Ghazal

hairat ke daftar jaaun

main apne andar jaaun

aankhein chaar karun sab se

aaine se Dar jaaun

· · ·

ai abr-e-iltifaat tiraa e'tibaar phir

aankhon mein phir vo pyaas vahi intizaar phir

rakhkhun kahaan pe paanv baDhaaun kidhar qadam

rakhsh-e-khayaal aaj hai be-ikhtiyaar phir

· · ·

TuuTi hui shabih ki taskhir kyaa karein

bujhte hue khayaal ko zanjir kyaa karein

andhaa safar hai ziist kise chhoD de kahaan

uljhaa huaa saa khvaab hai taabir kyaa karein

· · ·

kuchh faasla nahin hai adu aur shikast mein

lekin koi suraagh nahin hai giraft mein

kuchh dakhl ikhtiyaar ko ho bud-o-hast mein

sar kar luun ye jahaan-e-alam ek jast mein

· · ·

dasht ko DhunDne niklun to jazira nikle

paanv rakhkhun jo main viraane mein duniyaa nikle

ek biphraa huaa dariyaa hai mire chaar taraf

tu jo chaahe isi tufaan se kinaara nikle

· · ·

gahri suuni raah aur tanhaa saa main

raat apni chaap se Dartaa saa main

tu ki meraa aaina hotaa huaa

aur tere aks mein Dhaltaa saa main

· · ·

qaraar-e-gud-shuda mere khudaa kab aaegaa

miri duaaon mein rang-e-duaa kab aaegaa

badan se bharne lage hain ham apni ruuh ke ghaav

hamein saliqa-e-daaru-davaa kab aaegaa

· · ·

lahu tezaab karnaa chaahtaa hai

badan ik aag dariyaa chaahtaa hai

mayassar se ziyaada chaahtaa hai

samundar jaise dariyaa chaahtaa hai

· · ·

ba-rang-e-khvaab main bikhraa rahungaa

tire inkaar jab chuntaa rahungaa

kabhi sochaa nahin thaa main tire bin

yuun zer-e-aasmaan tanhaa rahungaa

· · ·

habs-e-darun pe jism-e-giraan-baar sang thaa

vahshat pe meri arsa-e-aafaaq tang thaa

kuchh duur tak sahaab-e-rifaaqat rahaa rafiq

phir ehtamaam-e-baarish-e-tir-o-tafang thaa

· · ·

koi ilzaam mere naam mere sar nahin aayaa

vo jo tufaan andar thaa mire baahar nahin aayaa

ye kis ki diid ne aankhon ko bhar Daalaa khalaa se yuun

ki phir aankhon mein koi dusraa manzar nahin aayaa

· · ·

hairat se dekhtaa huaa chehra kiyaa mujhe

sahraa kiyaa kabhi kabhi dariyaa kiyaa mujhe

kuchh to inaayatein hain mire kaarsaaz ki

aur kuchh mire mizaaj ne tanhaa kiyaa mujhe

· · ·

khuli aur band aankhon se use taktaa rahaa main bhi

tiri duniyaa ke pichhe bhaagtaa phirtaa rahaa main bhi

miri aavaaz pichhli raat tujh tak kaise aa paati

kisi gahre kuein mein raat bhar sotaa rahaa main bhi

· · ·

main nahin huun nahin kahin bhi nahin

ab koi aasmaan hai na zamin

ek duniyaa hui hai zer-e-nagin

shah-nashin ho gayaa hai khaak-nashin

· · ·

tu saath hai magar kahin teraa pataa nahin

shaakhon pe duur tak koi pattaa haraa nahin

khaamoshiyaan bhari hain fazaaon mein in dinon

ham ne bhi mausamon se idhar kuchh kahaa nahin

· · ·

koi suntaa hi nahin kis ko sunaane lag jaaein

dard agar uTThe to kyaa shor machaane lag jaaein

bhed aisaa ki girah jis ki talab karti hai umr

ramz aisaa ki samajhne mein zamaane lag jaaein

· · ·