ba-rang-e-khvaab main bikhraa rahungaa — Akram Naqqash

"ai abr-e-iltifaat tiraa e'tibaar phir aankhon mein phir vo pyaas vahi intizaar phir rakhkhun kahaan pe paanv baDhaaun kidhar qadam rakhsh-e-khayaal aaj hai be-ikhtiyaar phir dast-e-junun-o-panja-e-vahshat chihaar-samt be-barg-o-baar hone lagi hai bahaar phir paspaaiyon ne gaaD diye daant pusht par yuun daaman-e-ghurur huaa taar taar phir nishtar tiri zabaan hi nahin khaamshi bhi hai kuchh rah-guzaar-e-rabt hui khaar-zaar phir mujh mein koi savaal tire maa-sivaa nahin mujh mein yahi savaal huaa ek baar phir"

"TuuTi hui shabih ki taskhir kyaa karein bujhte hue khayaal ko zanjir kyaa karein andhaa safar hai ziist kise chhoD de kahaan uljhaa huaa saa khvaab hai taabir kyaa karein siine mein jazb kitne samundar hue magar aankhon pe ikhtiyaar ki tadbir kyaa karein bas ye huaa ki raasta chup-chaap kaT gayaa itni si vaardaat ki tashhir kyaa karein saaat koi guzaar bhi lein ji to lein kabhi kuchh aur apne baab mein tahrir kyaa karein"

"kuchh faasla nahin hai adu aur shikast mein lekin koi suraagh nahin hai giraft mein kuchh dakhl ikhtiyaar ko ho bud-o-hast mein sar kar luun ye jahaan-e-alam ek jast mein ab vaadi-e-badan mein koi boltaa nahin suntaa huun aap apni sadaa baaz-gasht mein rukh hai mire safar kaa alag teri samt aur ik su-e-murgh-zaar chale ek dasht mein kis shaah kaa guzar hai ki mafluj jism-o-jaan ji jaan se juTe hue hain band-o-bast mein ye puchh aa ke kaun nasibon jiyaa hai dil mat dekh ye ki kaun sitaara hai bakht mein kis soz ki kasak hai nigaahon ke aas paas kis khvaab ki shikast umaD aai hai tasht mein"

"dasht ko DhunDne niklun to jazira nikle paanv rakhkhun jo main viraane mein duniyaa nikle ek biphraa huaa dariyaa hai mire chaar taraf tu jo chaahe isi tufaan se kinaara nikle ek mausam hai dil o jaan pe faqat din ho ki raat aasmaan koi ho dil par vahi taaraa nikle dekhtaa huun main tiri raah mein daam-e-hairat raushni raat se aur dhuup se saaya nikle is se pahle ye kabhi dil ne kahaa hi kab thaa raat kuchh aur baDhe chaand dobaara nikle aankh jhukti hai to milti hai khamoshi ko zabaan band honTon se koi boltaa dariyaa nikle ishq ik aisi haveli hai ki jis se baahar koi darvaaza khule aur na daricha nikle sehr ne tere ajab raah sujhaai hamdam ham kahaan jaane ko nikle the kahaan aa nikle"

"gahri suuni raah aur tanhaa saa main raat apni chaap se Dartaa saa main tu ki meraa aaina hotaa huaa aur tere aks mein Dhaltaa saa main kab tire kuche se kar jaanaa hai kuuch is tasavvur se hi ghabraataa saa main meri raahon ke liye manzil tu hi tere qadmon ke liye rastaa saa main aasmaan mein rang bikhraataa saa tu aur saraapaa diid ban jaataa saa main hasrat-e-taabir se chhuTun kabhi har nafas is khvaab mein jaltaa saa main be-karaan hotaa huaa dasht-e-gumaan aur yaqin ke daar par aayaa saa main naa koi manzar na ab koi khayaal ab har ik shai bhultaa jaataa saa main"

"hairat ke daftar jaaun main apne andar jaaun aankhein chaar karun sab se aaine se Dar jaaun duniyaa mil hi jaaegi ziine chand utar jaaun aisaa koi pal aae saae se baahar jaaun tujh ko sochun pal bhar main zanjiron se bhar jaaun jis raste hain khaar babul us raste aksar jaaun dukh ke jangal se niklun teri raahguzar jaaun raat falak par ubhre to main taaron se bhar jaaun koi pal ko akelaa chhoD koi kaam to kar jaaun"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"