ye dil jo muztarib rahtaa bahut hai — Bedil Haidari

"bahne lage to palkon se laf kar diyaa gayaa phir aansuon ko durr-e-najaf kar diyaa gayaa kuchh qahqahon ki guunj falak tak sunaai di kuchh siskiyon ko taabe'-e-daf kar diyaa gayaa jin ungliyon ke zakhm abhi tak nahin bhare taarikh se unhi ko hazaf kar diyaa gayaa dasht-e-badan ki pyaas bujhaani thi is liye ashkon ke rukh ko dil ki taraf kar diyaa gayaa gharqaab log jab na samundar pahunch sake tughyaaniyon ko laash-ba-kaf kar diyaa gayaa utraa javaan aankh mein jaise hi motiyaa aankhon ki putliyon ko sadaf kar diyaa gayaa 'be-dil' mahaaz-e-jang se lauTe jo lashkari saari safon ko ek hi saf kar diyaa gayaa"

"giri jo barq chaman ko tajalliyaan bhi milin aur us ke saath parindon ki boTiyaan bhi milin vo jis makaan se mili kotvaal-e-shahr ki laash vahin se TuuTi hui chand chuDiyaan bhi milin nikaalin bachchon ki laashein jo ham ne malbe se na sirf baste mile balki takhtiyaan bhi milin zabaanein kaaT ke us ne jahaan chhupaa di thiin vahaan se ahl-e-qalam ki kuchh ungliyaan bhi milin ye aur baat bari kar diyaa gayaa qaatil agarche qatl ki vaazeh nishaaniyaan bhi milin ki jaise qaaf ki vaadi mein aa gae 'be-dil' musaafirat mein hamein aisi bastiyaan bhi milin"

"dil kahin bhi nahin lagtaa hogaa dil nahin maantaa aisaa hogaa jitnaa hangaama ziyaada hogaa aadmi utnaa hi tanhaa hogaa chaltaa-phirtaa hai sitaara meraa ab kahin aur chamaktaa hogaa main ne ik baat chhupaa rakkhi hai ab usi baat kaa charchaa hogaa"

"ghazal mein tere khad-o-khaal likhne vaalaa kaun miri tarah tujhe kaaghaz pe laane vaalaa kaun gul-e-anaar hai aankhon mein yaa safina-e-ashk uthal-puthal hai ye Dubki lagaane vaalaa kaun Thahar gai hai zamaanon ki pyaas aankhon mein vagarna aankhon mein kheme lagaane vaalaa kaun yatim bachchon ko jaldi javaan kar maulaa hai in ko varna khilaune dilaane vaalaa kaun agarche kaanTe hain 'be-dil' miri zabaan pe magar main us ke abr se inkaar karne vaalaa kaun"

"us kaa paikar miri sochon ne taraashaa kaise mahv-e-hairat huun qarib itnaa vo aayaa kaise chalte tufaan mein parindon ko panaahein de kar le liyaa mol darakhton ne ye khatra kaise jab kisi shaam ko ghar aataa huun khaali haathon dekhtaa hai mire munh ko miraa bachcha kaise kal andheron se rihaai ki du'aa maangi thi ab ye tashvish ki rukhsat ho ujaalaa kaise main to khud apni hadon ko bhi nahin chhu saktaa tu khudaa ho ke mire zehn mein aayaa kaise haadson ne mujhe kar Daalaa thaa reza reza main simaTtaa bhi jo 'be-dil' to simaTtaa kaise"

"miri daastaan-e-alam to sun koi zalzala nahin aaegaa miraa muddaaa nahin aaegaa tiraa tazkira nahin aaegaa kai ghaaTiyon pe muhit hai miri zindagi ki ye rahguzar tiri vaapsi bhi hui agar tujhe raasta nahin aaegaa agar aae dasht mein jhel to mujhe ehtiyaat se pheinknaa ki main barg-e-khushk huun dosto mujhe tairnaa nahin aaegaa agar aae din tiri raah mein tiri khoj mein tiri chaah mein yunhi qaafile jo luTaa kiye koi qaafila nahin aaegaa kahin intihaa ki malaamatein kahin pattharon se aTi chhatein tire shahr mein mire baad ab koi sar-phiraa nahin aaegaa koi intizaar kaa faaeda mire yaar 'bedil'-e-gham-zada tujhe chhoD kar jo chalaa gayaa nahin aaegaa nahin aaegaa"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"