Ghazal

ik gali se khushbu ki rasm-o-raah kaafi hai

laakh jabr mausam ho ye panaah kaafi hai

niyyat-e-zulekhaa ki khoj mein rahe duniyaa

apni be-gunaahi ko dil gavaah kaafi hai

· · ·

ayaan donon se takmil-e-jahaan hai

zamin gum ho to phir kyaa aasmaan hai

tilsmaati koi qissa hai duniyaa

yahaan har din nai ik daastaan hai

· · ·

zindagi-bhar ek hi kaar-e-hunar karte rahe

ik gharaundaa ret kaa thaa jis ko ghar karte rahe

ham ko bhi maalum thaa anjaam kyaa hogaa magar

shahr-e-kufa ki taraf ham bhi safar karte rahe

· · ·

zamin pe insaan khudaa banaa thaa vabaa se pahle

vo khud ko sab kuchh samajh rahaa thaa vabaa se pahle

palak jhapakte hi saaraa manzar badal gayaa hai

yahaan to mela lagaa huaa thaa vabaa se pahle

· · ·

khushi kaa lamha ret thaa so haath se nikal gayaa

vo chaudhvin kaa chaand thaa andheri shab mein Dhal gayaa

hai vasf us ke paas ye badal sake har ek shai

so mujh ko bhi badal diyaa aur aap bhi badal gayaa

· · ·

jism-o-jaan mein dar aai is qadar aziyyat kyuun

zindagi bhalaa tujh se ho rahi hai vahshat kyuun

silsila mohabbat kaa sirf khvaab hi rahtaa

apne darmiyaan aakhir aa gai haqiqat kyuun

· · ·

milaa bhi ziist mein kyaa ranj-e-rah-guzaar se kam

so apnaa shauq-e-safar bhi nahin ghubaar se kam

tire firaaq mein dil kaa ajiib aalam hai

na kuchh khumaar se baDh kar na kuchh khumaar se kam

· · ·

ab asiri ki ye tadbir hui jaati hai

ek khushbu miri zanjir hui jaati hai

ik hasin khvaab ki aankhon se nikaltaa hi nahin

ek vahshat hai ki taabir hui jaati hai

· · ·

charaagh ghar mein jalaa nahin hai

ye raat kaa masala nahin hai

ye raat tum se nahin kaTegi

ye hijr hai rat-jagaa nahin hai

· · ·

dil jin ko DhunDhtaa hai na-jaane kahaan gae

khvaab-o-khayaal se vo zamaane kahaan gae

maanus baam-o-dar se nazar puchhti rahi

un mein base vo log puraane kahaan gae

· · ·

shab thi be-khvaab ik aarzu der tak

shahr-e-dil mein phiri ku-ba-ku der tak

chaandni se tasavvur kaa dar vaa huaa

tum se hoti rahi guftugu der tak

· · ·

kab mausam-e-bahaar pukaaraa nahin kiyaa

ham ne tire baghair gavaara nahin kiyaa

duniyaa to ham se haath milaane ko aai thi

ham ne hi e’tibaar dobaara nahin kiyaa

· · ·

bahte hue ashkon ki ravaani nahin likkhi

main ne gham-e-hijraan ki kahaani nahin likkhi

jis din se tire haath se chhuTaa hai miraa haath

us din se koi shaam suhaani nahin likkhi

· · ·

main use dekh rahi huun baDi hairaani se

jo mujhe bhuul gayaa is qadar aasaani se

khud se ghabraa ke yahi kahti huun auron ki tarah

khauf aataa hai mujhe shahr ki viraani se

· · ·

ai khudaa ajab hai tiraa jahaan miraa dil yahaan pe lagaa nahin

jahaan koi ahl-e-vafaa nahin kisi lab pe harf-e-duaa nahin

baDaa shor thaa tire shahr kaa so guzaar aae hain din vahaan

vo sakun ki jis ki talaash hai tire shahr mein bhi milaa nahin

· · ·

ho gai baat puraani phir bhi

yaad hai mujh ko zabaani phir bhi

mauja-e-gham ne to dam toD diyaa

rah gayaa aankh mein paani phir bhi

· · ·

ye shoale aazmaanaa jaante hain

so ham daaman bachaanaa jaante hain

taalluq jo bhi rakkho soch lenaa

ki ham rishta nibhaanaa jaante hain

· · ·

tumhaaraa jo sahaaraa ho gayaa hai

bhanvar bhi ab kinaaraa ho gayaa hai

mohabbat mein bhalaa kyaa aur hotaa

miraa ye dil tumhaaraa ho gayaa hai

· · ·

is aarzi duniyaa mein har baat adhuri hai

har jiit hai laa-haasil har maat adhuri hai

kuchh der ki rim-jhim ko maalum nahin shaayad

jal-thal na ho aangan to barsaat adhuri hai

· · ·

main ne sochaa hai raat-bhar tum ko

kaash ho jaae ye khabar tum ko

zindagi mein kabhi kisi ko bhi

main ne chaahaa nahin magar tum ko

· · ·

vo masihaa na banaa ham ne bhi khvaahish nahin ki

apni sharton pe jiye us se guzaarish nahin ki

us ne ik roz kiyaa ham se achaanak vo savaal

dhaDkanein tham si gaiin vaqt ne jumbish nahin ki

· · ·

dhyaan mein aa kar baiTh gae ho tum bhi naan

mujhe musalsal dekh rahe ho tum bhi naan

de jaate ho mujh ko kitne rang nae

jaise pahli baar mile ho tum bhi naan

· · ·

jab se zindagi huaa dil gardish-e-taqdir kaa

roz baDh jaataa hai ik halqa miri zanjir kaa

mere hisse mein kahaan thiin ujlaton ki manzilein

mere qadmon ko sadaa rasta milaa taakhir se

· · ·

sitaara-baar ban jaae nazar aisaa nahin hotaa

har ik ummid bar aae magar aisaa nahin hotaa

mohabbat aur qurbaani mein hi taamir muzmar hai

dar-o-divaar se ban jaae ghar aisaa nahin hotaa

· · ·