Ghazal

"chaal us ne kyon chali hai dekhnaa ye bhi to hai aag dil mein kyaa lagi hai dekhnaa ye bhi to hai sirf lahja khub-surat hai to is se kyaa gharaz baat kaisi ho rahi hai dekhnaa ye bhi to hai dil kaa vo achchhaa hai lekin ham se us ki dushmani 'aarzi hai daaimi hai dekhnaa ye bhi to hai kaamyaabi par miri masrur honaa aap kaa zaahiri hai baatini hai dekhnaa ye bhi to hai aap kaa nazrein milaanaa muskuraa kar dekhnaa pyaar hai yaa dil-lagi hai dekhnaa ye bhi to hai ye jo aankhon ko nazar aati hai 'haamid' raushni kyaa ye sach-much raushni hai dekhnaa ye bhi to hai"

"log ham se khushi se milte hain aap kyon be-dili se milte hain martabe mein kami to aaegi aap kyon har kisi se milte hain tum se mil ke gumaan hotaa hai jaise ham ajnabi se milte hain zillatein jhiDkiyaan pareshaani saare gham mai-kashi se milte hain aap par e'tibaar hai varna ham kahaan har kisi se milte hain raushni ruuh mein utarti hai jab khudaa ke vali se milte hain"

"ham dil-jalon ke saamne baatein visaal ki zaalim tiri sazaaein hain kitne kamaal ki is husn pe tumhaare kai tabsire hue taa'rif ho rahi hai hamaare khayaal ki tum ne zaraa si baat pe Thukraa diyaa mujhe ab khoj kar rahe ho kisi khush-khisaal ki ye bhi zaraa bataao takabbur ki zad mein the gar tum sunaa rahe ho kahaani zavaal ki sau baar us kaa shukr karein kyon na ham adaa ham ko khilaa rahaa hai jo rozi halaal ki ham ko bhi apni ek jhalak hi dikhaao naa baatein bahut suni hain tumhaare jamaal ki ummid hai uThaaoge tum bhi du'aa ko haath jis din khabar sunoge mire intiqaal ki"

"hazaar baar dikhaai gai pari-surat nigaah ko na tashaffi hui kisi surat main apne aap se uktaa ke tere paas aayaa tiri nazar mein mili phir mujhe miri surat isi umiid pe saanson se jang jaari hai kabhi to ru-baru hogi mire tiri surat hisaar-e-zaat se niklaa to ye khulaa mujh par bhali ke bhes mein pinhaan thi kyaa buri surat khataa mu'aaf ki hai mo'tarif tiraa 'haamid' tire 'alaava bachi hi nahin koi surat"

"'aasi se khush nahin hai vali se bhi khush nahin ye kaun shakhs hai jo kisi se bhi khush nahin khush thaa tire baghair to jaltaa thaa ji tiraa aankhon mein hai nami to nami se bhi khush nahin kal meri kam-nigaahi pe maatam-zada thaa tu ab ye sitam ki dida-vari se bhi khush nahin kyaa masala hai tujh ko bataa kuchh to mere yaar gham se bhi khush nahin tu khushi se bhi khush nahin ham to samajh rahe the ujaale se bair hai ye hukmraan to tira-shabi se bhi khush nahin 'haamid' kaa kyaa hai haal mujhe kuchh khabar bhi hai tere baghair ab vo pari se bhi khush nahin"

"kis baat kaa hai un ko gila sun to lijiye kyon aap se hain log khafaa sun to lijiye phir jo mizaaj-e-yaar mein aae karein janaab kaise hui khilaaf havaa sun to lijiye faanus bhi thaa aur havaa bhi na thi to phir kaise miraa charaagh bujhaa sun to lijiye har koi jaantaa hai ki mujrim nahin hain ham phir kyon mili hai ham ko sazaa sun to lijiye rishte mein apne aai nahin yuun hi ye khaTaas kis ne ye saaraa khel rachaa sun to lijiye"

"us be-khabar ko fikr kahaan ab idhar ki hai ik ham ki ham ko fikr usi be-khabar ki hai mushkil bahut hai ab ki tabi'at bahaal ho ye jo nazar lagi hai kisi bad-nazar ki hai jis rahguzar pe mushkilein leti hain imtihaan ham ko talaash ab bhi usi rahguzar ki hai itnaa buraa na maan farishta nahin huun main ehsaan bhuul jaane ki fitrat bashar ki hai ab kis ko jaa ke dard kaa dukhDaa sunaaun main ye sab 'ataa to khud hi mire chaaraagar ki hai main kyaa huun kyaa bisaat miri kuchh nahin huun main zarra-navaazi aap ke husn-e-nazar ki hai 'haamid' ghalat hai ye ki munaasib nahin hai daam dastaar ki nahin hai ye qimat to sar ki hai"

"yaad maazi ki dilaaungaa chalaa jaaungaa aag siine mein lagaaungaa chalaa jaaungaa yaar do chaar harifon ki taraf kyaa dekhun saikDon dil mein samaaungaa chalaa jaaungaa ab ke aayaa huun to aaina-numaa logon ko sach kaa aaina dikhaaungaa chalaa jaaungaa tere honTon pe tabassum ko sajaane ke liye diip yaadon ke jalaaungaa chalaa jaaungaa haath hi sirf milaanaa miri fitrat mein nahin dil bhi logon se milaaungaa chalaa jaaungaa meri aamad pe bhalaa itni qayaamat kyon hai daagh siine ke dikhaaungaa chalaa jaaungaa"