milaa bhi ziist mein kyaa ranj-e-rah-guzaar se kam — Ambareen Haseeb Ambar

"ayaan donon se takmil-e-jahaan hai zamin gum ho to phir kyaa aasmaan hai tilsmaati koi qissa hai duniyaa yahaan har din nai ik daastaan hai jo tum ho to ye kaise maan luun main ki jo kuchh hai yahaan bas ik gumaan hai saron par aasmaan hote hue bhi jise dekho vahi be-saaebaan hai kisi dharti ki shaayad ret hogi hamaare vaaste jo kahkashaan hai agar thaa chand-roza mausam-e-gul to phir do chaar hi din ki khizaan hai jise umr-e-ravaan kahte hain 'amabar' chalo dekhein kahaan tak raaegaan hai"

"zindagi-bhar ek hi kaar-e-hunar karte rahe ik gharaundaa ret kaa thaa jis ko ghar karte rahe ham ko bhi maalum thaa anjaam kyaa hogaa magar shahr-e-kufa ki taraf ham bhi safar karte rahe uD gae saare parinde mausamon ki chaah mein intizaar un kaa magar buDhe shajar karte rahe yuun to ham bhi kaun saa zinda rahe is shahr mein zinda hone ki adaakaari magar karte rahe aankh rah takti rahi dil us ko samjhaataa rahaa apnaa apnaa kaam donon umr-bhar karte rahe ik nahin kaa khauf thaa so ham ne puchhaa hi nahin yaad kyaa ham ko bhi vo divaar-o-dar karte rahe"

"zamin pe insaan khudaa banaa thaa vabaa se pahle vo khud ko sab kuchh samajh rahaa thaa vabaa se pahle palak jhapakte hi saaraa manzar badal gayaa hai yahaan to mela lagaa huaa thaa vabaa se pahle tum aaj haathon se duriyaan naapte ho socho dilon mein kis darja faasla thaa vabaa se pahle ajiib si dauD mein sab aise lage hue the makaan makinon ko DhunDhtaa thaa vabaa se pahle ham aaj khalvat mein is zamaane ko ro rahe hain vo jis se sab ko bahut gila thaa vabaa se pahle na jaane kyon aa gayaa duaa mein miri vo bachcha saDak pe jo phuul bechtaa thaa vabaa se pahle duaa ko uTThe hain haath 'amabar' to dhyaan aayaa ye aasmaan surkh ho chukaa thaa vabaa se pahle"

"khushi kaa lamha ret thaa so haath se nikal gayaa vo chaudhvin kaa chaand thaa andheri shab mein Dhal gayaa hai vasf us ke paas ye badal sake har ek shai so mujh ko bhi badal diyaa aur aap bhi badal gayaa machal rahaa thaa dil bahut so dil ki baat maan li samajh rahaa hai naa-samajh ki daav us kaa chal gayaa ye dauD bhi ajiib si hai faisla ajib-tar ki faateh-e-hayaat vo jo gir ke phir sambhal gayaa samajh liyaa aham nahin main us ke vaaste magar nazar phir us se mil gai ye dil ki phir bahal gayaa ajiib meraa aks thaa utar ke us ki aankh mein sanvaaraa mujh ko is tarah ki aaina hi jal gayaa"

"jism-o-jaan mein dar aai is qadar aziyyat kyuun zindagi bhalaa tujh se ho rahi hai vahshat kyuun silsila mohabbat kaa sirf khvaab hi rahtaa apne darmiyaan aakhir aa gai haqiqat kyuun faisla bichhaDne kaa kar liyaa hai jab tum ne phir miri tamannaa kyaa phir miri ijaazat kyuun ye ajiib uljhan hai kis se puchhne jaaein aaine mein rahti hai sirf ek surat kyuun karr-o-farr se nikle the jo sameTne duniyaa bhar ke apne daaman mein aa gae nadaamat kyuun aap se mukhaatib huun aap hi ke lahje mein phir ye barhami kaisi aur ye shikaayat kyuun"

"ik gali se khushbu ki rasm-o-raah kaafi hai laakh jabr mausam ho ye panaah kaafi hai niyyat-e-zulekhaa ki khoj mein rahe duniyaa apni be-gunaahi ko dil gavaah kaafi hai umr-bhar ke sajdon se mil nahin saki jannat khuld se nikalne ko ik gunaah kaafi hai aasmaan pe jaa baiThe ye khabar nahin tum ko arsh ke hilaane ko ek gunaah kaafi hai pairvi se mumkin hai kab rasaai manzil tak naqsh-e-paa miTaane ko gard-e-raah kaafi hai chaar din ki hasti mein hans ke ji liye 'amabar' be-nashaat duniyaa se ye nibaah kaafi hai"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"