kabhi hamaare liye tegh-e-be-niyaam karo — Habab Hashmi

"kise bataaein ki zaad-e-safar gayaa kab kaa rahaa hi kyaa hai gham-e-mo'tabar gayaa kab kaa mujhe bhi dekh ki main ek naqsh-e-hairat huun dikhaa ke aaina aaina-gar gayaa kab kaa talaash sahraa-ba-sahraa jise kiyaa main ne vo meri ruuh ke andar utar gayaa kab kaa duaa rahin-e-asar hai ye baat sach hai magar miri duaa se yaqinan asar gayaa kab kaa na sang-e-mil na jaada na koi manzil-e-shauq akelaa main huun miraa ham-safar gayaa kab kaa koi umiid na khvaahish na aarzu baaqi ki mere jism kaa insaan mar gayaa kab kaa 'habaab' ek tanaavar darakht thaa main bhi pa TuuT TuuT ke aakhir bikhar gayaa kab kaa"

"kahaan vo sim-tanaan hain kahaan vo gul-badanaan aziz-az-dil-o-jaan hai hadis-e-laala-rukhaan ye ham se puchho jalaal-o-jamaal kyaa shai hai hamaare gird rahaa hai hujum-e-maah-vashaan miri nigaah ko hai diid ki kahaan fursat hain yuun to jalve hi jalve fazaa mein raqs-kunaan sukun hai kaar-gah-e-zist mein kahaan yaaro kashaan-kashaan liye phirti hai gardish-e-dauraan yahaan to saans bhi lene mein ehtiyaat hai shart ba-qaul 'mir' ye hai kaar-gaah-e-shisha-garaan 'habaab' apne vatan se to duur huun lekin nigaah mein hain sabhi dostaan-e-zinda-dilaan"

"zarra zarra hai ise mehr-e-munavvar na kaho qatra har haal mein qatra hai samundar na kaho but-e-tannaaz ko ikhlaas kaa paikar na kaho dushman-e-mehr-o-vafaa ko fan-e-aazar na kaho kahin phuTi hai kabhi un se vafaa ki khushbu lab-e-maashuq ko auraaq-e-gul-e-tar na kaho rang aur nasl ki tafriq miTaane ke liye maslahat hai ise behtar use kamtar na kaho gham ki jab aanch lagegi to pighal jaaegaa dil to ik shisha hai is shishe ko patthar na kaho saath taqdir ke tadbir zaruri hai 'habaab' bigDe haalaat ko tum apnaa muqaddar na kaho"

"kyaa huaa rangini-e-subh-o-masaa baaqi nahin apne hi ghar mein vo pahli si fazaa baaqi nahin aarzuon kaa koi bhi silsila baaqi nahin masala ye hai ki koi masala baaqi nahin aa gayaa hai ab savaa neze pe dekho aaftaab apnaa saaya bhi zamin par zer-e-paa baaqi nahin manzilein aavaaz deti hain ki ham hain muntazir qaafile vaalon mein lekin hausle baaqi nahin be-mahaabaa us ke aane kaa natija ye huaa aaina-khaane mein koi aaina baaqi nahin kitni mashshaaqi se us ne saaf do TukDe kiye jism mein ab ek bhi tasma lagaa baaqi nahin ham to chhoD aae the gahre naqsh raahon mein 'habaab' vaae-hasrat ek bhi ab naqsh-e-paa baaqi nahin"

"jalva-gar aaj hai vo mehr-e-munavvar ki tarah bakht apnaa bhi chamaktaa hai sikandar ki tarah us ki raftaar hai bas mauja-e-kausar ki tarah guftugu mein hai khanak shisha-o-saaghar ki tarah kis ko yaaraa-e-sukhan hai use ham bhi dekhein vo mukhaatab hai magar daavar-e-mahshar ki tarah kyaa khabar log kise apnaa khudaa kah deinge laakh but ham ne taraashe to hain aazar ki tarah kis pe is daur-e-pur-aashob mein takiya kiije raahzan bhi to nazar aate hain rahbar ki tarah manzil-e-faqr-o-ghinaa kyaa hai ye ham se puchho zindagi ham ne guzaari hai qalandar ki tarah kitne tufaan hain pinhaan koi dekhe to 'habaab' maujzan hai dil-e-shaair bhi samundar ki tarah"

"khud pe vo fakhr-kunaan kaisaa hai us ko apne pe gumaan kaisaa hai koi jumbish hai na aahaT na sadaa ye jahaan-e-guzaraan kaisaa hai dil dhaDakne ki bhi aavaaz nahin saaneha kaahish-e-jaan kaisaa hai aaj tak zakhm hare hain dil ke marham-e-chaara-garaan kaisaa hai us se nazdik nahin hai koi vo qarib-e-rag-e-jaan kaisaa hai gul khulaa hi gai lailaa-e-bahaar shor-e-aashufta-saraan kaisaa hai ham kaDi dhuup ke aadi the 'habaab' sar pe ye abr-e-ravaan kaisaa hai"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"