sang uThaanaa to baDi baat hai ab shahr ke log — Ahmad Mushtaq

khoyaa hai kuchh zarur jo us ki talaash mein
har chiiz ko idhar se udhar kar rahe hain ham

dukh ke safar pe dil ko ravaana to kar diyaa
ab saari umr haath hilaate raheinge ham

koi tasvir mukammal nahin hone paati
dhuup dete hain to saayaa nahin rahne dete

mohabbat mar gai 'mushtaaq' lekin tum na maanoge
main ye afvaah bhi tum ko sunaa kar dekh letaa huun

tire aane kaa din hai tere raste mein bichhaane ko
chamakti dhuup mein saae ikaTThe kar rahaa huun main

paani mein aks aur kisi aasmaan kaa hai
ye naav kaun si hai ye dariyaa kahaan kaa hai

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

ik na ik din to chukaanaa hai khamoshi kaa hisaab
jaante sab hain magar boltaa koi nahin hai

jis ghaDi puchh rahaa thaa vo mire dil kaa mizaaj
ai miri aankh tujhe khuun se bhar jaanaa thaa

abhi be-vaqt hai khvaabon se jaanaa
bichhaDne kaa abhi mausam nahin hai