Ghazal

chaliye mushkil hai agar jiinaa to mar jaate hain

bojh ham ruuh pe apni hain utar jaate hain

khud ko aaina banaa rakkhaa hai jab se ham ne

us taraf dekhne kyaa ahl-e-nazar jaate hain

· · ·

mushkil mein hai jaan bahut

jaan hai ab hairaan bahut

us patthar-dil insaan par

hote rahe qurbaan bahut

· · ·

aae hain saraae mein to ghar jaaeinge kyaa hai

ham log kisi roz guzar jaaeinge kyaa hai

ham pasta qadon ko to bataa deinge bulandi

uDne se agar apne ye par jaaeinge kyaa hai

· · ·

charaagh ishq ke dil mein jalaae jaate hain

baDe hi shauq se sadme uThaae jaate hain

unhein sukun mile ik yahi tamanna hai

agarche ham ko vo ji-bhar rulaae jaate hain

· · ·

us se milaa to dil miraa sarshaar ho gayaa

aur phir bichhaD ke khud se hi bezaar ho gayaa

kauDi ke bhaav biktaa hai is daur mein zamir

insaan kaa vajud hi baazaar ho gayaa

· · ·

ye meraa dil kahaan hai ab tumhaari raajdhaani hai

mire dil par tumhaare dard-o-gham ki hukmraani hai

suno kuchh to kaho tum kyon bhalaa yuun ruuTh baiThi ho

hamesha main ne meri jaan tumhaari baat maani hai

· · ·

sach kahne se yaar khafaa ho jaate hain

dil ke sab armaan havaa ho jaate hain

had se ziyaada izzat dene par dekho

aise vaise log khudaa ho jaate hain

· · ·

dil mein jagah duun tum ko apne pahle se hain mehmaan bahut

tum dekho koi aur Thikaana ho jaaoge pareshaan bahut

us ko bhulaane ki koshish main jitni kartaa huun yaaro

us ki yaad ke siine mein mire chubhte hain paikaan bahut

· · ·

jo gai ham se ruuTh kar aavaaz

haae kitni thi mo'atabar aavaaz

shor duniyaa kaa sunte phirte hain

dil ki suntaa nahin magar aavaaz

· · ·

dil kare jab aap kaa mujh ko rulaayaa kijiye

aap gham ki ye davaa mere khudaaraa kijiye

lutf aae aap ko saare jahaan se jiit kaa

mere jaise jaan kar khud se hi haaraa kijiye

· · ·

apne liye rahaa kabhi us ke rahaa khilaaf

meraa mizaaj sab ke liye ek saa khilaaf

aise bhi yaar hotaa hai koi bhalaa khilaaf

hoti hai juun charaagh ke yaaro havaa khilaaf

· · ·

dekhe hain dil-nashin manaazir hijaab ke

hote hain rang sainkaDon paagal jo khvaab ke

khushbu jise samajhte ho hai khun-e-zakhm-e-gul

dekhe nahin hain zakhm kisi ne gulaab ke

· · ·

tujh ko chhu kar halaal kar duun kyaa

aaj main ye kamaal kar duun kyaa

jis kaa saani na ho zamaane mein

main tumhein be-misaal kar duun kyaa

· · ·

dil mein bas jaan saa main rahtaa huun

khud mein mehmaan saa main rahtaa huun

kitne aabaad dil kiye main ne

khud mein viraan saa main rahtaa huun

· · ·

tum ko vafaa se kyaa matlab hai jaao apnaa kaam karo

din-bhar bhaTke aavaara se ab jaa kar aaraam karo

kab rokaa hai main ne tum ko meri baatein karne se

naam agar hotaa hai tumhaaraa to mujh ko badnaam karo

· · ·

baahar nahin to khud hi ke andar talaash kar

sahraa hai jis jagah pe samundar talaash kar

mumkin hai ye ki meri rag-e-jaan ko kaaT de

isaar-o-aashiqi kaa tu khanjar talaash kar

· · ·

meri jaisi us ki haalat kab hogi

us ko jaane mujh se mohabbat kab hogi

us ke liye main khud se laDtaa rahtaa huun

us ke dil ko us se adaavat kab hogi

· · ·

ek gham hi to yaar hai apnaa

dil jo un par nisaar hai apnaa

ham to kab ke hi mar gae yaaro

kis ko ab intizaar hai apnaa

· · ·

donon mein thi havas ki mohabbat to thi nahin

yaani vafaa ki un ko zarurat to thi nahin

achchhaa to chaahti thiin zamaane se tum mujhe

lab par kabhi tumhaare shikaayat to thi nahin

· · ·

rote rote vo ho gayaa khaamosh

kyaa huaa puchhaa to kahaa khaamosh

jis ko kahte the ghaazi-e-guftaar

us ko haalaat ne kiyaa khaamosh

· · ·

dil mein jo thaa vo ho gayaa mujh ko sunaa ke chup

sun kar huaa huun us ko main aansu bahaa ke chup

kahtaa thaa apnaa haal main tum ko sunaaungaa

na jaane kyon vo ho gayaa aansu bahaa ke chup

· · ·

baDi mushkil hain raahein sun mohabbat ki zamaane mein

ki pal pal marnaa paDtaa hai ise dil se nibhaane mein

mohabbat se mile zakhmon ko main gauhar samajhtaa huun

izaafa hi izaafa hai mire dil ke khazaane mein

· · ·

jiinaa dushvaar kar liyaa hogaa

mujh ko dildaar kar liyaa hogaa

mujh ko taskin mil gai yaani

us ne iftaar kar liyaa hogaa

· · ·

ye ishq ke sataae kareinge laDaai khaak

ghar phunk ke kiyaa hai tamaashaa uDaai khaak

ham se jo ho sakaa to mohabbat mein ye kiyaa

dil ko jalaa ke raah-e-vafaa mein bujhaai khaak

· · ·