Ghazal

gila-e-jaur nahin shikva-e-bedaad nahin

ham giraftaar-e-balaa khugar-e-fariyaad nahin

zauq-e-parvaaz hai baaqi na tamannaa-e-bahaar

shaad huun shaad ki minnat-kash-e-sayyaad nahin

· · ·

ik umr mein ab samjhaa duniyaa kaa ye haasil thaa

jo naqsh thaa dhokaa thaa jo rang thaa baatil thaa

hangaama-e-hasti se fursat jo mili dekhaa

ik daagh-e-nadaamat hi kul ziist kaa haasil thaa

· · ·

vo jalva-gah-e-naaz hai yaa bazm-e-tur hai

har ek zarra ru-kash-e-duniyaa-e-nur hai

in khud-numaaiyon pe bhi mahrumiyaan 'ajab

ai chashm-e-naa-muraad ye teraa qusur hai

· · ·

muft raaz-e-zindagi rusvaa kiyaa

ai miri vaaraftagi ye kyaa kiyaa

zindagi kyaa thi tilism-e-aab-o-gil

main khudaa jaane ki kyaa samjhaa kiyaa

· · ·

kharaab-haal vafaa ko rulaae jaate hain

nazar churaae hue muskuraae jaate hain

vafaa-shi'aar sahi ghair mujh se kyon kahiye

ye roz kis liye qisse sunaae jaate hain

· · ·

yaa gham-e-mahbub yaa jaam-e-sharaab

haae vo sarmasti-e-ahd-e-shabaab

mujh se puchh ai aarzu-e-kaamyaab

e'tibaar-e-naala-e-naa-mustajaab

· · ·

aks-e-jamaal-e-yaar ki taasir dekhnaa

dil ban gayaa hai husn ki tasvir dekhnaa

aai hai phir chaman se havaa-e-junun-navaaz

shaayad hai phir nasib mein zanjir dekhnaa

· · ·

shauq mein haal se behaal hue jaate hain

ham tiri raah mein paamaal hue jaate hain

kyaa sitam hai ki tire hijr mein rafta-rafta

ab shab-o-roz mah-o-saal hue jaate hain

· · ·