mataa-e-dard parakhnaa to bas ki baat nahin — Ada Jafarey

bas ek baar manaayaa thaa jashn-e-mahrumi
phir us ke baad koi ibtilaa nahin aai

jis ki jaanib 'adaa' nazar na uThi
haal us kaa bhi mere haal saa thaa

hazaar kos nigaahon se dil ki manzil tak
koi qarib se dekhe to ham ko pahchaane

dil ke viraane mein ghume to bhaTak jaaoge
raunaq-e-kucha-o-baazaar se aage na baDho

kuchh itni raushni mein the chehron ke aaine
dil us ko DhunDhtaa thaa jise jaantaa na thaa

varna insaan mar gayaa hotaa
koi be-naam justuju hai abhi

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

aansuon se koi aavaaz ko nisbat na sahi
bhigti jaae to kuchh aur nikharti jaae

farq ye hai nutq ke saanche mein Dhal saktaa nahin
varna jo aansu hai durr-e-shaah-vaar-e-naghma hai