ji-bhar ke sitaare jagmagaaein — Ahmad Sagheer Siddiqui

ye kyaa kam hai amaama baandh kar nikle nahin ham
ab is se bhi sivaa imaan-daari kaun kartaa

kab se main safar mein huun magar ye nahin maalum
aane mein lagaa huun ki main jaane mein lagaa huun

suntaa hai yahaan kaun samajhtaa hai yahaan kaun
ye shaghl-e-sukhan vaqt-guzaari ke liye hai

ye na dekho ki mire zakhm bahut kaari hain
ye bataao ki miraa dushman-e-jaan kaisaa hai

the yahaan saare amal radd-e-amal ke muhtaaj
zindagi bhi hamein darkaar thi marne ke liye

kholin vo dar kisi ne bhi kholaa na ho jise
koi jidhar na jaae udhar jaanaa chaahiye

safar ki shaam sitaara nasib kaa jaagaa
phir aasmaan-e-mohabbat pe ik hilaal khilaa

zamin apni taraf khinchti hai aur 'jaanif'
falak ne apnaa bichhaayaa hai jaal mere liye

rafaaqaton kaa miri us ko dhyaan kitnaa thaa
zamin le li magar aasmaan chhoD gayaa

vo qahr thaa ki raat kaa patthar pighal paDaa
kyaa aatishin gulaab khilaa aasmaan par

uTThi hain meri khaak se aafaat sab ki sab
naazil hui na koi balaa aasmaan se

zamin jab bhi hui karbalaa hamaare liye
to aasmaan se utraa khudaa hamaare liye