tasbih-e-qumri sarv-e-sanobar sameT lo — Azhar Hashmi Sabqat

"kabhi madhur kabhi miThi zabaan kaa shaa'ir huun isi sanad se main hindostaan kaa shaa'ir huun dikheinge mujh mein tumhein zakhm ghaav dono hi khilaaf-e-zulm ke aajiz bayaan kaa shaa'ir huun main apni fikr ko mahdud rakh nahin saktaa zamin-o-arsh makin-o-makaan kaa shaa'ir huun gumaan kahtaa hai ke main yaqin kaa shaa'ir huun yaqin kahtaa hai ke main gumaan kaa shaa'ir huun jahaan hai zarra qamar aur jahaan qamar zarra main us zamin kaa main us aasmaan kaa kaa shaa'ir huun abhi mujhe na sukhanvar kaho mire ahbaab abhi sukhan mein faqat imtihaan kaa shaa'ir huun mujhe na dekho yuun nafrat bhari nigaahon se main 'haashmi' huun main amn-o-amaan kaa shaa'ir huun"

"shahr ko aatish-e-ranjish ke dhuaan tak dekhun maqtal ziist ko aakhir main kahaan tak dekhun phir ye maanungaa khamoshi pe zavaal aayaa hai dil dhaDakne ki sadaa jab main zabaan tak dekhun ye tamannaa hai khudaa aalam-e-hasti mein tire main ayaan dekhnaa chaahun to nihaan tak dekhun jab ki ab raabta rakhne kaa bahut hai imkaan phir bhi viraaniyaan phailin hain jahaan tak dekhun kyaa tasavvur miri aankhon ne navaazaa hai mujhe khud ko dekhun to main ehsaas-e-ziyaan tak dekhun maantaa huun ki hai zulmaat-e-azal us kaa nasib raat ki zid hai use apni fughaan tak dekhun ye bhi aslaaf ki tahzib hai 'azhar' main yahaan apnaa kirdaar tamaam amn-e-amaan tak dekhun"

"mire vajud kaa mehvar chamaktaa rahtaa hai isi sanad se muqaddar chamaktaa rahtaa hai kisi mazaar pe chhaai hai khaak muflis ki kisi mazaar kaa patthar chamaktaa rahtaa hai ye kaisi rasm-e-halaakat bhi paa gai hai rivaaj ye kaise khuun kaa manzar chamaktaa rahtaa hai miri nigaah ko manzil ki raushni hai aziiz balaa se mel kaa patthar chamaktaa rahtaa hai jo uTh ke khaak se parvaaz kaa ujaalaa banaa usi parinde kaa shahpar chamaktaa rahtaa hai miTaa ke hausle baatil ke aao su-e-haq qadam baDhaao ki rahbar chamaktaa rahtaa hai nujum shams qamar aur jalne lagte hain sukhan-varon mein jab 'azhar' chamaktaa rahtaa hai"

"jo daulat taraqqi-rasaai bahut hai to aapas mein us se judaai bahut hai agar tujh mein ulfat samaai bahut hai to sun lo yahaan be-vafaai bahut hai kabhi dard maan ko nahin do ki is ki har ek aah mein gahri khaai bahut hai khudaa ki razaa hai na haasil kisi ko khudaa ke liye par laDaai bahut hai mohabbat luTaai hai apno pe behad magar choT apno se khaai bahut hai haqiqat mein vo daur kaafi hai mujh se tasavvur mein jo paas aai bahut hai siyaasat ne jashn-e-charaaghaan ke badle gharibon ki basti jalaai bahut hai har ik shai se le kar zamin-o-falak ko mayassar khudaa ki khudaai bahut hai agar mujh ko imaan ki parvaah na hoti to duniyaa mein 'azhar' kamaai bahut hai"

"khvaabon kaa intikhaab badaltaa dikhaai de kaash ab ki ikhtiyaar sanvartaa dikhaai de sayyaad ke hunar ki sataaish nahin ho ab jis ko hai par nasib vo uDtaa dikhaai de itni na intishaar ki hiddat ho ru-ba-ru insaan gham-e-hayaat mein jaltaa dikhaai de kyaa vo hisaab dars mein rakkhegaa kaaenaat jis kaa yahaan vajud shikasta dikhaai de"

"vafaa khulus kaa singaar roz karti hai yuun dhire dhire miri zindagi sanvarti hai koi hayaat zamaane ko hai 'aziz bahut koi hayaat hai ki roz roz marti hai tire charaagh kaa faanus khud havaa hai aur mire charaagh se zaalim havaa guzarti hai to phir vajud-e-imaarat nazar kaa hai dhoka jab iinT iinT hi taa'mir se mukarti hai du'aa ye kijiye yaaron ki hosh mein aauun miri nigaah mohabbat talaash karti hai na khud ke rahtaa hai insaan na dusron ke qarib koi hasin shanaasaai jab bikharti hai sitamgaron ko 'ibaadat-guzaar mat jaano khudaa ki bandagi 'azhar' khudaa se Darti hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"