khuli jab aankh to dekhaa ki thaa baazaar kaa halqa — Abdul Mannan Tarzi

"kyaa yahaan dekhiye kyaa vahaan dekhiye aap hi aap hain ab jahaan dekhiye ghar jalaa dekhiye vo dhuaan dekhiye aag pahunchi kahaan se kahaan dekhiye dekhiye taa-kamar zulf kaa shoabada uljhanein ban gaiin daastaan dekhiye mujh ko maa'lum hai aap maa'sum hain jal gayaa hogaa yuun hi makaan dekhiye bujh gai shama parvaane rukhsat hue luT gayaa shauq kaa kaarvaan dekhiye 'ishq roz-e-azal se mataa-e-yaqin husn hai aaj bhi bad-gumaan dekhiye aaiye mere dil mein bhi vaqt-e-ghazal ek dariyaa-e-aatish ravaan dekhiye husn ki ehtiyaat-e-hasin dekh kar 'ishq kaa iltihaab-garaan dekhiye is tamaashe kaa jab aap ko shauq hai ham jalaate hain apnaa makaan dekhiye ismat-e-dil hai aur gham kaa aatish-kada aag ban jaaegi gulsitaan dekhiye ishtiyaaq-e-jabin apnaa dekheinge ham aap viraani-e-aastaan dekhiye aap ke saamne aur taab-e-sukhan khush-bayaan kitne hain be-zabaan dekhiye tuur hi ki tarah jal na jaae kahin jalva-baari se pahle makaan dekhiye ramz-o-imaa ghazal ki agar jaan hain aap 'tarzi' kaa husn-e-bayaan dekhiye"

"marhala shauq kaa hai lafz-o-bayaan se aage ek shoala hai koi barq-e-tapaan se aage apni hairat kaa to hai ilm yaqin se pahle tu bataa mujh ko hai kyaa mere gumaan se aage haan miraa shauq-laqaa teri inaayat hi sahi kyaa milaa mujh ko magar ijz-e-bayaan se aage kyuun banaa Daalaa ise meri nigaahon kaa ghurur teraa jalva hai agar husn-e-butaan se aage apni khalvat se kabhi tu bhi na baahar jhaankaa mujh ko jaane na diyaa mere makaan se aage kuchh nahin is ke sivaa apni nigaahon ki bisaat kuchh dikhaai na diyaa sud-o-ziyaan se aage fahm-o-idraak pe bhi mere hai pahraa teraa aur tu saare makaan saare zamaan se aage imtihaan khatm nahin hotaa isi par 'tarzi' ju-e-khun laani hai ik ashk-e-ravaan se aage"

"jab bhi gulshan mein chali ThanDi havaa aur paagal kar gai ThanDi havaa pahle to aisi na thi ThanDi havaa ho gai kyuun dil-jali ThanDi havaa sun ke us ki baat ghunche hans paDe kaan mein kyaa kah gai ThanDi havaa un ke honTon kaa jo kar aai tavaaf paa gai kuchh naghmagi ThanDi havaa hai dil-e-naakaam se achchhi nahin chheD-khaani bhi tiri ThanDi havaa sach bataa meri tarah kyaa un ki bhi be-qaraari thi baDhi ThanDi havaa zakhm-e-dil jis se huaa kuchh mundamil kucha-e-jaanaan ki thi ThanDi havaa dekh lete ham bhi teraa kuchh kamaal khilti gar dil ki kali ThanDi havaa ik pareshaan dil kaa kah degi salaam milnaa un se gar kabhi ThanDi havaa 'tarzi' aisaa hai asir-e-gham tiraa haal par jis ke hansi ThanDi havaa"

"shauq-e-baqaa kaa aap ne kitnaa hasin sila diyaa khaak hi se banaa thaa main khaak mein phir milaa diyaa chashm-e-karishma saaz ki ye bhi hai ik khususiyat chaahaa jise banaa diyaa chaahaa jise miTaa diyaa mujh se agar hui thi bhuul aap ne kyon kiyaa qusur kyon meraa haal dekh kar bazm mein muskuraa diyaa aankh ko de ke zauq-e-rang khud huaa rang se pare shoabada-e-girya tu ne khuub diid kaa hausla diyaa 'tarzi' abhi to ye fughaan ban hi rahi hai daastaan dil mein thaa raaz ik nihaan sher koi sunaa diyaa"

"khvaab ki basti mein afsaane kaa ghar shama ki lau par hai parvaane kaa ghar ban gae aakhir harif-e-baal-o-par daam ki divaar aur daane kaa ghar aap bhi sang-e-taaqqul pheinkiye aaina-khaana hai divaane kaa ghar main junun-e-ishq aur sahraa-e-gham tu adu ki bazm begaane kaa ghar aql-o-daanish ilm-o-irfaan fikr-o-hosh kin hisaaron mein hai farzaane kaa ghar ho gae gumraah kuchh meri tarah DhunDte hain shaikh paimaane kaa ghar qismat-e-'tarzi' yahi jaagir thi shahr-e-gham kahiye ki viraane kaa ghar"

"zalzale sakht aate rahe raat-bhar ghar ko dhaate giraate rahe raat-bhar aap haan aate jaate rahe raat-bhar vaz'-daari nibhaate rahe raat-bhar saaraa din naqsh un kaa banaate rahe ban gayaa to miTaate rahe raat-bhar koi bhi ham ko haatim nahin kah sakaa garche moti luTaate rahe raat-bhar din mein sarmaaya-kaari jo ki dard ki ham khasaare chukaate rahe raat-bhar subh-dam ju-e-khun kaise vo ban gae ham jo aansu bahaate rahe raat-bhar dekhiye saadgi aap ki daastaan aap hi ko sunaate rahe raat-bhar teri yaadon kaa saavan barastaa rahaa gulsitaan ham khilaate rahe raat-bhar qaamat-e-yaar par aarzu ki qabaa dil ke haathon sajaate rahe raat-bhar lamha lamha miTe ham koi gham nahin aap ko to banaate rahe raat-bhar ham bisaat-e-tamannaa bichhaate rahe aate aate vo aate rahe raat-bhar teri yaadon ke lamhe bhi bedard the tujh ko mujh se churaate rahe raat-bhar aasmaan par sitaare larazte rahe ashk 'tarzi' bahaate rahe raat-bhar"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"