Ghazal

khaamushi hi khaamushi mein daastaan bantaa gayaa

meraa har aansu mire gham ki zabaan bantaa gayaa

aap kaa gham jab sharik-e-qalb-o-jaan bantaa gayaa

ashk kaa har qatra bahr-e-be-karaan bantaa gayaa

· · ·

sahraa mein jo divaane se baad-e-sabaa uljhi

har mauj-e-gul-e-tar se vo zulf-e-dotaa uljhi

ilzaam nahin tujh par ai baadiya-paimaai

divaane ki qismat se sahraa ki havaa uljhi

· · ·

sambhal kar aah bharnaa ai asir-e-daam-e-tanhaai

kahin haathon se chhuT jaae na daamaan-e-shakebaai

ajab andaaz rakhti hai adaa-e-dasht-paimaai

ki khud hi khaar baDh kar chumte hain paa-e-saudaai

· · ·

soe hue zehnon mein naadida saveraa hai

suraj ke bhi ugne par har samt andheraa hai

afsurda dilon mein bhi armaanon kaa Deraa hai

sukhi hui shaakhon par chiDiyon kaa baseraa hai

· · ·

ki ehtiyaat dil ne bahut par kahaa gayaa

chhoDi jo un ki raah to dar dar kahaa gayaa

saaqi ne mere naam pe saaghar paTak diyaa

tishna-labi ko meraa muqaddar kahaa gayaa

· · ·

jhuum ke saaghar kaun uThaae kis ko paDi maikhaane ki

saaqi ko bhi hosh nahin hai qismat hai paimaane ki

gulshan gulshan yuun phirti hai chaak-garebaan phuul ki khushbu

jaise sabaa ne phailaa di ho baat kisi divaane ki

· · ·

zindagi maut ke aaghosh se paidaa karnaa

Duub kar bahr mein tufaan se khelaa karnaa

aae ronaa bhi to hansne kaa iraada karnaa

josh-e-gham mein na kabhi zabt se guzraa karnaa

· · ·

sukun paayaa tabiat ne na dil ko hi qaraar aayaa

jo aansu aankh mein aayaa baDaa be-e'tibaar aayaa

kisi kaa baankpan saare zamaane mein pukaar aayaa

chamak aankhon mein aai nok-e-mizhgaan par nikhaar aayaa

· · ·

savaad-e-manzar-e-khvaab-e-pareshaan kaun dekhegaa

asir-e-zulf ho kar shaam-e-hijraan kaun dekhegaa

gulon ki dilkashi fasl-e-bahaaraan kaun dekhegaa

na honge jab hamin rang-e-gulistaan kaun dekhegaa

· · ·

phuul khilte hi agar paanv mein chhaale honge

ai junun dasht-navardi ke bhi laale honge

un pe ho jaaeinge taamir haqiqat ke mahal

ham ne jo khvaab kabhi zehan mein paale honge

· · ·