kaTi hui hai zamin koh se samundar tak — Adeem Hashmi

faasle aise bhi honge ye kabhi sochaa na thaa
saamne baiThaa thaa mere aur vo meraa na thaa

ik khilaunaa TuuT jaaegaa nayaa mil jaaegaa
main nahin to koi tujh ko dusraa mil jaaegaa

kyuun parakhte ho savaalon se javaabon ko 'adim'
honT achchhe hon to samjho ki savaal achchhaa hai

huaa hai jo sadaa us ko nasibon kaa likhaa samjhaa
'adim' apne kiye par mujh ko pachhtaanaa nahin aataa

yaad kar ke aur bhi taklif hoti thi 'adim'
bhuul jaane ke sivaa ab koi bhi chaaraa na thaa

mire hamraah garche duur tak logon ki raunaq hai
magar jaise koi kam hai kabhi milne chale aao

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

yaad aai hai to phir TuuT ke yaad aai hai
koi guzri hui manzil koi bhuli hui dost

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa