khaTak rahi hai ghuTan ki ye bud-o-baash mujhe — Aftab Khan

"agar jafaa hai gunah vo gunaahgaar banaa main bas vafaa ke amal mein sharik-e-kaar banaa yahi hamaari aqidat ki intihaa hai miyaan jahaan charaagh jalaayaa vahaan mazaar banaa vo bad-nasib hai is vaqt mujh ko chhoD gai jab us ke gird mohabbat kaa ik hisaar banaa vo jis ne mere liye mushkilein khaDi ki thiin vahi hujum-e-havaadis kaa khud shikaar banaa mujhe vo saunp gayaa hijr-e-baad-e-sar-sar kyon usi ke dam se ye mausam thaa khush-gavaar banaa sabhi ki tarah karo tum bhi is pe mashq-e-sitam ye dil to TuuT ke pahle bhi baar baar banaa suno baghaur kisi roz 'aaftaab'-e-sukhan vo shaaeri ke taqaddus kaa eatibaar banaa"

"ajiib dukh hai ye kis ranj mein paDaa huun abhi bichhaD ke us se shash-o-panj mein paDaa huun abhi vo ik gudaaz bharaa lams mujh se duur huaa so us ke dast-e-apaahanj mein paDaa huun abhi koi nikaal ke mujh ko taraash saktaa hai main ek sang kisi ganj mein paDaa huun abhi biThaa ke saath koi ghuD-savaar le jaae main ik piyaada huun shatranj mein paDaa huun abhi kisi bhi sud-o-ziyaan kaa hisaab ho na sakaa ajab tarah ke khafi banj mein paDaa huun abhi"

"kuchh nahin shaam suhaani ye khulaa hai mujh par chaar din ki hai javaani ye khulaa hai mujh par jhuuT bolun to malaamat mujhe kartaa hai zamir pi ke lahore kaa paani ye khulaa hai mujh par main use apni samajhtaa rahaa mumtaaz mahal vo to hai aur ki raani ye khulaa hai mujh par us ne aaghaaz-e-mohabbat mein mujhe saunp diyaa hijr hai us ki nishaani ye khulaa hai mujh par ab to ehsaas-o-muravvat kaa zamaana hi nahin mar gayaa aankh kaa paani ye khulaa hai mujh par ik haqiqat kaa bayaan sher mein karnaa hai mujhe ik haqiqat hai chhupaani ye khulaa hai mujh par"

"udaas kar ke mujhe muskuraa rahi ho tum kahaan ki iinT kahaan ab lagaa rahi ho tum fishaar-e-khun to pahle bhi kab hai qaabu mein kyon is pe aur dabaao baDhaa rahi ho tum go ikhtiyaar ki hai be-rukhi bahut din se gudaaz-e-dil ko magar gudgudaa rahi ho tum bahut nafis qarine hain vaar karne ke fareb-e-husn ke fitne jagaa rahi ho tum tumhein zaraa bhi lagaavaT na vasl se thi kabhi so mere hijr mein aansu bahaa rahi ho tum na tum ko farq hai maalum ishq-o-aatish kaa jo 'aaftaab' se nazrein milaa rahi ho tum"

"vo jaagtaa hai abhi tak ghunud mein hai kahaan kami thakan ki magar is vajud mein hai kahaan kare ruku to Taangon pe kapkapi chhaae vo valvala vo javaani sujud mein hai kahaan main apne paanv ki miTTi pe jam ke baiThaa huun jo meraa kunj hai teri hudud mein hai kahaan ye lutf-e-khaak-nashini bhi aarzi shai hai ki mustaqil si baqaa hast-o-bud mein hai kahaan main apnaa kar ke khasaaraa huun mutmain jaise vo nafaa mujh ko milaa tere suud mein hai kahaan sulag rahaa hai jigar khushk lakDiyon ki tarah dhuaan jo dil se uThaa aur duud mein hai kahaan karo talaash mazaamir-e-gum-shuda phir se mazaa vo un saa kisi bhi surud mein hai kahaan zamin se taa-ba-falak 'aaftaab' chhaayaa hai hunar ye aur kisi ke vajud mein hai kahaan"

"niklaa huun tan-badan kaa buraada liye hue lapki hai aankh aankh tamaashaa liye hue jaane unhein hai dast-shanaason ne kyaa kahaa phirte hain log haath mein kaasa liye hue saDkon pe in dinon hai qayaamat kaa ik samaan sab jaa rahe hain khvaab kaa laasha liye hue jannat se is liye hai nikaalaa gayaa tumhein phailo zamin pe nasl-e-tavaanaa liye hue do chaar ahl-e-zauq mujhe mil gae vahaan pahunchaa jahaan adab kaa asaasa liye hue dildaar baazuon mein samaaegaa laaziman ghar se chalo jo pukhta iraada liye hue us bevafaa ki baat kabhi Taaltaa nahin aae yahaan ho jis kaa havaala liye hue suntaa hai 'aaftaab' jahaan ishq ki pukaar jaataa vahin hai dil kaa khazaana liye hue"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"