Ghazal

ai khudaa kaisaa samaan aayaa hai

shahr mein har su dhuaan chhaayaa hai

luT gai khalq-e-khudaa ki hasrat

ahd-e-nau aisaa ziyaan laayaa hai

· · ·

ai khudaa hasrat-o-jazbaat ke maare hue log

ab kahaan jaaein ye haalaat ke maare hue log

teri duniyaa ki kahaani bhi ajab hai maulaa

dar-ba-dar rahte hain haq baat ke maare hue log

· · ·

masale aur bhi hain ishq ke aazaar ke saath

sirf ik karb nahin umr ki raftaar ke saath

haae mahrumi-e-qismat ki tujhe paa na sake

ham har ik samt gae hasrat-e-didaar ke saath

· · ·

kaun sukh-chain se hai kis ki paziraai hai

teri duniyaa mein har ik moD pe rusvaai hai

jhiil si aankhein tiri aur gulaabi tire honT

meri chaahat ke hi sadqe mein ye raanaai hai

· · ·

mausam-e-gul mein bhi gul nazr-e-khizaan hain saare

mutmain koi nahin mahv-e-fughaan hain saare

hosh-mandi se qadam aage baDhaao logo

apni jaanib hi khinche tir-o-kamaan hain saare

· · ·

sard mausam hai bahut hijr kaa aazaar bhi hai

kyaa kahein tujh se ye dil gham mein giraftaar bhi hai

kaise kah duun ki tire baa'd mujhe chain paDaa

subh ghamgin miri raat dil-aazaar bhi hai

· · ·

tanhaai ki aaghosh mein thaa subh se pahle

milti rahi ulfat ki sazaa subh se pahle

shaayad mire lafzon pe taras aae use ab

rote hue maangi hai duaa subh se pahle

· · ·

Dubte Dubte suraj ne ziyaaein diin hain

teri yaadon ne bahut dil ko sadaaein diin hain

ye adaalat kisi tahrir ki muhtaaj nahin

vaqt ne har kas-o-naa-kas ko sazaaein diin hain

· · ·

teri ummid ke asbaab nazar aate nahin

kyon mujhe koi hasin khvaab nazar aate nahin

itnaa bhaTkaa huun aziyyat ke bayaabaan mein ki ab

koi bhi lamha-e-naayaab nazar aate nahin

· · ·

nasib mein hai judaai to ronaa-dhonaa kyaa

hai saari chiiz paraai to ronaa-dhonaa kyaa

yahaan to apne hi apnon ko maar dete hain

havaa ne shama bujhaai to ronaa-dhonaa kyaa

· · ·