Ghazal

aah asar ho gai to kyaa hogaa

be-asar ho gai to kyaa hogaa

shaam-e-gham aa chale tasavvur mein

ab sahar ho gai to kyaa hogaa

· · ·

lab pe hai fariyaad ashkon ki ravaani ho chuki

ik kahaani chhiD rahi hai ik kahaani ho chuki

mehr ke parde mein puuri dil-sitaani ho chuki

banda-parvar rahm kijiye mehrbaani ho chuki

· · ·

zinda huun is tarah ki gham-e-zindagi nahin

jaltaa huaa diyaa huun magar raushni nahin

vo muddatein hui hain kisi se judaa hue

lekin ye dil ki aag abhi tak bujhi nahin

· · ·

ik be-vafaa ko pyaar kiyaa haae kyaa kiyaa

khud dil ko be-qaraar kiyaa haae kyaa kiyaa

maa'lum thaa ki 'ahd-e-vafaa un kaa jhuuT hai

is par bhi e'tibaar kiyaa haae kyaa kiyaa

· · ·

tumhaare husn ki taskhir aam hoti hai

ki ik nigaah mein duniyaa tamaam hoti hai

jahaan pe jalva-e-jaanaan hai anjuman-aaraa

vahaan nigaah ki manzil tamaam hoti hai

· · ·

apni nai zamin nayaa aasmaan rahe

haan is jahaan se duur hi apnaa jahaan rahe

ham ne to is chaman se lagaayaa kabhi na dil

ham be-niyaaz-e-fikr-e-gham-e-aashiyaan rahe

· · ·

ai dil tujhe khabar hai ki kyaa kar rahaa huun main

jo haq hai zindagi kaa adaa kar rahaa huun main

tum ho jafaa-navaaz jafaa kar rahe ho tum

main huun vafaa-parast vafaa kar rahaa huun main

· · ·

baatein na kare kyon dil-e-naashaad tumhaari

har vaqt sataati hai ise yaad tumhaari

kuchh munh se nahin kahte hain ham 'ishq ke maare

khaamosh sahaa karte hain bedaad tumhaari

· · ·

har shai ko mire dil se bhulaate hue aate

aanaa thaa to behosh banaate hue aate

madhoshiyon ko hosh mein laate hue aate

aate miri duniyaa ko jagaate hue aate

· · ·

koi chashm-o-nazar se duur kyon hai

mohabbat is qadar majbur kyon hai

ye jalvon se fazaa maamur kyon hai

har ik zarra misaal-e-tur kyon hai

· · ·

mohabbat ki main zindagi ban gayaa huun

zahe be-khudi be-khudi ban gayaa huun

mohabbat kaa har rang dekhaa hai main ne

kabhi miT gayaa huun kabhi ban gayaa huun

· · ·

na ye puchho ki kyaa yaad aa rahaa hai

mohabbat mein khudaa yaad aa rahaa hai

khalish si phir hui paidaa jigar mein

mujhe ik bevafaa yaad aa rahaa hai

· · ·

basar ham 'ajab zindagi kar rahe hain

kabhi ji rahe hain kabhi mar rahe hain

ye naale ye aahein jo ham bhar rahe hain

unhein ru-shanaas-e-sitam kar rahe hain

· · ·

tum se nazar ke saamne aayaa na jaa sakaa

shaayad nazar kaa baar uThaayaa na jaa sakaa

ham se tiraa tasavvur-e-rangin tiraa khayaal

kiin laakh koshishein pe bhulaayaa na jaa sakaa

· · ·

shab thi nazar mein shaam se pahle

vaaqif thaa anjaam se pahle

rahbar manzil ban jaati hai

yaad tiri har gaam se pahle

· · ·

un ko but samjhaa thaa yaa un ko khudaa samjhaa thaa main

haan bataa de ai jabin-e-shauq kyaa samjhaa thaa main

allaah allaah kyaa inaayat kar gai mizraab-e-ishq

varna saaz-e-zindagi ko be-sadaa samjhaa thaa main

· · ·

khushi mahsus kartaa huun na gham mahsus kartaa huun

magar haan dil mein kuchh kuchh zer-o-bam mahsus kartaa huun

mohabbat ki ye nairangi bhi duniyaa se niraali hai

alam koi nahin lekin alam mahsus kartaa huun

· · ·

tujh par miri mohabbat qurbaan ho na jaae

ye kufr baDhte baDhte imaan ho na jaae

allaah ri be-naqaabi us jaan-e-muddaaa ki

meri nigaah-e-hasrat hairaan ho na jaae

· · ·

masrur bhi huun khush bhi huun lekin khushi nahin

tere baghair ziist to hai zindagi nahin

main dard-e-aashiqi ko samajhtaa huun jaan-o-ruh

kambakht vo bhi dil mein kabhi hai kabhi nahin

· · ·

khudaa ko DhunD rahaa thaa kahin khudaa na milaa

zahe-nasib ki bande ko muddaaa na milaa

nigaah-e-shauq mein be-nuriyon kaa rang baDhaa

nigaah-e-shauq ko jab koi dusraa na milaa

· · ·

tire ishq mein zindagaani luTaa di

ajab khel khelaa javaani luTaa di

nahin dil mein daagh-e-tamannaa bhi baaqi

unhin par se un ki nishaani luTaa di

· · ·

yuun to jo chaahe yahaan saahab-e-mahfil ho jaae

bazm us shakhs ki hai tu jise haasil ho jaae

naakhudaa ai miri kashti ke chalaane vaale

lutf to jab hai ki har mauj hi saahil ho jaae

· · ·

ruh-e-ravaan-e-naghma tum naghmon kaa soz-o-saaz main

jaan-e-khayaal-o-khvaab tum jaan-e-jahaan-e-naaz main

haamil-e-kaif-o-naaz tum haamil-e-soz-o-saaz main

ek jahaan-e-raaz tum ek jahaan-e-raaz main

· · ·

tasavvur mein koi phir aa rahaa hai

ilaahi khair dil ghabraa rahaa hai

vo yuun dil ki fazaa par chhaa rahe hain

ki dil maghrur hotaa jaa rahaa hai

· · ·