Ghazal

kuchlaa kiye hain kitne hi lashkar zamin ko

aise kiyaa gayaa hai baraabar zamin ko

main ne bhi sair ki hai kabhi aasmaan ki

main jaantaa huun dasht samundar zamin ko

· · ·

'adu daaman pasaare mil rahe hain

to kyaa ab do sitaare mil rahe hain

bhanvar ki justuju thi aur ham ko

kinaare hi kinaare mil rahe hain

· · ·

dekhne ko phuul mein mashghul hai

khaar daaman mein hain sar pe dhuul hai

ek to lahja tiraa hai naa-ravaa

us pe teri baat naa-maa'qul hai

· · ·

khud ko kyaa khuun rulaaoge bataao to sahi

tum mujhe kaise bhulaaoge bataao to sahi

aise chup-chaap tumhein main nahin jaane dungaa

tum kabhi lauT ke aaoge bataao to sahi

· · ·

pur-khulus jazbon kaa daan to nahin lete

jaan kahne vaalon ki jaan to nahin lete

ik zaraa saa ye sun kar tum se pyaar hai ham ko

yuun kamaan-e-abru ko taan to nahin lete

· · ·

bas firaaq-e-yaar mein jaari sukhan-aaraaiyaan

haae ye pur-kaif mausam aur miri tanhaaiyaan

bistaron ki silvaTon se laD rahe hain ham yahaan

jaane vaalaa le rahaa hogaa kahin angDaaiyaan

· · ·

huzur khel hai yaa phir Daraama-baazi hai

tumhaaraa pyaar bil-aakhir Daraama-baazi hai

main ulTe paanv palaT jaaun teri bazm se kyaa

agarche meri hi khaatir Daraama-baazi hai

· · ·

hai nazar mein jo baal shishe kaa

kyaa yahi hai zavaal shishe kaa

tu ne patthar pe rakh diyaa kaise

dil hai meraa sanbhaal shishe kaa

· · ·

ek hi manzar to behtar thaa hamein

yuun pas-e-manzar kaa kab Dar thaa hamein

faailon se kah diyaa thaa haal-e-dil

yaar behtar ghar se daftar thaa hamein

· · ·

hamaari aankh udaasi se laal kab tak ho

tumhaare jaane kaa aakhir malaal kab tak ho

kisi bhi roz umaD aaegi ye bezaari

bataao itnaa ziyaada khayaal kab tak ho

· · ·

apne dil par hi nahin hai mujhe qaabu bolo

tum ne kar to nahin rakkhaa koi jaadu bolo

jitni pyaari tiri aankhein hain tiraa lahja hai

sirf itnaa hi kahungaa tujhe urdu bolo

· · ·

mujhe thaa tujh se kabhi pyaar jhuuT bolaa thaa

hai jhuuT ye bhi ki dil-daar jhuuT bolaa thaa

ye jhuuT bolaa ki raaton mein jaagtaa huun main

tumhaari yaad mein ai yaar jhuuT bolaa thaa

· · ·

koi qimat lagaae saae ki

hai ye divaar bhi kiraae ki

bujh gayaa hai paDaa paDaa cigarette

chuskiyaan le rahaa huun chaae ki

· · ·

dam-ba-dam meraa taraf-daar huaa kartaa thaa

ye jo dushman hai kabhi yaar huaa kartaa thaa

jo tire dil se taDi-paar huaa kartaa thaa

marg-e-tanhaai se do-chaar huaa kartaa thaa

· · ·

maraz ki jin se tavaqqo' hai vo davaa deinge

dilaasa deinge faqat tujh ko aasraa deinge

kaheinge khud ko taraf-daar raushni ke magar

sabhi charaagh ye jalte hue bujhaa deinge

· · ·

dekh le khud hi koi lauT ke jaate hue haath

sharm aati hai zaraa ham ko baDhaate hue haath

kyaa khabar tum ko ki kyaa dil pe guzarti hai mire

jin se dil miltaa nahin un se milaate hue haath

· · ·

mile jo tum se milaa ik surur kyaa samjhe

hamaare dil ko huaa hai ghurur kyaa samjhe

use ye zid ke tumhein roz milne aanaa hai

tumhaaraa 'uzr dil-e-naa-sabur kyaa samjhe

· · ·

vasl bharpur rahaa hijr bhi bharpur banaa

zakhm naakhun se khurachte hue naasur banaa

us ne ik 'umr mire saath aziyyat jheli

ab ke saae ko mire jism se kuchh duur banaa

· · ·

kahun kis se ki dhundlaae hue hain

jo manzar aankh par chhaae hue hain

kinaare se kinaare tak hai vahshat

nadi ke raag ghabraae hue hain

· · ·

ye tasalli ye dilaasa ye sahaaraa naaTak

kitnaa pyaaraa hai mire yaar tumhaaraa naaTak

dard sahne ki aziyyat se guzaarein tum ko

ham bhi dikhlaaein kisi roz karaaraa naaTak

· · ·

kisi ke zikr se daaim hamaari zindagaani hai

aur us ki raah se haTnaa hamaari raaegaani hai

hamaare khvaab chaahat aarzu saari tamannaaein

tumhi ho tum nahin to kyaa hamaari jaavedaani hai

· · ·

baat aage baDhaa tariqe se

aankh ham se milaa tariqe se

aap shaa'ir hain vo bhi baa-uslub

baat kiije zaraa tariqe se

· · ·

ham ko huaa thaa 'ishq javaani mein mukhtasar

kirdaar thaa hamaaraa kahaani mein mukhtasar

mat puchh raat kitni aziyyat-guzaar thi

milnaa thaa us se shaam-suhaani mein mukhtasar

· · ·

jab se nasib meraa Thikaane pe aa gayaa

khud hi shikaar meraa nishaane pe aa gayaa

pardaa-nashin parda-nashini mein gum rahe

ilzaam mere aankh uThaane pe aa gayaa

· · ·