Ghazal

dil jalaa phir charaagh jalte hi

apne dukh bhi hain shaam jaise hi

kitne chehre utar gae dekho

dhuup divaar se utarte hi

· · ·

lahje ko phuul lafz ko jugnu agar karein

vaqt-e-ravaan ke saath maaani safar karein

andar ki baarishon ne jo manzar dikhaae hain

baahar ki dhup-chhaanv ko is ki khabar karein

· · ·

suraj ko kyaa pata hai kidhar dhuup chaahiye

aangan baDaa hai apne bhi ghar dhuup chaahiye

aaine TuuT TuuT ke bikhre hain chaar-su

DhunDeinge aks aks magar dhuup chaahiye

· · ·

jazire hon ki vo sahraa hon khvaab honaa hai

samundaron ko kisi din saraab honaa hai

savaal puchhne vaalo tumhein bhi aakhir-e-kaar

rahin-e-minnat-e-baar-e-javaab honaa hai

· · ·

zamin ke saath falak ke safar mein ham bhi hain

qafas-nasib sahi baal-o-par mein ham bhi hain

vahin se luuT gai raaston ki tanhaai

jahaan pe us ne ye jaanaa safar mein ham bhi hain

· · ·

akelaa ghar hai kyon rahte ho kyaa deti hain divaarein

yahaan to hansne vaalon ko rulaa deti hain divaarein

inhein bhi apni tanhaai kaa jab ehsaas hotaa hai

to gahri niind se mujh ko jagaa deti hain divaarein

· · ·

dhuup kaa ehsaas jaane kyuun use hotaa nahin

vaqt aavaara hai ThanDi chhaanv mein hotaa nahin

jhuuT ki divaar se laTke hue jismon ke din

ho gae puure ki sach to shab mein bhi sotaa nahin

· · ·

is taraf aag kaa dariyaa hai udhar khaai hai

ham ne bhi paar utarne ki qasam khaai hai

apne kamre se nikal kar zaraa dekho to sahi

dhuup divaar se aangan mein utar aai hai

· · ·

kyon kisi ko DhunDte ho haath mein le kar charaagh

ab kahaan vo gaanv hote the jahaan ghar ghar charaagh

dekhnaa us ko agar hai in charaaghon ko bujhaao

kaise dekhoge use tum saamne rakh kar charaagh

· · ·

khvaab aankhon ki gali chhoD ke jaane nikle

ham idhar niind ki divaar giraane nikle

dhuul raste kaa muqaddar hai to rasta kyaa hai

bas yahi baat zamaane ko bataane nikle

· · ·

aankh ki putli mein suraj sar mein kuchh saudaa ugaa

paaniyon mein surkh paude dhuup mein saayaa ugaa

aasmaan ki bhiiD mein to is liye sochaa gayaa

is zamin ki chhaatiyon se nuur kaa chashma ugaa

· · ·

shaam kaa rang jo gahraa huaa aaine mein

ik sitaara saa chamakne lagaa aaine mein

sab khilaunon ki tarah TuuT rahe hain pal-pal

aur ye manzar mujhe Dastaa huaa aaine mein

· · ·

nasiba jaag uTThaa aur muqaddar ban gayaa apnaa

jahaan divaar hai us ki vahin ghar ban gayaa apnaa

na jaane dhuup ne apni zabaan mein kyaa kahaa us se

shajar ke jism se saaya nikal kar ban gayaa apnaa

· · ·

miraa dusraa rukh dikhaa de mujhe

mire saamne se haTaa de mujhe

baDi der se qaid mein huun tiri

parinda samajh kar uDaa de mujhe

· · ·

vo chingaariyon ko havaa de gayaa

samundar thaa lekin ye kyaa de gayaa

main jalte charaaghon ki saanson mein huun

koi jaagne ki duaa de gayaa

· · ·

tumhaaraa rang rang-e-aasmaan jaisaa badaltaa hai

kisi ko chaahne vaalaa kahin itnaa badaltaa hai

sabaa shabnam shafaq rukhsaar gul mahtaab in sab kaa

tumhaaraa naam letaa huun to kyuun chehra badaltaa hai

· · ·

paagal si havaa Dhalti hui shaam samundar

aise hi kahin le na tiraa naam samundar

viraanon mein bhaTkein ki tire shahr mein Thahrein

aankhon mein dar aataa hai sar-e-shaam samundar

· · ·

havaa bahut tez chal rahi hai charaagh-e-jaan phir bhi jal rahaa hai

ye kaun hai jo hamaare pichhe havaa ke hamraah chal rahaa hai

gumaan ki basti mein rahne vaalo zaraa pahaaDi pe chaDh ke dekho

udhar nadi hai vahin se shahr-e-yaqin kaa rasta nikal rahaa hai

· · ·

baarish hogi to baarish mein donon mil kar bhigeinge

ret pe ek musaafir kaa ghar aur samundar bhigeinge

achchhaa main haaraa tum jiite aage ki ik baat suno

ab ke baras jab baarish hogi soch samajh kar bhigeinge

· · ·