Ghazal

baDhaa hai soz-e-jigar ab madad ko aae koi

ghazab ki aag lagi hai zaraa bujhaae koi

paDi hai dil ko mire khud bhi aadat-e-fariyaad

ye chheDtaa hai har ik ko ki phir sataae koi

· · ·

na aarzu-e-jafaa ba-qadam nikaal ke chal

paDe hain raah mein kuchh dil bhi dekh bhaal ke chal

chalaa jo hashr mein main sun ke aamad-e-jaanaan

ye iztiraab pukaaraa ki dil sambhaal ke chal

· · ·

gardish mein aaina ho na kyuun rozgaar kaa

chullu mein khuun liye huun dil-e-be-qaraar kaa

bhaDki hui thi surkh gulon se chaman mein aag

daaman na jal gayaa ho nasim-e-bahaar kaa

· · ·

dil-e-sozaan-e-aashiq makhzan-e-rang-e-vafaa hogaa

vo hissa qadr ke qaabil hai jitnaa jal gayaa hogaa

chale the dard ko sun kar thame ye kah ke raste mein

na jaanaa ab munaasib hai vo kab kaa mar gayaa hogaa

· · ·

zindagi kaa mazaa nahin miltaa

but mile to khudaa nahin miltaa

manzil-e-aakhiri hai qabr miri

ab koi raasta nahin miltaa

· · ·

ab tak to kami kuchh na hui daagh-e-jigar mein

barson se charaagh ek hi jaltaa rahaa ghar mein

zaahir mein hanse vo magar aansu nikal aae

thaa koi asar bhi mire marne ki khabar mein

· · ·

thi chaal hashr mein bhi qayaamat huzur ki

sach puchhiye to jheinp gai aankh huur ki

sach hai ki raaz-e-vasl chhupaanaa nahin hai sahl

main kyaa kahun jo kahti hai chitvan huzur ki

· · ·

aag jab zakhm-e-jigar be-intihaa dene lage

chaara-gar ghabraa ke uf uf ki sadaa dene lage

ab kahaan thaa main jo detaa is mohabbat kaa javaab

jis ki turbat dekh li mujh ko sadaa dene lage

· · ·

shab-e-firaaq mein ye dil se guftugu kyaa hai

mari umiid hain vo un ki aarzu kyaa hai

ragein tamaam badan ki idhar ko khinchti hain

kisi kaa haath qarib-e-rag-e-gulu kyaa hai

· · ·

haath se dil ro ke khonaa yaad hai

apni kashti ko Dubonaa yaad hai

munh chhupaa kar mujh ko ronaa yaad hai

vo khajil har ik se honaa yaad hai

· · ·

kahaa jo us ne ki kahiye to kuchh gilaa kyaa hai

miri zabaan se niklaa ki faaeda kyaa hai

udaas dekh ke mahfil ko meri kahte hain

yahaan bhi koi musibat kaa mubtalaa kyaa hai

· · ·

hai rang-e-hinaa jin mein vahi haath dikhaa de

hasrat hai ki phir dil mein koi aag lagaa de

yaktaai kaa daavaa to bahut kuchh hai miri jaan

kyaa ho jo koi aaina mahfil mein dikhaa de

· · ·

hai yaad josh ye jis vaqt ashk-baari thi

to ek nahr usi aastin se jaari thi

zamin-e-baagh pe girte hain TuuT kar taare

sitaara-daar qabaa us ne kyuun utaari thi

· · ·

mujh ko jiine se faaeda bhi nahin

aur phir marzi-e-khudaa bhi nahin

nahin maalum kyaa main kahtaa huun

tum nahin ho to kyaa khudaa bhi nahin

· · ·

kabhi andhere se ghabraae raushni se kabhi

kabhi bujhaae charaagh aur kabhi jalaae charaagh

vo bujhte dil ko na dekhein kisi ke khuub hai ye

vo munh ko pher lein jis vaqt jhilmilaae charaagh

· · ·

jhuTi tasalliyon pe shab-e-gham basar hui

uThi chamak jo zakhm mein samjhaa sahar hui

har har nafas chhuri hai liye qat-e-shaam-e-hijr

yaa aaj dam nikal hi gayaa yaa sahar hui

· · ·