tu mai-kada mein ik aisaa nizaam paidaa kar — Sabir Aarwi

"zulf-e-shab kaa saaya bhi kis qadar ghaneraa hai dil se un ki mahfil tak raasta andheraa hai aariz-e-tabassum par ghaaza-e-takalluf kyon muskuraa ke dekho to har taraf saveraa hai shaakh-e-gul si baahein hon yaa khunak havaaein hon taair-e-takhayyul kaa kab kahin baseraa hai un kaa naam jab leinge dil zarur dhaDkegaa un ki yaad kaa jab tak mere dil mein Deraa hai daaman-e-mohabbat mein aansuon ke moti hain yaa chaman mein shabnam ne laal-o-zar bikheraa hai tum mataa-e-gham 'saabir' jaise ho bachaa lenaa rahzanon ki basti hai daakuon kaa Deraa hai"

"yuun javaani aai rukhsat ho gai aaina dekhaa to hairat ho gai baDh gai kuchh aur tauqir-e-junun apnaa ghar dekhaa to vahshat ho gai chhup chhupaate phir rahe the aaj tak aaj tasht-az-baam ghurbat ho gai justuju ke paanv thak kar rah gae duri-e-manzil qayaamat ho gai aap ke aane se bas itnaa huaa kuchh to taskin-e-tabiat ho gai aae baiThe aur uTh kar chal diye kis qadar jaldi qayaamat ho gai"

"kaarobaar-e-zindagi se jis kaa dil ghabraaegaa yaar ki zulf-e-rasaa ke saae mein aa jaaegaa tazkira rukhsaar kaa yaa zikr-e-zulf-e-yaar ho kaif aankhon mein yaqinan kuchh na kuchh chhaa jaaegaa jo manaazir aaj tak tum ne kabhi dekhe nahin koi tum ko vo manaazir ek din dikhlaaegaa ab karam-farmaaiyaan hon yaa itaab-e-naaz ho aap ke dast-e-karam se dil sila kuchh paaegaa vaqt ki uljhi hui zulfein sanvaarein kis tarah ahl-e-dil ko ye saliqa khud-bakhud aa jaaegaa aap pahle hans ke gham khaate rahe 'saabir' magar ab yahi gham rafta rafta aap ko khaa jaaegaa"

"kunj-e-tanhaai ke afkaar mein kyaa rakkhaa hai zikr-e-zulf-o-lab-o-rukhsaar mein kyaa rakkhaa hai ai gham-e-zist tiraa saath ghanimat hai mujhe varna ab sirf gham-e-yaar mein kyaa rakkhaa hai pahle hi khul gayaa inkaar se mahfil kaa bharam aur ab aap ke iqraar mein kyaa rakkhaa hai marhabaa azm-e-javaan le ke nikalne vaalo is jahaan ke rasan-o-daar mein kyaa rakkhaa hai apne jab ho na sake ghair ki ham samt chale varna is kucha-e-aghyaar mein kyaa rakkhaa hai kal talak aap ke qaabil thaa yahi dil 'saabir' haan magar ik dil-e-bimaar mein kyaa rakkhaa hai"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"

"jahaan-e-dard-o-gham hai aur main huun tiraa naqsh-e-qadam hai aur main huun kisi ki aankh nam hai aur main huun vufur-e-shauq kam hai aur main huun mujhe hai daulat-e-kaunain haasil mire rab kaa karam hai aur main huun main apne aap ko pahchaantaa huun miraa apnaa bharam hai aur main huun yahi kyaa kam hai duniyaa-e-vafaa mein mujhe ehsaas-e-gham hai aur main huun kisi ki yaad kaa ehsaan hai mujh par sukun-e-dil baham hai aur main huun mujhe 'mahmud' koi Dar nahin hai miraa apnaa qalam hai aur main huun"