Ghazal

kise khabar hai main dil se ki jaan se guzrungaa

jo baar baar saf-e-dushmanaan se guzrungaa

yaqin bhi tujhe aaegaa meri hasti par

yahi nahin ki main tere gumaan se guzrungaa

· · ·

zaahir miri shikast ke aasaar bhi nahin

mujh ko yaqin fath kaa is baar bhi nahin

qaid-e-makaan se dekhiye kab tak rihaai ho

ab tak to bad-gumaan dar-o-divaar bhi nahin

· · ·

khud apnaa eatibaar ganvaataa rahaa huun main

zarre ko aaftaab bataataa rahaa huun main

andhi havaa ko duun koi ilzaam kis liye

apne diye ko aap bujhaataa rahaa huun main

· · ·

is bahr-e-be-sadaa mein kuchh aur niche jaaein

aavaaz kaa khazina shaayad tahon mein paaein

galiyon mein saD rahi hain biite dinon ki laashein

kamre mein gunjti hain be-naam si sadaaein

· · ·

habs ke dinon mein bhi ghar se kab nikalte hain

daaere ke andar hi raaste badalte hain

khuun jaltaa rahtaa hai gaanv ke javaanon kaa

kaar-khaane shahron ke kab dhuaan ugalte hain

· · ·

aisaa lagtaa hai mukhaalif hai khudaai meri

koi kartaa hi nahin khul ke buraai meri

mujh mein madfun baDe shahr-e-maaani the magar

duur tak kar na sakaa vaqt khudaai meri

· · ·

ik husn-e-be-misaal ke jo ru-ba-ru huun main

mahsus ho rahaa hai khud apnaa 'adu huun main

apni giraft-e-shauq se niklun to kis tarah

phailaa huaa jahaan mein har ek su huun main

· · ·

bhulaa-bisraa khvaab hue ham

kuchh aise naayaab hue ham

dariyaa ban kar suukh gae the

qatre se sairaab hue ham

· · ·