jab se mere baagh mein angur ke daane lage — Jameel Usman

"ye zindagi azaab agar ho to kyaa karein ik talkh si sharaab agar ho to kyaa karein tum se hamaare qalb o nazar kaa muaamla ik vajh-e-iztiraab agar ho to kyaa karein sidq-o-safaa ki aarzu ab kyaa kare koi band aagahi kaa baab agar ho to kyaa karein fitrat mein jis ki roz-e-azal se hijaab hai vo husn be-hijaab agar ho to kyaa karein rukh ko tumhaare chaand se tashbih de to dein gahnaayaa maahtaab agar ho to kyaa karein ham raaz-e-dil chhupaate magar apni zindagi puuri khuli kitaab agar ho to kyaa karein kar li hai tauba ham ne magar dukhtar-e-enab masjid mein dastiyaab agar ho to kyaa karein"

"tohfa-e-sher-o-sukhan laae hain hadiya-e-tauba-shikan laae hain aap ki bazm mein a ham-sukhano apnaa sarmaaya-e-fan laae hain sher kuchh laae hain jiddat-aamez kuchh ba-andaaz-e-kuhan laae hain rang-o-aahang ke gul-daste mein phuul kyaa saaraa chaman laae hain sher ki shakl mein qirtaas pe ham gauhar-o-laal-e-yaman laae hain dil-figaari ke sanam-khaane mein dil-navaazi kaa chalan laae hain lafz mein nikhat-e-gul Dhaal ke ham dasht-e-ghurbat mein vatan laae hain aaj ki tira-shabi mein yaaro nuur ki ek karan laae hain"

"badlegi kaaenaat miri baat maan lo mujh se milaao haat miri baat maan lo ham se qadam milaa ke chaloge to dekhnaa sar honge shash-jahaat miri baat maan lo bigDi hui jo baat baDi muddaton se hai ban jaaegi vo baat miri baat maan lo hai zindagi baghair tumhaare ik iztiraab de do ise sabaat miri baat maan lo kis ne kahaa hai tum se ki taa-umr saath do hai chaar din ki baat miri baat maan lo piinaa paDe kahin na tumhein bhi miri tarah talkhaaba-e-hayaat miri baat maan lo main jaantaa huun meri tarah chaahti ho tum tanhaai se najaat miri baat maan lo"

"so jaaiye huzur ki ab raat ho gai jo baat hone vaali thi vo baat ho gai ab kahne sunne ke liye kuchh bhi nahin rahaa bas itnaa kaafi hai ki mulaaqaat ho gai thoDi si der is mein hui to zarur hai lekin qubul apni munaajaat ho gai ham biij bo ke su-e-falak dekhte rahe aur dekhte hi dekhte barsaat ho gai apnon mein haar jiit ke maani hi aur hain khush huun bahut ki un se mujhe maat ho gai"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"choT par choT khaa rahaa huun main 'aadatan muskuraa rahaa huun main us ke uupar to kuchh asar hi nahin apnaa dil kyon jalaa rahaa huun main aaj tanhaai mein jo baiThe ho kyaa tumhein yaad aa rahaa huun main kaun aaegaa mujh se milne ko apnaa ghar kyon sajaa rahaa huun main aaj ji bhar ke dekh lo mujh ko ab bahut duur jaa rahaa huun main kyaa tumhein ab bhi kuchh shikaayat hai ab to sab kuchh kamaa rahaa huun main haath mein Digriyaan sajaae hue Thokarein kitni khaa rahaa huun main ab mujhe peT in se bharnaa hai ye jo khanjar banaa rahaa huun main kal koi is ko bhi na chhoDegaa ye jo paudaa lagaa rahaa huun main"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"