Ghazal

koi khushi na koi ranj mustaqil hogaa

fanaa ke rang se har rang muttasil hogaa

ajab hai ishq ajab-tar hain khvaahishein is ki

kabhi kabhi to bichhaDne talak ko dil hogaa

· · ·

ham be-vafaa hain tum ho vafaa-daar khush raho

sarkaar khush raho miri sarkaar khush raho

le jaao apni zulf ke saae sameT kar

ham ko bahut hai saaya-e-divaar khush raho

· · ·

hai kaun kis ki zaat ke andar likheinge ham

nahr-e-ravaan ko pyaas kaa manzar likheinge ham

ye saara shahr aalaa-e-hikmat likhe use

khanjar agar hai koi to khanjar likheinge ham

· · ·

bahte dariyaaon tak aaeinge uThaa leinge tumhein

mere honThon se khabar-daar churaa leinge tumhein

jam' ho jaae zaraa aur khamoshi dil mein

ham isi dil ki khamoshi se banaa leinge tumhein

· · ·

rang tamaam bhar chuki subh-ba-khair zindagi

mujh mein qazaa nikhar chuki subh-ba-khair zindagi

tere bhi zakhm bhar diye aur havaa-e-vaqt ab

mere bhi zakhm bhar chuki subh-ba-khair zindagi

· · ·

vo maarka ki aaj bhi sar ho nahin sakaa

main thak ke muskuraa diyaa jab ro nahin sakaa

is baar ye huaa tiri yaadon ki bhiiD mein

har gaam khud ko mil gayaa main kho nahin sakaa

· · ·

maddham hui to aur nikharti chali gai

zinda hai ek yaad jo marti chali gai

thi zindagi ki misl shab-e-hijr dosto

aur zindagi ki misl guzarti chali gai

· · ·

vo aasmaan ki hadon kaa shu'ur ho jaanaa

magar ye kyaa ki zaminon se duur ho jaanaa

us ek ashk kaa bahnaa nasheb-e-jaan ki taraf

aur andarun mein har samt nuur ho jaanaa

· · ·

khud ko har aarzu ke us paar kar liyaa hai

ham ne ab us kaa saaya divaar kar liyaa hai

jaati thi mere dil se jo tere aastaan tak

duniyaa ne us gali mein baazaar kar liyaa hai

· · ·

ai junun-e-'ishq teri tang-dasti ki taraf

hasraton se tak rahe hain apni hasti ki taraf

chaand bhi fursat se thaa to baaton baaton mein yunhi

ghuum aae ham tiri yaadon ki basti ki taraf

· · ·

tamaam lafz-o-ma’aani mein khaak uDti hai

hamaari sehr-bayaani mein khaak uDti hai

havaa khamir mein shaamil hai meri khaak ke saath

to meri saari kahaani mein khaak uDti hai

· · ·

dopahar mein bhi vahi sham' jalaae hue din

apne kaandhon pe shab-e-hijr uThaae hue din

tum se bichhDe the to divaar ki maanind thi raat

aur phir bas usi mahtaab ke saae hue din

· · ·

kis se ruk saktaa thaa jo kaar-e-ziyaan hone ko thaa

raaegaan hotaa gayaa jo raaegaan hone ko thaa

tum the tanhaai thi lekin ham na jaane kis liye

ruk gae varna vo lamha jaavedaan hone ko thaa

· · ·

khushbu-e-raaegaani aa'saab muzmahil se

ham bhi khajil khajil se tum bhi khajil khajil se

aavaaz de rahi hain naadida kahkashaaein

lekin mafar kahaan is zindaan-e-aab-o-gil se

· · ·

aankh ki raah se yaa dil ki Dagar se pahle

us ki marzi vo chalaa aae jidhar se pahle

baDh gai phailti afvaah se raftaar miri

mil gayaa main mire milne ki khabar se pahle

· · ·

main vo charaagh sadaa jis ne ikhtilaaf kiyaa

vagarna sab ne havaaon kaa e'tiraaf kiyaa

bikhar rahi hai mire dil mein raushni har su

vahin se yaad ne teri jahaan shigaaf kiyaa

· · ·

badalte vaqt se badlaa nahin nazaara-e-'ishq

vo aasmaan-e-khamoshi vahi sitaara-e-'ishq

ham ahl-e-'ishq ko aataa hai hukm-e-'ishq sadaa

kitaab-e-'ishq se karte hain istikhaara-e-'ishq

· · ·

savaal-e-dast-e-gadaai pe khatm hotaa hai

ye shahr khud se laDaai pe khatm hotaa hai

musaafiraan-e-mohabbat ko manzilein kab hain

safar ye aabla-paai pe khatm hotaa hai

· · ·

dhammaal vo paDaa ki badan past ho gayaa

aai jo mujh ko hijr ki bu mast ho gayaa

sab tiir mere qalb se ho kar guzar gae

lekin vo ek tiir ki paivast ho gayaa

· · ·

bimaar-e-aagahi tiri vajh-e-shifaa hai dil

mushkil-parast 'aql to mushkil-kushaa hai dil

TuuTe na koi khvaab to dil koi shai nahin

khvaabon ke TuTne ki khanakti sadaa hai dil

· · ·

sulagti dhuup barasti ghaTaa nahin aai

hamaare jism pe koi qabaa nahin aai

tumhaare saath bhi aai na zindagi ham tak

tumhaare baa'd bhi ham tak qazaa nahin aai

· · ·

jo hogi subh to lauTeinge shaam se nikle

tamaam 'ishq ke naakaam kaam se nikle

tu mujh ko chhu ki tiri ungliyaan mahak uTThein

ye meraa jism bhi fikr-e-davaam se nikle

· · ·

kaisi jaadu-bayaaniyaan ham the

jab tumhaari kahaaniyaan ham the

hamein DhunDo na raaegaani mein

raaegaan raaegaaniyaan ham the

· · ·

rudaad-e-jaan kahein jo zaraa dam mile hamein

us dil ke raaste mein kai kham mile hamein

labbaik pahle ham ne kahaa thaa rasul-e-husn

ho kaar-zaar-e-ishq to parcham mile hamein

· · ·