Ghazal

aa aur har ik lutf-o-inaayat ke liye aa

tanhaaiyon mein meri rifaaqat ke liye aa

le kar nigah-e-naaz kaa har nashtar-e-sar-tez

dil par mire ik taaza jaraahat ke liye aa

· · ·

koi jalvaa-fishaan hai aur main huun

tasavvur kaa jahaan hai aur main huun

kaThin hai raah manzil gum shab-e-taar

magar azm-e-garaan hai aur main huun

· · ·

yuun to hangaame bahut dil mein bapaa rahte hain

ham baDe khush hain ki raazi-ba-razaa rahte hain

sajti rahti hain hamaare hi liye daar-o-salib

koi bhi daur ho ham surkh-qabaa rahte hain

· · ·

nahin badle dar-o-divaar-e-zindaan aao divaano

jo pahle the vahi hain saaz-o-saamaan aao divaano

tum aise sar-phiron ki justuju hai tauq-e-aahan ko

bulaati hai tumhein zanjir-e-zindaan aao divaano

· · ·

har qadam teri rahguzar mein hai

meri manzil miri nazar mein hai

zindagi sarhad-e-khatar mein hai

manzil-e-aakhiri nazar mein hai

· · ·

qadam jo raah-e-mohabbat mein thakne lagtaa hai

har ek zarra-e-manzil chamakne lagtaa hai

vo jis ne pi ho zaraa si bhi eqtidaar ki mai

har ek bazm mein kyaa kyaa bahakne lagtaa hai

· · ·

ai dost tiraa qurb to ham paa na sakeinge

kyaa naam bhi honTon pe tiraa laa na sakeinge

gahraai se dil ki ubhar aaeinge nae giit

gaae hue giton ko to ham gaa na sakeinge

· · ·

mere sapnon ki mast purvaai

meri khaatir tujhe bulaa laai

ik tire intizaar mein baiThe

ho chali shaam dhuup sanvlaai

· · ·

ishq kaa ham se naam baaqi hai

husn kaa ehtiraam baaqi hai

piine vaale to uTh gae kab ke

haan magar daur-e-jaam baaqi hai

· · ·

shaam-e-dilkash kaa rangin samaan hai

aise mein kyaa khabar tu kahaan hai

apne dil ko javaan-saal rakkho

dil javaan hai to sab kuchh javaan hai

· · ·

hausla diid kaa aur taab-e-nazar dekheinge

husn hi husn ke ham shams-o-qamar dekheinge

dekhnaa paD gai maayus andheron ki sahar

sochte the ki umidon ki sahar dekheinge

· · ·

zaahiran shaad huun farhaan huun hamesha ki tarah

baatinan zaar-o-pareshaan huun hamesha ki tarah

dil miraa barg-e-khizaan-dida ki maanind sahi

main parastaar-e-bahaaraan huun hamesha ki tarah

· · ·

bhaTak na jaae khudaayaa nazar kitaabon mein

guzarte hain mire shaam-o-sahar kitaabon mein

jahaan bhar mein hain jaazib hazaar-haa chizein

magar nazar ne banaayaa hai ghar kitaabon mein

· · ·

choT gahri mujhe lagi to nahin

dil ki haalat kabhi chhupi to nahin

haasil-e-nutq khaamushi to nahin

kahin mearaaj-e-gham yahi to nahin

· · ·

khizaan-dida gulistaan kaa nazaaraa kar liyaa main ne

na paa kar phuul kaanTon hi se daaman bhar liyaa main ne

mujhi se uTh na paayaa baar tabligh-e-mohabbat kaa

shar-o-fitna kaa har ilzaam apne sar liyaa main ne

· · ·

hamaare ashk palkon par dhare hain

mohabbat mein qayaamat ke maze hain

mohabbat ki rah-e-dushvaar par ham

ishaara paa ke teraa chal rahe hain

· · ·

kore kaaghaz pe kai naqsh banaae main ne

aur phir ik ke sivaa saare miTaae main ne

gul-e-khud-rau ki mahak jaise kisi jangal mein

haae vo giit jo tanhaai mein gaae main ne

· · ·

ghair apne hain kab paraae hain

vaqt par mere kaam aae hain

raah-e-hasti mein mere gaam-ba-gaam

teri yaadon ke kitne saae hain

· · ·

vafaa ki raah mein jo naqd-e-jaan luTaa aae

lab-e-zamaana ne vo chand naam dohraae

jab ik bhi lamha khushi kaa na apne paas aae

khudaa bachaae ham is zindagi se bhar paae

· · ·

mire saaqi ik aisaa daur-e-saaghar

piyun ji bhar ke ashk-e-dida-e-tar

jamaal-e-dost yuun ho jalva-farmaa

girein meri nazar se maah-o-akhtar

· · ·

chain dam bhar ko sar-e-shaam kahaan hotaa hai

dil sulagtaa ho to aaraam kahaan hotaa hai

nargis-e-naaz se jo mujh ko ataa hotaa thaa

ab mire hisse mein vo jaam kahaan hotaa hai

· · ·

ahl-e-vafaa ki jaan the dushvaar raaste

phulon kaa farsh ban gae pur-khaar raaste

teri shamim-e-zulf ke sadqe ki aaj bhi

mahki hui fazaa hai to gul-baar raaste

· · ·

dil aag mein furqat ki jaltaa hai to jalne do

shoale ko mohabbat ke kuchh aur machalne do

manzil ki taDap aakhir pahunchaaegi manzil tak

gir gir ke sanbhaltaa huun gir gir ke sanbhalne do

· · ·

ham dard-e-mohabbat kaa mudaavaa nahin karte

kuchh bhi ho magar arz-e-tamannaa nahin karte

khud zaat pe apni jo bharosaa nahin karte

duniyaa mein kabhi naam vo paidaa nahin karte

· · ·