Ghazal

nazar ko vaqf-e-hairat kar diyaa hai

use bhi dil se rukhsat kar diyaa hai

baraae-naam thaa aaraam jis ko

ghazal kah kar musibat kar diyaa hai

· · ·

har-chand be-navaa hai kore ghaDe kaa paani

divaan 'mir' kaa hai kore ghaDe kaa paani

uplon ki aag ab tak haathon se jhaankti hai

aankhon mein jaagtaa hai kore ghaDe kaa paani

· · ·

soch ki uljhi hui jhaaDi ki jaanib jo gai

aas ki rangin titli khuun kaa chhinTaa ho gai

us ki khushbu thi miri aavaaz thi kyaa chiiz thi

jo daricha toD kar nikli fazaa mein kho gai

· · ·

zalzale kaa khauf taari hai dar-o-divaar par

jabki main baiThaa huaa huun kaanpte minaar par

haan isi raste mein hai shahr-e-nigaar-e-aarzu

aap chalte jaaiye mere lahu ki dhaar par

· · ·

hamaari jiit hui hai ki donon haare hain

bichhaD ke ham ne kai raat din guzaare hain

hanuz siine ki chhoTi si qabr khaali hai

agarche is mein janaaze kai utaare hain

· · ·

yaar ko dida-e-khun-baar se ojhal kar ke

mujh ko haalaat ne maaraa hai mukammal kar ke

jaanib-e-shahr faqiron ki tarah koh-e-giraan

pheink detaa hai bukhaaraat ko baadal kar ke

· · ·

jab dil hi nahin baaqi vo aatish paaraa saa

kyuun raqs mein rahtaa hai palkon pe sharaaraa saa

vo mauj hamein le kar girdaab mein jaa nikli

jis mauj mein raushan thaa sarsabz kinaaraa saa

· · ·

dil-e-pur-khun ko yaadon se ulajhtaa chhoD dete hain

ham is vahshi ko jangal mein akelaa chhoD dete hain

na jaane kab koi bhige hue manzar mein aa nikle

dayaar-e-ashk mein palkein jhapaknaa chhoD dete hain

· · ·

bhige sher ugalte jivan biit gayaa

ThanDi aag mein jalte jivan biit gayaa

yuun to chaar-qadam par meri manzil thi

lekin chalte chalte jivan biit gayaa

· · ·

dayaar-e-hijr mein khud ko to aksar bhuul jaataa huun

tujhe bhi main tiri yaadon mein kho kar bhuul jaataa huun

'ajab din the ki barson zarb-e-khushbu yaad rahti thi

'ajab din hain ki fauran zakhm-e-khanjar bhuul jaataa huun

· · ·

siine mein sulagte hue lamhaat kaa jangal

kis tarah kaTe taaron bhari raat kaa jangal

haan dast-shanaasi pe baDaa naaz thaa us ko

dekhaa na gayaa us se mire haat kaa jangal

· · ·

aarzu-e-davaam kartaa huun

zindagi vaqf-e-aam kartaa huun

aap se ikhtilaaf hai lekin

aap kaa ehtiraam kartaa huun

· · ·

zakhm sahe mazduri ki

saans kahaani puuri ki

jazbe ki har konpal ko

aag lagi majburi ki

· · ·

jab bhi hansi ki gard mein chehra chhupaa liyaa

be-laus dosti kaa baDaa hi mazaa liyaa

ik lamha-e-sukun to milaa thaa nasib se

lekin kisi sharir sadi ne churaa liyaa

· · ·

gham ki saughaat hai khamoshi hai

chaandni raat hai khamoshi hai

main akelaa nahin ki baatein hon

vo mire saat hai khamoshi hai

· · ·

sirf mere liye nahin rahnaa

tum mire baad bhi hasin rahnaa

peD ki tarah jis jagah phuTaa

umr-bhar hai mujhe vahin rahnaa

· · ·

jab main us ke gaanv se baahar niklaa thaa

har raste ne meraa rasta rokaa thaa

mujh ko yaad hai jab us ghar mein aag lagi

uupar se baadal kaa TukDaa guzraa thaa

· · ·

qarib aa ke bhi ik shakhs ho sakaa na miraa

yahi hai meri haqiqat yahi fasaana miraa

ye aur baat ki mujh ko na mil sakaa ab tak

tire jahaan mein kahin hai sahi Thikaana miraa

· · ·

vahi khvaabida khaamoshi vahi taarik tanhaai

tumhein paa kar bhi koi khaas tabdili nahin aai

agar jaan se guzar jaaun to main uupar ubhar aauun

ki laashon ko ugal deti hai dariyaaon ki gahraai

· · ·

bikhre bikhre baal aur surat khoi khoi

man ghaayal karti hain aankhein roi roi

malbe ke niche se niklaa maan kaa laasha

aur maan ki godi mein bachchi soi soi

· · ·