nagar mein dil ke ab kuchh bhi nahin hai — Arshi Malik

"dil muztarib bahut hai mujhe aa sanbhaal tu jholi mein meri lutf ki kuchh bhiik Daal tu dastak hai teri yaad ki dhak-dhak ki ye sadaa is be-qaraar dil ki musalsal dhamaal tu is lauh-e-dil pe sirf tiraa naam hai khudaa is dil ko Thokaron se na kar paaemaal tu tu mere zikr-o-fikr pe sochon pe hukmraan tu meri guftugu bhi hai meraa khayaal tu tu lashkar-e-gumaan mein yaqin kaa sabaat hai taarik raaston mein diye ki misaal tu main tere aab-e-‘ishq ki machhli huun jaan-e-jaan khushki pe mat firaaq ki mujh ko uchhaal tu tujh ko pukaartaa hai miraa Dubtaa badan daldal se is jahaan ki mujh ko nikaal tu kar paak mujh ko qurb ke qaabil banaa mujhe sab gand mere duur hon mujh ko ujaal tu qayyum tu hai tujh se har ik chiiz ko qiyaam barson se kar rahaa hai miri dekh-bhaal tu apne vujud ko tire qadmon mein rakh diyaa is be-kamaal chiiz ko de de kamaal tu takti huun har ghaDi tire jalve nae nae meri khushi bhi tujh se hai meraa malaal tu jarraah bhi hai tu miraa tu hi tabib hai tu mere dil kaa zakhm miraa indimaal tu maanaa ki main faqir huun muflis huun be-navaa tujh se tujhi ko maangaa hai meraa savaal tu daulat ke devtaa kaa pujaari hai saaraa shahr par mujh dil-e-shikasta kaa jaah-o-jalaal tu ghaafil kiyaa hai kasrat-e-amvaal ne jinhein rakhtaa hai 'umr bhar unhein aashufta-haal tu mujh ko fanaa kaa shauq hai kar 'ishq mein fanaa aab-e-hayaat de ke na 'arshi' ko Taal tu"

"dil ho yaa ki ghar 'arshi' jab basaanaa paDtaa hai ik nae tariqe se sab sajaanaa paDtaa hai nit-nae taqaazon se toD-phoD hoti hai kuchh bachaanaa paDtaa hai kuchh giraanaa paDtaa hai sab puraane bakson ki jhaaD-ponchh hoti hai khat rumaal tasvirein sab jalaanaa paDtaa hai raabte guzashta ke be-mahal se lagte hain be-mahal ravaabit ko bhuul jaanaa paDtaa hai aane vaali khushiyon mein pichhle gham sisakte hain kuchh nayaa jo paanaa ho kuchh ganvaanaa paDtaa hai sab ke sab gae mausam yaad bante jaate hain aur biich mein 'arshi' ik zamaana paDtaa hai"

"dil pe vo karb ke saae hain ki ji jaantaa hai haae kyaa log ganvaae hain ki ji jaantaa hai zindagi tu ne bhi rasmi si khushi ki khaatir ham se vo raqs karaae hain ki ji jaantaa hai dekh kar meri nigaahon mein talab ki shiddat us ne yuun daam baDhaae hain ki ji jaantaa hai us ki qurbat ki tamanna mein khud apne ham ne mol kyaa kyaa na ghaTaae hain ki ji jaantaa hai uTh ke aanaa tiri mahfil se qayaamat Thahraa dil ne vo hashr uThaae hain ki ji jaantaa hai ham ki nindon se gae jaagti aankhon us ne khvaab kuchh aise dikhaae hain ki ji jaantaa hai kucha-e-'ishq mein ham bhuul ke aa nikle the dard par aise kamaae hain ki ji jaantaa hai us ki ik pal ki tavajjoh ki talab mein ham ne ruup kyaa kyaa na sajaae hain ki ji jaantaa hai haae maa'sum se jazbaat-e-mohabbat daaim yuun zamaane ne dabaae hain ki ji jaantaa hai chaak-daamaan hain yusuf ki zulekhaaon ne haath kuchh aise baDhaae hain ki ji jaantaa hai vaqt ne lazzat-e-imroz ke dhoke mein hamein jaam vo talkh pilaae hain ki ji jaantaa hai mo'tabar ham se kai aur bhi 'arshi' us ne yuun nigaahon se giraae hain ki ji jaantaa hai"

"tuhmat-e-'ishq par naaz ham ne kiyaa ye to tamgha hai ham 'aashiqon ke liye sar bachaayaa nahin baarish-e-sang se aaine vaqf hain pattharon ke liye ahl-e-dil ke adab ki nishaani hai ye be-adab se bhi sabr-o-tahammul karein be-rukhi aur ra'unat yahaan jurm hai zaabte aur hain dil-jalon ke liye main huun taanbaa agar tu kare kimiyaa ye tiraa fazl hai mere rabb-ul-varaa munh khazaanon ke tere hamesha khule mere jaise tahi-daamanon ke liye jis jagah bolnaa farz thaa us jagah main ne jurm-e-khamoshi kiyaa baarhaa jo the mansur vo raunaq-e-daar hain kyaa hai irshaad ham buz-dilon ke liye ye guzaarish hai ai mere chaara-garaan apne nuskhe mein likh ek harf-e-du'aa haath hai mere maalik kaa dast-e-shifaa dil ke riste hue aablon ke liye ham zamin ki kashish mein the jakDe hue khuld ko chhoD kar is jagah aa base nafratein bughz-o-kine yahaan 'aam hain ye zamin vaqf hai pastiyon ke liye vaqt ke haath se jo bhi charke lage raaegaan kab gae shaa'iri mein Dhale ye amaanat hai mahfuz auraaq mein aane vaale nae mausamon ke liye bahte paani pe paabandiyaan mat lagaa fikr ke taaeron par na pahre biThaa koi rasta to rahne de zaalim khulaa mere jazbon ki jaulaaniyon ke liye 'umr-e-rafta ko dekhaa to dhachkaa lagaa chand bosida be-ruh abvaab hain vo bhi silan-zada aur dimak lage goyaa rakkhe hain aatish-kadon ke liye saari rasmon rivaajon ki bakhiya-gari ek jhaTkaa lagaa to udhaD jaaegi ham ko 'arshi' libaas-e-junun chaahiye jo banaa hai hamin manchalon ke liye"

"us jaan-e-jaan se khatm hai jab se mukaalima jaari hai apne aap se tab se mukaalima daanton ke biich bhinch liyaa hai zabaan ko mumkin nahin thaa shor-o-shaghab se mukaalima ug aae ek aan mein kaanTe zabaan par jab bhi kiyaa hai taish-o-ghazab se mukaalima taalaab ko bahaav ke maslak ki kyaa khabar us ki nazar mein kufr hai sab se mukaalima ham un ke tevaron ki samajhne lage zabaan mauquf jab se ho gayaa lab se mukaalima sad-shukr baat-chit ki ik raah to khuli jaari huaa kisi bhi sabab se mukaalima daa'vaa-e-hifz par mire dhabba tiraa vujud divaar kar rahi hai naqab se mukaalima ikkisvin sadi to dalaael ki hai sadi karti nahin jo naam-o-nasab se mukaalima 'arshi' ham aise shakhs se kyaa guftugu karein jaari na rakh sake jo adab se mukaalima"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"