sahraa ko dariyaa samjhaa thaa — Khalid Moin

"raat aankhon mein kaaTne vaalo shaad raho aabaad raho baar-e-hijr uThaane vaalo shaad raho aabaad raho kachchi umr mein kal ke dukhon se aaj ulajhnaa Thiik nahin pahlaa saavan bhigne vaalo shaad raho aabaad raho ab aae ho saare diye jab ik ik kar ke bujh bhi gae lekin lauT ke aane vaalo shaad raho aabaad raho khaana-badoshi ek hunar hai rafta rafta aaegaa ranj-e-masaafat khinchne vaalo shaad raho aabaad raho ek dariche se do aankhein roz sadaaein deti hain raat gae ghar lauTne vaalo shaad raho aabaad raho hijr-zadon par khud nahin khultaa kis aalam mein rahte hain haal hamaaraa puchhne vaalo shaad raho aabaad raho"

"dasht-e-vahshat ko faqat qais hi bhaayaa huaa hai ham ne bhi ishq kaa aazaar uThaayaa huaa hai sar-kashi mauj-e-havaa kii, ye kahaan samjhegi kis mashaqqat se diyaa ham ne jalaayaa huaa hai kaise gulfaam kahun, kaise sitaara samjhun vo badan aur hi miTTi kaa banaayaa huaa hai mauj-e-khushbu ki tarah haath na aane vaale ham ne ik saath bahut vaqt bitaayaa huaa hai aap ise kaasa-e-tashhir samajh baiThe hain ham ne ik umr se ye zakhm chhupaayaa huaa hai kaash vo chashm-e-gurezaan bhi kabhi jaan sake ham ko kis khvaab ki vahshat ne jagaayaa huaa hai"

"raat kaa apnaa ik taqaddus hai so use paaemaal mat karnaa jab diye guftugu ke raushan hon lauTne kaa savaal mat karnaa mausam-e-yaad kaa koi jhonkaa, ab jo guzre tumhaari khalvat se soch lenaa hamaare baare mein, par hamaaraa malaal mat karnaa rat-jagon ki rutein to khair yunhi aati jaati hain, par ye dhyaan rahe jaagnaa bhi to is saliqe se, apni aankhon ko laal mat karnaa ham se darvesh duniyaa vaalon se, bas isi baat par ulajhte hain vahshat-e-jism-o-jaan baDi shai hai khud ko aasuda-haal mat karnaa dasht-e-ibrat-saraa mein rahnaa tu sar se saudaa nikaal kar rakhnaa log dushman kahin na ho jaaein koi aisaa kamaal mat karnaa lamha-e-hijr apni vusat mein, aap lazzat hai, zindagi bhar ki tum bhi 'khaalid-moin' yuun karnaa, umr sarf-e-visaal mat karnaa"

"sharik-e-khalvat-e-khun-baar thoDi hotaa hai ye shahr gham kaa, nigah-daar thoDi hotaa hai shikast o fath ke asbaab tai-shuda to nahin jo ek baar ho, har baar thoDi hotaa hai hai ek vaqt muqarrar, vagarna duniyaa mein koi zavaal pe tayyaar thoDi hotaa hai fareb-e-daavaa-guzaari hai, masala kuchh aur sabhi ko 'ishq kaa aazaar thoDi hotaa hai lahu ki taal pe aaghaaz raqs karte hue idhar udhar se sarokaar thoDi hotaa hai ulaTnaa chaahe jo kaar-e-munaafiqat kaa naqaab ye shahr! is kaa taraf-daar thoDi hotaa hai lakirein khinchte rahne se ban gai tasvir koi bhi kaam ho, be-kaar thoDi hotaa hai"

"ik diyaa aisaa bujhaa hai mujh mein nauhagar! ab ke havaa hai mujh mein aks-dar-aks bikharnaa hai mujhe jaane kyaa TuuT gayaa hai mujh mein na koi khvaab, na aansu na khayaal kyaa ajab qaht paDaa hai mujh mein chashm hairaan hai, sar-e-aaina runumaa kaun huaa hai mujh mein dil sulagne kaa sabab hijr, na vasl masala is se sivaa hai mujh mein munkashif! aaj talak ho na sakaa main khalaa huun ki khalaa hai mujh mein"

"vo shakhs jo rakhtaa hai jamaal aur tarah kaa hai us se bichhaDne kaa malaal aur tarah kaa aasaar kharaabi ke hain, aaghaaz se zaahir lagtaa hai ki guzregaa, ye saal aur tarah kaa is shahr-e-ziyaan-kaar ke imkaan se baahar main ab ke dikhaaungaa, kamaal aur tarah kaa hotaa hai hamesha hi nae ranj mein Duubaa is jaada-e-vahshat pe dhamaal aur tarah kaa is shahr-e-fusun-gar ke azaab aur, savaab aur hijr aur tarah kaa hai, visaal aur tarah kaa ab ghar se nikalnaa hi paDegaa ki mukhaalif is baar! uThaate hain, savaal aur tarah kaa"