us se rishta thaa ek do pal kaa — Ahmad Nesar

"khud par nahin tuyur ki ab dastaras ki bas masti mein jaa rahe hain yuun su-e-qafas ki bas khvaahish kahaan uruuj se utri hai zer-e-khaak mazbut duur se use is tarah kas ki bas mahkaa huaa vajud hai raushan hai meri khaak aise ravaan hai phir teri bu-e-nafas ki bas har dam tire khayaal ne niilaa kiyaa badan sab zahr khinch le miraa is tarah Das ki bas maktub mein likhaa hai mujhe ab shifaa mile bimaar ko ataa ho kabhi ek mas ki bas aankhein lahu-luhaan thiin chehre bhi the malaal is tarah didani thaa vo sola-baras ki bas ik umr ki thakaan se hai jism shal 'nisaar' manzur ab nahin mujhe bhaang-o-jaras ki bas"

"tu khud ko dekh le kitnaa daraaz-qaamat hai tiraa falak to mire chaand ki badaulat hai kisi bhi haal mein ham kharch kar nahin sakte hamaaraa dard tiri di hui amaanat hai miraa vajud abhi barf ki misaal nahin bachi hui abhi is raakh mein tamaazat hai javaab iinT kaa denaa paDegaa patthar se yahi hai rasm yahaan ki yahi rivaayat hai ajiib chaar-taraf hai fazaa mein khaamoshi ye kyaa maqaam hai kis qahr ki alaamat hai nahin charaagh to jugnu kaa qaafila bheje bahut siyaah hai rasta bahut zarurat hai 'nisaar' tez qadam hai bahut ye duniyaa to ki ab paDaav bhi karnaa tujhe qayaamat hai"

"havaa kyaa hashr barpaati nahin hai miri saanson ko mahkaati nahin hai yahaan jazbon ke sote phuTte hain nadi aankhon ki barsaati nahin hai koi bhi subh jo hamdard nikle koi bhi shaam jo ghaati nahin hai musalsal ghumne mehvar pe apne ye duniyaa phir bhi chakraati nahin hai makin saare hain sab kaa aashiyaana kisi kaa mulk ye zaati nahin hai kaTaa ik peD aangan kaa hamaare nahusat ghar se ab jaati nahin hai baDaa ehsaan gardish ne kiyaa ye hamaare saath uktaati nahin hai"

"ye kaaenaat to hai piTaaraa faqir kaa hotaa nahin ghurub sitaaraa faqir kaa duniyaa murid ban ke khaDi hai magar hunuz faaqa mein ho rahaa hai guzaaraa faqir kaa sadqe mein mil gaiin thiin du'aaein faqir se chamkegaa to hayaat-sitaaraa faqir kaa Thokar mein us ko rakhnaa hi kaar-e-savaab hai duniyaa to hai janaab utaaraa faqir kaa ye kaifiyat bayaan mein aati nahin 'nisaar' jab gunjtaa hai zehn mein naa'ra faqir kaa"

"bujhti aankhon se miri khvaab kahaan jaataa hai ab mujhe le ke ye sailaab kahaan jaataa hai ruuh to kab se pareshaan hai numu ki khaatir musht bhar khitta-e-shaadaab kahaan jaataa hai apni hasti mein to tufaan khinche aate hain hai jo paanv mein vo girdaab kahaan jaataa hai us ki taqdir mein likkhaa hai nami mein rahnaa chhoD kar aab ko surkhaab kahaan jaataa hai apni tahzib kaa ham paas bahut rakhte hain ghusse mein lahja-e-aadaab kahaan jaataa hai jaagnaa meri nigaahon kaa muqaddar hai 'nisaar' aankh se jalva-e-mahtaab kahaan jaataa he"

"tamaam jism agar laa-ubaal hai to rahe vahi jo dasht mein tanhaa ghazaal hai to rahe faqir bhuul chukaa hai nisaab duniyaa kaa tire nasib mein maal-o-manaal hai to rahe 'aziz rakhti hai mujh ko vatan ki khaak bahut tire khulus mein ranj-o-malaal hai to rahe kiyaa hai jang ko rukhsat magar du'aa de kar 'adu ke paas agar us ki Dhaal hai to rahe talaash karne ko nikle bahut se log tujhe nishaan qadmon kaa milnaa muhaal hai to rahe hisaar baandh rahi hai 'nisaar' sarshaari khilaaf aaj junub-o-shumaal hai to rahe"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"kisi ki mehrbaani ho gai hai ayaan dil ki kahaani ho gai hai hare mausam ki pahli khvaahishein uf khushi gham ki divaani ho gai hai sabhi afraad ghar ke so gae hain bahut lambi kahaani ho gai hai rivaayat kaa hai ab bhi sahar qaaem har ik jiddat puraani ho gai hai pas-e-chehra milaa ik aur chehra 'aqidat paani paani ho gai hai"

"aakhiri hal thaa yahi pesh-e-nazar jaane diyaa ek gahri saans li phir khvaab mar jaane diyaa saarbaanaa de gavaahi mujh ko pyaari thi anaa rakh liyaa zaad-e-safar aur ham-safar jaane diyaa hazrat-e-naaseh ki khush-uftaadgi pe daad hai khud jidhar se aae the sab ko udhar jaane diyaa is harim-e-naaz mein yuun be-mahaabaa guftugu kuchh bharam rakkhaa to hotaa tum ko gar jaane diyaa tujh ko rokaa jaa rahaa thaa raushni thi jab talak shaam ke Dhalte samay suraj ko ghar jaane diyaa aankh sapne dekhti thi aansuon se kyon bhari chaahti to puchh leti main magar jaane diyaa dostaa qismat na ho to koshishein bekaar hain sabr kaa paimaana ham ne khud hi bhar jaane diyaa dil musir thaa baarhaa kuchh jaanchne ko ruk gae aakhirash us ne hamein baar-e-digar jaane diyaa"

"aisaa to yahaan kuchh bhi nahin hadd-e-nazar tak ham ko to pahunchnaa thaa kisi khvaab-nagar tak ab paanv nahin raah mein dil thakne lagaa hai lekin hamein chalnaa to hai anjaam-e-safar tak ham shor bhi sunte hain samaaat se bahut kam aavaaz bhi jaati hai to bas hadd-e-nazar tak mumkin hai main ab sabr kaa ye peD giraa duun jab haath pahunchtaa hi nahin shaakh-e-samar tak ham apne hi mausam se parakhte hain jahaan ko maahaul kaa lete hi nahin koi asar tak main apne hi andar ki taraf chikh rahaa huun ab dekhiye jaati hai ye aavaaz kidhar tak"

"bahut shaadaab ho lekin bayaabaani nahin jaati ki baam-e-auj chhune se bhi arzaani nahin jaati kai chehron ne aavaazon ne dil aabaad rakkhaa hai magar aankhon mein raqsaan hai jo viraani nahin jaati mujhe apni numu ke vaaste tum se bichhaDnaa hai tumhaare saath rahne se tan-aasaani nahin jaati main is dil ki sabhi sachchaaiyaan taslim kartaa huun magar ik baat aisi bhi hai jo maani nahin jaati hujum-e-shor-o-ghul mein kaun thaa kis ne pukaaraa thaa yahaan to apni bhi aavaaz pahchaani nahin jaati 'samir' is ishq mein insaan kyaa itnaa badaltaa hai main khud par ghaur kartaa huun to hairaani nahin jaati"