samundaron ko uThaae phiri ghaTaa barson — Altaf Parwaz

"iinT divaar se jab koi khisak jaati hai dhuup kuchh aur mere sar pe chamak jaati hai kitne darvaaze mujhe band nazar aate hain aankh jab uTh ke sar-e-baam-e-falak jaati hai mujh se is baat pe naaraaz hain arbaab-e-khirad baat aai hui honTon pe aTak jaati hai mutmain ho ke kabhi saans na lein ahl-e-chaman aag sinon mein havaa paa ke bhaDak jaati hai jaane kyaa baat hai ab raah-e-vafaa mein aksar zindagi apne hi saae se ThiThuk jaati hai ik hamin aabla-paai se gila-mand nahin dosto gardish-e-haalaat bhi thak jaati hai ab andheraa kabhi raste mein nahin aaegaa ab nazar hadd-e-nazar se pare tak jaati hai mere haathon mein vo saaghar hai chhalakne vaalaa taa-ba divaar-e-haram jis ki khanak jaati hai aaj us paikar-e-rangin se milaa huun 'parvaaz' jis ke daaman se fazaa saari mahak jaati hai"

"laakh teri hi tarah kyon na paraayaa hotaa tujh saa koi to mire dhyaan mein aayaa hotaa vaqt ke saath to chaltaa hai zamaana saaraa vaqt ke saath miri tarah nibhaayaa hotaa main tire shahr mein tanhaa huun na jaane kab se tu na hotaa tiri divaar kaa saayaa hotaa khilkhilaate hue lamhon se lipaTne vaalo ruThne vaali ruton ko bhi manaayaa hotaa yuun to har ek shabistaan hai munavvar tujh se kabhi meraa bhi koi khvaab sajaayaa hotaa le gayaa saath uDaa kar meri nindein 'parvaaz' dhyaan mein kaash na vo shakhs samaayaa hotaa"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"jahaan-e-dard-o-gham hai aur main huun tiraa naqsh-e-qadam hai aur main huun kisi ki aankh nam hai aur main huun vufur-e-shauq kam hai aur main huun mujhe hai daulat-e-kaunain haasil mire rab kaa karam hai aur main huun main apne aap ko pahchaantaa huun miraa apnaa bharam hai aur main huun yahi kyaa kam hai duniyaa-e-vafaa mein mujhe ehsaas-e-gham hai aur main huun kisi ki yaad kaa ehsaan hai mujh par sukun-e-dil baham hai aur main huun mujhe 'mahmud' koi Dar nahin hai miraa apnaa qalam hai aur main huun"