Ghazal

vo jaa chuke hain magar khalfashaar baaqi hai

jo intizaar thaa vo intizaar baaqi hai

bas itni baat mire shahr-e-yaar baaqi hai

ki nashsha TuuT chukaa hai khumaar baaqi hai

· · ·

fan ki aur zaat ki paikaar ne sone na diyaa

dil mein jaage hue fankaar ne sone na diyaa

har taraf tapti hui dhuup mire saath gai

zer-e-saaya kisi divaar ne sone na diyaa

· · ·

har chand apnaa haal na ham se bayaan huaa

ye harf-e-be-vajud magar daastaan huaa

maanaa ki ham pe aaj koi mehrbaan huaa

dil kaanptaa hai ye bhi agar imtihaan huaa

· · ·

rah-e-hayaat mein koi charaagh hi na milaa

kisi dimaagh se apnaa dimaagh hi na milaa

gham-e-zamaana se fursat to mil bhi sakti thi

tumhaari yaad se lekin faraagh hi na milaa

· · ·

main lamha lamha nae apne khadd-o-khaal mein thaa

ki jo bhi kuchh thaa main apni shikast-e-haal mein thaa

nazar paDaa to vo aise na dekhaa ho jaise

vo aks aks thaa aur apne hi jamaal mein thaa

· · ·

har taraf tazkira-e-jurm-o-sazaa hotaa hai

aaj ham samjhe ki banda bhi khudaa hotaa hai

jaise rahte hon kisi shakhs ki jaagir mein ham

dil mein rah rah ke ye ehsaas saa kyaa hotaa hai

· · ·

dil hai chup bol rahaa ho jaise

khud mein gham ghol rahaa ho jaise

ab vo yuun dekh rahaa hai mujh ko

zarf ko tol rahaa ho jaise

· · ·

apni hasti nazar aai thi abhi

saans se shama bujhaai thi abhi

kaun ho saktaa hai aane vaalaa

ek aavaaz si aai thi abhi

· · ·

karb hai karb ki aavaaz baraabar hai yahi

teri qimat hai yahi teraa muqaddar hai yahi

ji mein hai ab kisi darvaaze pe dastak de duun

aur phir puchhun ki ai shakhs miraa ghar hai yahi

· · ·

tiri hi tarah hamein yaad aane vaalaa ho

tire sivaa bhi koi to sataane vaalaa ho

har ek subh yahi dil mein huuk uThti hai

hamein bhi naaz se koi jagaane vaalaa ho

· · ·

apni taqdir se baghaavat ki

aaj ham ne bhi ik ibaadat ki

kaun hai jis ke sar ki khaaein qasam

kis ne ham se yahaan mohabbat ki

· · ·

ham na hote bhi to itnaa hote

kahin dariyaa kahin sahraa hote

jaane kyaa khud ko samajh rakkhaa hai

ye jo hasrat hai ki rusvaa hote

· · ·

hukm aayaa hai ki fitne ko bhi fitna na kahun

jaisaa dekhaa hai sunaa hai use vaisaa na kahun

mere chup rahne se kyaa baat sanvar jaaegi

log khud bhi to samajhte hain kahun yaa na kahun

· · ·

taarikiyon mein ham jo giraftaar ho gae

shaayad sahar se pahle hi bedaar ho gae

ye kaun saa maqaam-e-rah-o-rasm hai ki vo

itne hue qarib ki bezaar ho gae

· · ·

roke kuchh der ghubaar aankh kaa dho lein ham bhi

apne bhi dil ko zaraa aaj TaTolein ham bhi

naam le kar kabhi ham ko bhi pukaare koi

apnaa darvaaza kisi roz to kholein ham bhi

· · ·

hain agar daar-o-rasan subh-e-munavvar ke evaz

phir to khurshed hi ubhregaa mire sar ke evaz

ham ko bhi sar koi darkaar hai ab sar ke evaz

patthar ik ham bhi chalaa dete hain patthar ke evaz

· · ·

chaunkaa hai aaj yuun tiraa divaana khvaab mein

jaise ki mil gayaa koi viraana khvaab mein

likhnaa hai pichhle din kaa bhi afsaana khvaab mein

ai hone vaali subh na aa jaanaa khvaab mein

· · ·

shahr mein tanhaa thaa lekin karb-e-tanhaai na thaa

ghar se baahar rah ke main itnaa to saudaai na thaa

khud-bakhud hi dost ban kar bante hain dushman ye log

varna az-khud to mujhe zauq-e-shanaasaai na thaa

· · ·

khud apne ghar mein hain is tarah aaj aae hue

ki jaise ghar mein kisi ke hon ham bulaae hue

ki jaise ab koi khurshid aa hi jaaegaa

hain apne ghar ke andheron se lau lagaae hue

· · ·

dil murid-e-ilzaam-e-vafaa aur bhi niklaa

ik gham gham-e-dauraan ke sivaa aur bhi niklaa

yuun hone ko ham se hai khafaa saaraa zamaana

ik shakhs magar ham se khafaa aur bhi niklaa

· · ·

har-gaam tajrabaat ke pahlu badal gae

logon ko aazmaa ke ham aage nikal gae

ham ko to ek lamha khushi kaa na mil sakaa

kyaa log the jo ziist ke saanche mein Dhal gae

· · ·

kyuun andheron mein rahein raat basar hone tak

khud hi khurshid na ban jaaein sahar hone tak

kitnaa achchhaa ho ki is baar mariz-e-shab-e-gham

achchhaa ho jaae masihaa ko khabar hone tak

· · ·

aur bhi aaeinge kuchh ahl-e-vafaa mere baad

aur bhi nikhregi duniyaa ki fazaa mere baad

e'tiraaf apni khataaon kaa main kartaa hi chalun

jaane kis kis ko mile meri sazaa mere baad

· · ·

haal-e-dil main ne jo duniyaa ko sunaanaa chaahaa

mujh ko har shakhs ne dil apnaa dikhaanaa chaahaa

apni tasvir banaane ke liye duniyaa mein

main ne har rang pe ik rang chaDhaanaa chaahaa

· · ·