saare jahaan ko husn kaa saail banaa diyaa — Parvez Anjum

"kar duaaein ki duaaon mein asar hotaa hai mehnati haath ke hisse mein samar hotaa hai ab faqiron ko vahi Taal diyaa karte hain maal-o-daulat se bharaa jin kaa bhi ghar hotaa hai aadhaa paani ho ghaDe mein to chhalaktaa hai bahut jhuk hi jaataa hai jo phaldaar shajar hotaa hai in chaTaanon ko badal detaa hai fan-paaron mein mehrbaan jin pe bhi vo jaan-e-hunar hotaa hai muntazir baiThe hain raste mein bichhaa kar aankhein dekhnaa ye hai ki kab un kaa guzar hotaa hai zulm ki aag ko itnaa na havaa do 'anjum' kaanp uThti hai zamin zulm agar hotaa hai"

"bujhaa bujhaa saa gul-e-tar dikhaai detaa hai 'ajib shahr kaa manzar dikhaai detaa hai main jis ke vaaste phulon kaa haar laayaa huun usi ke haath mein khanjar dikhaai detaa hai ye shahr-e-shishagaraan ko khabar nahin shaayad har ek haath mein patthar dikhaai detaa hai yaqin kaise karun ghair ki mohabbat kaa ki apnaa bhaai sitamgar dikhaai detaa hai qalam uThaane kaa jis ko abhi shu'ur nahin vo aadmi bhi sukhanvar dikhaai detaa hai nigaah Daali hai jab se mire masihaa ne bulandiyon pe muqaddar dikhaai detaa hai tumhaari bazm mein taarikiyaan hain kyon 'anjum' falak pe chaand saa dilbar dikhaai detaa hai"

"haal-e-dil ham ne sunaayaa to buraa maan gae ashk aankhon mein jo aaya to buraa maan gae vaada karke jo na aae to koi baat nahin bevafaa kah ke bulaayaa to buraa maan gae jis ke har lafz mein har band mein naam un kaa thaa ham ne vo giit sunaayaa to buraa maan gae vo jo ghairon se ham-aaghosh huaa karte hain un ko pahlu mein biThaayaa to buraa maan gae aap ne jashn charaaghon kaa manaayaa lekin ik diyaa ham ne jalaayaa to buraa maan gae jaam pe jaam uThaate rahe piine vaale ham ne jo haath baDhaayaa to buraa maan gae naaz pe naaz uThaayaa to baDe achchhe the niind se un ko jagaayaa to buraa maan gae aib har shakhs mein jo DhunD rahe the 'anjum' aaina un ko dikhaayaa to buraa maan gae"

"bad-bakhti mein sab be-mol hiire chun yaa moti rol khvaabon ki taabirein DhunD suraj niklaa aankhein khol sahraa sahraa phuul khilaa dariyaa dariyaa zahr na ghol talkh-navaai Thiik nahin bol hamesha miThe bol kaun yahaan tujh saa khuddaar tu darvesh-e-be-kashkol jo karnaa hai jaldi kar kartaa kyon hai Taal-maTol chup chup shaadi shaadi kyaa shahnaai taashe na Dhol tu ustaadon kaa ustaad tere sher mein kyon hai jhol aankhein nargis honT kanval baat tumhaari hai anmol ghibat karnaa Thiik nahin himmat hai to munh par bol parda-daari neki hai bhaai 'anjum' bhed na khol"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"