Ghazal

main ne saanson se guftugu ki hai

saath chalne ki aarzu ki hai

gum-shuda vaqt ke musaafir ko

phir se paane ki justuju ki hai

· · ·

raah ko aazmaa ke dekho to

ik qadam phir baDhaa ke dekho to

ek nannhi si aarzu ke liye

khvaab mein ghar banaa ke dekho to

· · ·

jo bhi honaa thaa vo huaa achchhaa

tu hai achchhaa tiraa khudaa achchhaa

main saraabon mein kho gayaa thaa kahin

na safar thaa na faasla achchhaa

· · ·

miri zindagi hai saraab si kabhi maujzan kabhi tishna-dam

kabhi intizaar ki dhuup si kabhi qurbaton kaa koi bharam

tiri chaahaton kaa ye silsila kisi dhuup chhaanv ke khel saa

kabhi puus maagh ki dhuup saa kabhi naghma-khvaan kabhi chashm-e-nam

· · ·

baat ki baat rahe baat kaa mafhum rahe

aur takhayyul miraa taaza rahe maasum rahe

har nai soch ko mazmun banaa lungaa magar

meraa kirdaar miri zaat se mausum rahe

· · ·

shaahraahein nahin Dagar to hai

manzilein naa sahi safar to hai

duur sahraa mein ek chhoTaa saa

be-samar hi sahi shajar to hai

· · ·

miraa vajud mire e'tibaar jaisaa hai

kabhi visaal kabhi intizaar jaisaa hai

mujhe to us ki masihaai par thaa naaz bahut

magar vo khud hi baDaa be-qaraar jaisaa hai

· · ·

tiraa khayaal mujhe is tarah pukaartaa hai

ki mandiron mein koi aarti utaartaa hai

hilorein leti hai kuchh is tarah tiri yaadein

nadi mein jaise koi kashtiyaan utaartaa hai

· · ·

basaarat kho gai hai raushni mein

maza aane lagaa hai tirgi mein

saraabon se saraabon ke safar tak

taDap baDhti gai hai tishnagi mein

· · ·

tumhaaraa zikr miri daastaan ban baiThaa

main ek zarra thaa aur aasmaan ban baiThaa

savaal karte hain rah-rah ke mujh se lail-o-nahaar

main apni zaat se kyuun bad-gumaan ban baiThaa

· · ·

ik puraani sharaab jaisaa ishq

mujh se khaana-kharaab jaisaa ishq

'mir' ki ek ghazal saa dil-afroz

ik muqaddas kitaab jaisaa ishq

· · ·