chaahe kitni bhi andheri shab ho — Abrar Asar

na to aaftaab ki hai gharaz na talab mujhe koi chaand ki
vo charaagh mujh ko 'aziz hai miri zulmaton ko jo nuur de

us ke chehre pe thaa namak aisaa
aaj tak zaaiqa hai honTon par

pukhta agar hai 'azm to socho na dosto
chhoTi si naav aur samundar vishaal hai

khatra thaa aandhiyon se magar haae-re nasib
baad-e-sabaa charaagh bujhaa kar chali gai

chaman mein shor hai bhanvron ki chaahat kaa bahut lekin
mohabbat gul ki bulbul se hai khaamoshi ke parde mein

main agar aaina nahin hotaa
koi mujh se khafaa nahin hotaa

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

ishq ho jaaegaa meri daastaan-e-ishq se
raat bhar jaagaa karoge is kahaani ke liye

yahi din mein Dhalegi raat 'akhtar'
yahi din kaa ujaalaa raat hogaa

havaa mein khushbuein meri pahchaan ban gai thiin
main apni miTTi se phuul ban kar ubhar rahaa thaa