miraa dil bhi miraa ab dil kahaan hai — Arman Akbarabadi

"zahe zinda-dili gham ki gul-afshaani nahin jaati kuchh aise ashk bhi hain jin ki taabaani nahin jaati talaatum-khez maujon kaa talaatum tham gayaa lekin jo barpaa hai kinaaron par vo tughyaani nahin jaati mire rahbar mujhe ye kaun-si manzil pe le aae ki mujh se surat-e-manzil bhi pahchaani nahin jaati hazaaron aashiyaane phunk Daale sehn-e-gulshan mein magar barq-e-sitam ki shoala-afshaani nahin jaati pilaataa hi rahaa saaqi hamein tu zahr ke saaghar tire rindon ki phir bhi rind-saamaani nahin jaati na jaane kyaa huaa 'armaan' asar apni duaaon kaa duaaein karte hain lekin pareshaani nahin jaati"

"chaman mein ab koi ai dost zindagi na rahi gulon mein rang bahaaron mein dilkashi na rahi kahaan banaaein nasheman qafas se chhuTne par ki ab chaman mein koi aisi shaakh hi na rahi gham-e-hayaat ne saaraa lahu nichoD liyaa charaagh-e-khaana-e-muflis mein raushni na rahi tumhaare saamne har haal mein jiye lekin tumhaare baad tamannaa-e-zindagi na rahi sharaab-e-naab hai saaqi bhi hai mughanni bhi magar dilon mein tamannaa-e-mai-kashi na rahi ye kaifiyat hi rahi un ki mahfil-e-nau mein charaagh jalte rahe aur raushni na rahi tamaam umr guzaari hai rah-navardi mein junun-e-shauq mein manzil ki yaad bhi na rahi uTh aur ashk-e-mohabbat se kar vuzu 'armaan' sahar qarib hai taaron mein raushni na rahi"

"hijr ki raatein kaise kaaTein puchho hijr ke maaron se palkon palkon ashk sajaae baatein kiin divaaron se jivan nayyaa juujh rahi hai zulm ke bahte dhaaron se ham ne kyaa kyaa dard sameTe rozaana akhbaaron se aangan aangan phuul khileinge pyaar ki khushbu mahkegi amn kaa parcham haathon mein lein kaam na lein talvaaron se nazm-e-zamaana darham-o-barham ab to aisaa lagtaa hai raahzanon kaa khauf hai kam-kam Dar hai pahre-daaron se jahd-o-amal kaa daaman thaamein azm kaa parcham lahraaein kashti paar nahin lagti hai baaton ki patvaaron se yaaro jism ki khush-poshi se tazin-o-tauqir nahin dil ko bhi to raushan kiije paakiza afkaaron se mere vatan ki miTTi mein bhi yaaro kitni khubi hai sondhi sondhi khushbu mahke baarish ki bauchhaaron se"

"ujDaa ujDaa shahr-e-tamannaa kaise ise aabaad karein tum hi qaatil tum hi aadil ham kis se fariyaad karein amn-o-ukhuvvat apnaa maslak mehr-o-vafaa hai apnaa diin apnaa to ye kaam nahin hai zulm-o-istibdaad karein khush-fahmi ki patvaaron se kashti khenaa kyaa maani kuchh sochein kuchh raah nikaalein vaqt na yuun barbaad karein ahl-e-junun ne jis basti ko taaraaj-o-paamaal kiyaa ahl-e-mohabbat aao mil kar phir us ko aabaad karein jhuTe hain sab rishte naate koi kisi kaa miit nahin kis kis kaa armaan karein ham kis kis ko ham yaad karein"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"