Ghazal

ho na kuchh baat magar shor machaae rakhnaa

is tarah auron ko hamdard banaae rakhnaa

tum agar chaahte ho sab tumhein hans hans ke milein

apnaa gham apne hi siine mein chhupaae rakhnaa

· · ·

kis kaa lab par mire fasaanaa hai

hama-tan-gosh ik zamaana hai

zindagi ek khvaab hai lekin

is haqiqat ko kis ne jaanaa hai

· · ·

ik nihattaa aadmi tadbir se

kyaa laDe taqdir ki shamshir se

muskuraanaa zer-e-lab har vaqt hi

koi sikhe aap ki tasvir se

· · ·

be-taabiyon mein ashkon mein naalon mein ghir gae

yaa'ni ham apne chaahne vaalon mein ghir gae

aayaa na khvaab mein bhi kabhi apnaa kuchh khayaal

ham is qadar andheron ujaalon mein ghir gae

· · ·

jab koi gham hi na ho ashk bahaaun kaise

khud ko duniyaa ki adaakaari sikhaaun kaise

teri har ek jhalak aur baDhaati hai talab

aise mein pyaas nigaahon ki bujhaaun kaise

· · ·

zer-e-lab un kaa muskuraa denaa

dil mein shahnaaiyaan bajaa denaa

jaane vaale ye baat yaad rahe

ham ko aasaan nahin bhulaa denaa

· · ·

kisi se rabt nahin hai kisi se pyaar mujhe

na jaane rahtaa hai phir kis kaa intizaar mujhe

har ek saans miri umr ko ghaTaati hai

nafas kaa taar hai goyaa kafan kaa taar mujhe

· · ·

vafaa ke baraabar jafaa chaahtaa huun

tiraa hausla dekhnaa chaahtaa huun

har ik dil mein ho intihaa ki mohabbat

main is daur ki ibtidaa chaahtaa huun

· · ·

dard-e-dil ki davaa na ho jaae

zindagi be-mazaa na ho jaae

lutf deti hai kyaa umid-e-vafaa

bevafaa baa-vafaa na ho jaae

· · ·

jab nigaahein laDin nigaahon se

aandhiyaan uTThin dil ki raahon se

jurm saabit na ho to jurm nahin

qatl karte raho nigaahon se

· · ·

jo log ujaale ko ujaalaa nahin kahte

ham un ko buraa kahte hain achchhaa nahin kahte

jo joD na de TuuTe hue taar dilon ke

ham us ko mohabbat kaa taraanaa nahin kahte

· · ·

us zulf ki tausif bataai nahin jaati

ik lambi kahaani hai sunaai nahin jaati

dil hai ki maraa jaataa hai didaar ki khaatir

ham hain ki udhar aankh uThaai nahin jaati

· · ·