-jaan se ham ham safine pe kabhi paal nahin taante hain jhuuT ham bolein munaasib to nahin lagtaa magar sach agar saaf kahein log buraa maante hain"

"aavaaz suni meri na rudaad kisi ne tarjih na di mujh ko tire baa'd kisi ne parvaaz se us ki ye gumaan ho to rahaa thaa pinjre se kiyaa hai use aazaad kisi ne aataa hi nahin saamne parde se nikal kar vaise use dekhaa bhi hai ik-aadh kisi ne aankhon mein ubhar aayaa usi vaqt koi 'aks jis vaqt kiyaa mujh ko kahin yaad kisi ne daaman miraa khushiyon se sharaabor hai yaa'ni ki hogi mire vaaste fariyaad kisi ne is shahr kaa afsaanaa koi khaas nahin hai aabaad kisi ne kiyaa barbaad kisi ne"

"vahaan charaagh yahaan raushni kaa saaya hai safar ke baa'd ujaalaa qarib aayaa hai uDaa huaa hai bahut rang us ke chehre kaa ye tab hai raaz se pardaa nahin haTaayaa hai vo ek chaand sabhi ke liye hai aur ik chaand khudaa ne sirf hamaare liye banaayaa hai sisak rahi thiin baDi der se lavein khud hi charaagh tez havaa ne kahaan bujhaayaa hai bas ek ruuh se vaabastagi hai duniyaa mein ye apnaa jism bhi apnaa nahin paraayaa hai"

"jahaan tak aasmaan phailaa huaa hai usi kaa saaibaan phailaa huaa hai na jaane kab jalaa thaa aashiyaana magar ab tak dhuaan phailaa huaa hai haqiqat saamne aae to kaise gumaan ye hai gumaan phailaa huaa hai main pichhe rah gayaa huun aur aage ghubaar-e-kaarvaan phailaa huaa hai bataaun kyaa samundar ki haqiqat saraabon mein bayaan phailaa huaa hai"

"dil mein ye ek Dar hai baraabar banaa huaa miTTi mein mil na jaae kahin ghar banaa huaa ik lafz bevafaa kahaa us ne phir is ke baa'd main us ko dekhtaa rahaa patthar banaa huaa jab aansuon mein bah gae yaadon ke saare naqsh aankhon mein kaise rah gayaa manzar banaa huaa lahro! bataao tum ne use kyuun miTaa diyaa khvaabon kaa ik mahal thaa yahaan par banaa huaa vo kyaa thaa aur tum ne use kyaa banaa diyaa itraa rahaa hai qatra samundar banaa huaa"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"