Ghazal

vafaa khulus kaa singaar roz karti hai

yuun dhire dhire miri zindagi sanvarti hai

koi hayaat zamaane ko hai 'aziz bahut

koi hayaat hai ki roz roz marti hai

· · ·

kabhi madhur kabhi miThi zabaan kaa shaa'ir huun

isi sanad se main hindostaan kaa shaa'ir huun

dikheinge mujh mein tumhein zakhm ghaav dono hi

khilaaf-e-zulm ke aajiz bayaan kaa shaa'ir huun

· · ·

shahr ko aatish-e-ranjish ke dhuaan tak dekhun

maqtal ziist ko aakhir main kahaan tak dekhun

phir ye maanungaa khamoshi pe zavaal aayaa hai

dil dhaDakne ki sadaa jab main zabaan tak dekhun

· · ·

mire vajud kaa mehvar chamaktaa rahtaa hai

isi sanad se muqaddar chamaktaa rahtaa hai

kisi mazaar pe chhaai hai khaak muflis ki

kisi mazaar kaa patthar chamaktaa rahtaa hai

· · ·

jo daulat taraqqi-rasaai bahut hai

to aapas mein us se judaai bahut hai

agar tujh mein ulfat samaai bahut hai

to sun lo yahaan be-vafaai bahut hai

· · ·

khvaabon kaa intikhaab badaltaa dikhaai de

kaash ab ki ikhtiyaar sanvartaa dikhaai de

sayyaad ke hunar ki sataaish nahin ho ab

jis ko hai par nasib vo uDtaa dikhaai de

· · ·

bas ranj ki hai daastaan unvaan hazaaron

jiine ke liye mar gae insaan hazaaron

vo jis ne miri ruuh ko dard-aashnaa rakkhaa

hain mujh pe usi zakhm ke ehsaan hazaaron

· · ·

khaamosh zabaan se jab taqrir nikalti hai

lagtaa hai ki pairon se zanjir nikalti hai

TuuTaa huaa badhnaa thaa shaayad ki vuzu kaa ho

aisi bhi to purkhon ki jaagir nikalti hai

· · ·

jafaaon ki numaaish hai kisi se kuchh nahin bolein

sitamgar ki sataaish hai kisi se kuchh nahin bolein

mujhe tanhaai paDhni hai magar khaamosh lahje mein

yahi mahfil ki khvaahish hai kisi se kuchh nahin bolein

· · ·

guzre hue lamhaat ko ab DhunD rahaa huun

main apne muqaddar mein ghazab DhunD rahaa huun

sajde kaa sabab jaan ke shirin hai pareshaan

farhaad ne kah Daalaa ke rab DhunD rahaa huun

· · ·

abr-e-baaraan kaa intizaar kiyaa

jab kabhi diida ashk-baar kiyaa

tum to phulon ki raah se guzre

main ne ne kaanTon ko rahguzaar kiyaa

· · ·

hamesha vaahid-e-yaktaa bayaan se guzraa hai

khudaa kaa zikr jab apni zabaan se guzraa hai

lakir khinch ke nur-e-gumaan se guzraa hai

mujhe yaqin hai koi aasmaan se guzraa hai

· · ·

gar eqtidaar-e-sukun eqtidaar-e-vahshat hai

to phir dayaar-e-mohabbat dayaar-e-vahshat hai

daraaz ho rahe imkaan bhi ab ibaadat ke

hisaar-e-bandagi goyaa hisaar-e-vahshat hai

· · ·

tasbih-e-qumri sarv-e-sanobar sameT lo

jaanaa hai is dayaar se manzar sameT lo

parvaaz-e-kaamyaabi ki bas itni shart hai

chaahat hisaar-e-nafas ke andar sameT lo

· · ·

aazurda nigaahon pe ye manzar nahin utraa

sahraa-e-tasavvur mein koi ghar nahin utraa

jab mil gayaa irfaan-e-nazar mujh ko khudaa se

phir kyuun mire ehsaas se mahshar nahin utraa

· · ·

ye kam nahin ke vahi shaam kaa sitaara hai

jise fazilat-e-tanhaai ne ubhaaraa hai

kahin suraagh nahin hai kisi bhi qaatil kaa

lahuluhaan magar shahr kaa nazaara hai

· · ·