jo mere 'ilm mein nahin aai — Afzal Peshawari

main to husn-e-nazar samajhtaa huun
log jis ko shabaab kahte hain

mohabbat main bhi kartaa huun mohabbat tum bhi karte ho
magar donon mein munh-dekhi mohabbat kaun kartaa hai

sujhti hain sainkaDon baatein mujhe
haath se mauqa nikal jaane ke baa'd

hamesha ke liye vo jaa chuke hain
khayaal un kaa magar jaataa nahin hai

laakh duniyaa khilaaf ho jaae
aap kaa dil to saaf ho jaae

husn ko laa-javaab kahte hain
ghairat-e-aaftaab kahte hain

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhaari bazm se nikle to ham ne ye sochaa
zamin se chaand talak kitnaa faasla hogaa

apne ehsaas ki shiddat ko bujhaane ke liye
main nai tarz ke khush-fikr risaale maangon

pahle nisaab-e-aql huaa ham se intisaab
phir yuun huaa ki qatl bhi ham kar diye gae

avvalin chaal se aage nahin sochaa main ne
ziist shatranj ki baazi thi so main haar gayaa