Ghazal

junun ke valvale jab ghuT gae dil mein nihaan ho kar

to uTThe hain dhuaan ho kar gire hain bijliyaan ho kar

kuchh aage baDh chale saamaan-e-raahat laa-makaan ho kar

falak pichhe rahaa jaataa hai gard-e-kaarvaan ho kar

· · ·

ehsaan le na himmat-e-mardaana chhoD kar

rasta bhi chal tu sabza-e-begaana chhoD kar

marne ke baad phir nahin koi sharik-e-haal

jaataa hai sham-e-kushta ko parvaana chhoD kar

· · ·

ye aah-e-be-asar kyaa ho ye nakhl-e-be-samar kyaa ho

na ho jab dard hi yaarab to dil kyaa ho jigar kyaa ho

baghal-gir aarzu se hain muraadein aarzu mujh se

yahaan is vaqt to ik iid hai tum jalva-gar kyaa ho

· · ·

uDaa kar kaag shishe se mai-e-gul-gun nikalti hai

sharaabi jama hain mai-khaana mein Topi uchhalti hai

bahaar-e-mai-kashi aai chaman ki rut badalti hai

ghaTaa mastaana uThti hai havaa mastaana chalti hai

· · ·

sang-e-jafaa kaa gham nahin dast-e-talab kaa Dar nahin

apnaa hai us par aashiyaan nakhl jo baarvar nahin

sunte ho ahl-e-qaafila main koi raahbar nahin

dekh rahaa huun tum mein se ek bhi raah par nahin

· · ·

ye huaa maaal hubaab kaa jo havaa mein bhar ke ubhar gayaa

ki sadaa hai lutma-e-mauj ki sar-e-pur-ghurur kidhar gayaa

mujhe jazb-e-dil ne ai juz bahak ke rakhaa qadam koi

mujhe par lagaae shauq ne kahin thak ke main jo Thahar gayaa

· · ·

kyaa kaarvaan-e-hasti guzraa ravaa-ravi mein

fardaa ko main ne dekhaa gard-o-ghubaar-e-di mein

the mahv laala-o-gul kis kaif-e-be-khudi mein

zakhm-e-jigar ke Taanke TuuTe hansi hansi mein

· · ·

tanhaa nahin huun gar dil-e-divaana saath hai

vo harzah-gard huun ki pari-khaana saath hai

hangaama ik pari ki savaari kaa dekhnaa

kyaa dhuum hai ki saikDon divaana saath hai

· · ·

is vaaste adam ki manzil ko DhunDte hain

muddat se doston ki mahfil ko DhunDte hain

ye dil ke paar ho kar phir dil ko DhunDte hain

tir-e-nigaah us ke bismil ko DhunDte hain

· · ·

aa ke mujh tak kashti-e-mai saaqiyaa ulTi phiri

aaj kyaa naddi bahi ulTi havaa ulTi phiri

aate aate lab par aah-e-naa-rasaa ulTi phiri

vo bhi meraa hi dabaane ko galaa ulTi phiri

· · ·

hansi mein vo baat main ne kah di ki rah gae aap dang ho kar

chhupaa huaa thaa jo raaz dil mein khulaa vo chehre kaa rang ho kar

hamesha kuuch o maqaam apnaa rahaa hai khizr-e-rah-e-tariqat

rukaa to main sang-e-mil ban kar chalaa to aavaaz-e-chang ho kar

· · ·

kis liye phirte hain ye shams o qamar donon saath

kis ko ye DhunDte hain barhana-sar donon saath

kaisi yaa-rab ye havaa subh-e-shab-e-vasl chali

bujh gayaa dil miraa aur sham-e-sahar donon saath

· · ·

nadaamat hai banaa kar is chaman mein aashiyaan mujh ko

milaa hamdam yahaan koi na koi ham-zabaan mujh ko

dikhaae jaa ravaani tausan-e-umr-e-ravaan mujh ko

hilaal-e-barq se rakh ham-rikaab-o-ham-inaan mujh ko

· · ·

kisi se bas ki umid-e-kushud-e-kaar nahin

mujhe ajal ke bhi aane kaa e'tibaar nahin

javaab naame kaa qaasid mazaar par laayaa

ki jaantaa thaa use taab-e-intizaar nahin

· · ·

pursish jo hogi tujh se jallaad kyaa karegaa

le khuun main ne bakhshaa tu yaad kyaa karegaa

huun daam mein pur-afshaan aur saadgi se hairaan

kyuun tez ki hain chhuriyaan sayyaad kyaa karegaa

· · ·

kyaa kahein kis se pyaar kar baiThe

apne dil ko figaar kar baiThe

sabr ki ik qabaa jo baaqi thi

us ko bhi taar taar kar baiThe

· · ·