ho rang-e-shafaq jaise rukh-e-shaam mein utraa — Ambar Abid

"jaan jaati nahin aur jaan se guzar jaate hain ham judaai ke bhi ehsaas se mar jaate hain jin ko taariki mein raaton ki munavvar dekhaa subh hoti hai to phir jaane kidhar jaate hain jab bhi khuddaari ki divaar ko Dhaanaa chaahein apne andar ki sadaa sun ke Thahar jaate hain raaste us ne yuun taqsim kiye the 'amabar' ab udhar jaanaa hai tum ko ham idhar jaate hain"

"faisla koi mire haq mein huaa hai shaayad mausam-e-gul mire aangan mein rukaa hai shaayad muddaton baad kiyaa raabta us ne to lagaa us ko ehsaas-e-peshemaani huaa hai shaayad aao ik baar kitaabon ko khangaalaa jaae phuul jo us ne diyaa thaa vo rakhaa hai shaayad naghma-zan taar-e-nafas mein hain usi ki yaadein dhaDkanon mein bhi vahi bol rahaa hai shaayad us se pahle saa ravaabit mein tasalsul na rahaa darmiyaan donon ke ab koi khalaa hai shaayad vaqt-e-rukhsat bhi na chehre pe shikan thi us ke saaf zaahir thaa vo kuchh soch chukaa hai shaayad ratjage karvaTein bechaini udaasi uljhan us ki yaadon kaa varaq koi khulaa hai shaayad muztarib kitne hi sajde hain jabin par meri maabad-e-ishq mein vo jalva-numaa hai shaayad vaadi-e-jism burudat se dahak uThi hai fasl-e-baaraan ki havaaon ne chhuaa hai shaayad baarhaa mushkilein ho jaati hain aasaan 'amabar' tere haq mein bhi kisi lab pe duaa hai shaayad"

"jo chhaanv detaa hai mujh ko ghanaa shajar ban kar main us kaa saath nibhaati huun us kaa ghar ban kar fazaa-e-ilm-o-hunar raas aa gai hai mujhe khudaa kare ki rahun harf-e-mo'tabar ban kar tu chaand hai to duaa hai kabhi ghurub na ho ufuq mein main bhi rahun matla-e-sahar ban kar ghalat samajhti thi main us ko raazdaan apnaa jo ek saaya saa ubhraa thaa ham-safar ban kar ummid-o-bim se jab aazaad ho gai 'amabar' to kaamyaab hui saahib-e-nazar ban kar"

"ulfaton ke saaghar mein saazishein milaate hain dosti ke parde mein dushmani nibhaate hain khaak kar ke baiThe hain aashiyaan hamin apnaa bijliyaan dikhaa kar yuun aap kyaa Daraate hain shaam tere maathe pe raat yuun ibaadat hai jugnu bhi chamakte hain taare jhilmilaate hain koi jaane vaale ko kis tarah ye samjhaae vaapsi mein din itne aap kyon lagaate hain shor sun ke baarish kaa dil machal saa jaataa hai bhige bhige phulon se ham lajaa se jaate hain fikr bhi hai jazba bhi ranj bhi khushi bhi hai shaairi nahin ham to haal-e-dil sunaate hain mushkilon se sikhaa hai ham ne ye hunar 'amabar' raaste judaa apne kis tarah banaate hain"

"charaagh jal to rahaa hai ziyaa nahin aati havaa bhi tez hai lekin havaa nahin aati ajiib hijr kaa aalam hai kyaa kiyaa jaae sivaae dil ke kisi ki sadaa nahin aati tavaqquaat ki chaadar sameT lete hain hamaare lab pe kabhi badduaa nahin aati tumhaare ishq ne bakhshi hai bekali garche vafaa ki raah mein ham ko jafaa nahin aati siyaah ho gayaa dil us kaa is qadar ab to ki be-hayaai pe apni hayaa nahin aati hayaa hijaab pe karte hain tabsire 'amabar' saron pe jin ke kabhi bhi ridaa nahin aati"

"lafz mil jaaein to ash’aar ki tashkil karun varna kis tarah khayaalaat ki tarsil karun haq mohabbat kaa kahaan hotaa hai marne se adaa haq to ye hai ki tujhe ruuh mein tahlil karun aap to apni anaa se nahin nikle baahar mujh se kahte hain ki main nazriya tabdil karun tishnagi to hai miri zaat mein sahraa ki tarah kaise sukhi hui aankhon ko bhalaa jhiil karun jab anaa hai miri rag rag mein saraayat 'ambar' kis tarah us ke har ik hukm ki taamil karun"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"