zalzale kaa khauf taari hai dar-o-divaar par — Aslam Kolsarii

"har-chand be-navaa hai kore ghaDe kaa paani divaan 'mir' kaa hai kore ghaDe kaa paani uplon ki aag ab tak haathon se jhaankti hai aankhon mein jaagtaa hai kore ghaDe kaa paani jab maangte hain saare angur ke sharaare apni yahi sadaa hai kore ghaDe kaa paani kaaghaz pe kaise Thahrein misre miri ghazal ke lafzon mein bah rahaa hai kore ghaDe kaa paani khaana-ba-dosh chhori takti hai chori chori us kaa to aaina hai kore ghaDe kaa paani chiDiyon si chahchahaaein panghaT pe jab bhi sakhiyaan chup-chaap ro diyaa hai kore ghaDe kaa paani us ke lahu mein shaayad taasir ho vafaa ki jis ne kabhi piyaa hai kore ghaDe kaa paani izzat zamir mehnat daanish hunar mohabbat lekin kabhi bikaa hai kore ghaDe kaa paani dekhun jo chaandni mein lagtaa hai mujh ko 'aslam' pighli hui duaa hai kore ghaDe kaa paani"

"soch ki uljhi hui jhaaDi ki jaanib jo gai aas ki rangin titli khuun kaa chhinTaa ho gai us ki khushbu thi miri aavaaz thi kyaa chiiz thi jo daricha toD kar nikli fazaa mein kho gai aakhir-e-shab duur kohsaaron se barfaani havaa shahr mein aai mire kamre mein aa kar so gai chand chhilkon aur ik buDhi bhikaaran ke sivaa rail-gaaDi aakhiri manzil pe khaali ho gai is qadar melaa na thaa jis par kisi kaa naam thaa phir bhi 'aslam' aankh chhalki aur kaaghaz dho gai"

"hamaari jiit hui hai ki donon haare hain bichhaD ke ham ne kai raat din guzaare hain hanuz siine ki chhoTi si qabr khaali hai agarche is mein janaaze kai utaare hain vo koele se miraa naam likh chukaa to use sunaa hai dekhne vaalon ne phuul maare hain ye kis balaa ki zabaan aasmaan ko chaaT gai ki chaand hai na kahin kahkashaan na taare hain mujhe bhi khud se adaavat hui to zaahir hai ki apne dost mujhe zindagi se pyaare hain nahin ki arsa-e-girdaab hi ghanimat thaa magar yaqin to dilaao yahi kinaare hain ghalat ki koi sharik-e-safar nahin 'aslam' sulagte aks hain jalte hue ishaare hain"

"yaar ko dida-e-khun-baar se ojhal kar ke mujh ko haalaat ne maaraa hai mukammal kar ke jaanib-e-shahr faqiron ki tarah koh-e-giraan pheink detaa hai bukhaaraat ko baadal kar ke jal uThein ruuh ke ghaav to chhiDak detaa huun chaandni mein tiri yaadon ki mahak hal kar ke dil vo majzub mughanni ki jalaa detaa hai ek hi aah se har khvaab ko jal-thal kar ke jaane kis lamha-e-vahshi ki talab hai ki falak dekhnaa chaahe mire shahr ko jangal kar ke yaani tartib-e-karam kaa bhi saliqa thaa use us ne patthar bhi uThaayaa mujhe paagal kar ke iid kaa din hai so kamre mein paDaa huun 'aslam' apne darvaaze ko baahar se muqaffal kar ke"

"jab dil hi nahin baaqi vo aatish paaraa saa kyuun raqs mein rahtaa hai palkon pe sharaaraa saa vo mauj hamein le kar girdaab mein jaa nikli jis mauj mein raushan thaa sarsabz kinaaraa saa taaraa saa bikhartaa hai aakaash se yaa koi Thahre hue aansu ko kartaa hai ishaaraa saa tinkon ki tarah har shab tan-man ko bahaa le jaae ik barson se bichhDi hui aavaaz kaa dhaaraa saa jaise koi kam kam ho shaayad vahi 'aslam' ho is raah se guzraa hai ik hijr kaa maaraa saa"

"nazar ko vaqf-e-hairat kar diyaa hai use bhi dil se rukhsat kar diyaa hai baraae-naam thaa aaraam jis ko ghazal kah kar musibat kar diyaa hai samajhte hain kahaan patthar kisi ki magar itmaam-e-hujjat kar diyaa hai gali-kuchon mein jalti raushni ne hasin shaamon ko shaamat kar diyaa hai basirat ek daulat hi thi aakhir so daulat ko basirat kar diyaa hai kai hamdam nikal aae hain jab se zabaan ko sirf ghibat kar diyaa hai sukhan ke baab mein bhi ham ne 'aslam' jo karnaa thaa ba-ujlat kar diyaa hai"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"taavil-e-ahd-e-fan hi to vahshat kaa hal nahin pesh-e-nazar junun hai yaaro ghazal nahin ab is ke baad ahd ki taarik raat hai ye ikhtitaam-e-shaam hai subh-e-azal nahin ai dost ishq mansab-e-fahm-o-shuur hai ye irtiqaa hai zehn kaa koi khalal nahin ik umr ratjagon ki aziyyat mein kaaT di ab mere khvaab niind kaa radd-e-amal nahin kyaa kyaa ataa-e-neamat-e-rabb-e-karim hai lekin 'samir' dard kaa nemul-badal nahin"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"raakh ke Dher pe kyaa shoala-bayaani karte ek qisse ki bhalaa kitni kahaani karte husn itnaa thaa ki mumkin hi na thi khud-nigari ek imkaan ki kab tak nigaraani karte shola-e-jaan ko bujhaate yunhi qatra qatra khud ko ham aag banaate tujhe paani karte phuul saa tujh ko mahaktaa huaa rakhte shab bhar apne saanson se tujhe raat ki raani karte naddiyaan dekhein to bas sharm se paani ho jaaein chashm-e-khun-basta se paidaa vo ravaani karte sab se kahte ki ye qissa hai puraanaa saahab aah ki aanch se tasvir puraani karte dar-o-divaar badalne mein kahaan ki mushkil ghar jo hotaa to bhalaa naql-e-makaani karte koi aa jaataa kabhi yunhi agar dil ke qarib ham tiraa zikr pae-yaad-dahaani karte sach to ye hai ki tire hijr kaa ab ranj nahin kyaa dikhaave ke liye ashk-fishaani karte dil ko har lahza hi di aql pe ham ne tarjih yaar-e-jaani ko kahaan dushman-e-jaani karte shab isi tarah basar hoti hai meri 'irfaan' harf-e-khush-rang ko andoh-e-maaani karte"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"